އޮމިކްރޯންގެ ރާޅު ދުނިޔެއަށް ކުރިމަތިވިއިރު ރާއްޖެ އައީ މަޑު މަޑުން އާންމު ހާލަތަށް ރުޖޫއަވަމުންނެވެ. މާލެ އާއި އަތޮޅުތަކުގައިވެސް ކޮވިޑް ޖެހޭ މީހުންގެ އަދަދުތައް ވަރަށް ބޮޑުތަން ދަށްވިއެވެ. މާލެއިން ޕޮޒިޓިވްވާ މީހުންގެ އަދަދު 100 އިން ދަށުގައި ހިފެހެއްޓިފައި އޮތުމަށްފަހު މިހާރު މިވަނީ 100 އިން މައްޗަށް އަރާފައެވެ.
އަދި 2022 ވަނަ އަހަރު ފެށުނު ފަހުން މި ފާއިތުވި 5 ދުވަހުގެ ތެރޭގައި ރާއްޖެއިން 1046 ޕޮޒިޓިވް ކޭސް ފެނިފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީ) އިން ބުނެއެވެ. އެންމެ ގިނަ ކޭސްތައް ފެނިފައިވަނީ ރިސޯޓްތަކުންނެވެ. އެގޮތުން ފަތުރުވެރިން ޒިޔާރަތްކުރާ ރިސޯޓްތަކުން 383 ޕޮޒިޓިވް ކޭސް ފެނިފައިވާއިރު، މާލެއިން ފެނިފައިވާ 358 ކޭސް ހިމެނެއެވެ. މީގެ ތެރެއިން 295 ކޭސް ފެނިފައިވަނީ މީހުން ދިރިއުޅޭ އެހެނިހެން ރަށްރަށުންނެވެ. އަދި ސަފާރީތަކުން 10 ޕޮޒިޓިވް ކޭސް ފެނިފައިވެއެވެ. އިއްޔެއާ ހަމައަށް އެކްޓިވް ކޭސްތަކުގެ އަދަދު ވަނީ 2734 އަށް އަރާފައެވެ. މިވަގުތު ހޮސްޕިޓަލްތަކުގައި އެޑްމިޓްކޮށްގެން ފަރުވާ ހޯދަމުން އަންނަނީ 13 މީހެކެވެ. މިއަހަރު ފެށުނު ފަހުން ކޮވިޑް ބަލީގައި ރާއްޖެއިން ވަނީ އެކަކު މަރުވެފައެވެ.
އެޗްޕީއޭއިން އާންމުކޮށްފައިވާ އަދަދުތަކަށް ބަލާއިރު،
- 5 ޖެނުއަރީގައި 224 މީހުން ވަނީ ކޮވިޑަށް ޕޮޒިޓިވްވެފައެވެ.
- 4 ޖެނުއަރީގެ އަދަދުތަކަށް ބަލާއިރު 228 މީހުން ވަނީ ކޮވިޑަށް ޕޮޒިޓިވްވެފައެވެ.
- 3 ޖެނުއަރީގައި 242 މީހުން ކޮވިޑަށް ފޮޒިޓިވްވިއެވެ.
- 2 ޖެނުއަރީގައި 161 މީހުން ކޮވިޑަށް ޕޮޒިޓިވްވިއެވެ.
- 1 ޖެނުއަރީގައި 191 މީހުން ކޮވިޑަށް ޕޮޒިޓިވްވިއެވެ.
މޮނިޓަރިންއަށްލާފައިވާ ރަށްތަކުގެ ތެރޭގައި 12 ރަށެއް ހިމެނެއެވެ. މ. މުލަށް، ދ. ކުޑަހުވަދޫ، ނ. ލަންދޫ، ތ. ވިލުފުށި، ގދ. ވާދޫ، ކ. ތުލުސްދޫ، ހދ. ނާވައިދޫ، ދ. ހުޅުދެލި، ގދ. ހޯޑެއްދޫ، ގދ. ގައްދޫ، ކ. މާފުށި އަދި ހއ. އިހަވަންދޫ ހިމެނެއެވެ. މިއީ 1 ޖެނުއަރީ އާއި ހަމައަށް އެޗްޕީއޭއިން އަދާހަމަކޮށްފައިވާ ލިސްޓުގައި ހިމެނޭ ރަށްތަކެވެ.
2019 ގައި މުޅި ދުނިއަށް ކުރިމަތިވި ކޮވިޑްގެ އާލަމީ ވަބާގައި މިއަދާ ހަމައަށް 96،746 ކޭސް ރާއްޖެއިން ފެނިފައިވެއެވެ. މިއަދަދު މިއަށްވުރެ އިތުރުވެސްވާނެއެވެ. ކޮވިޑްޖެހިގެން ޓެސްޓުނުކޮށް ފަރުވާ ހޯދައިގެން ރަނގަޅުވި މީހުންވެސް އެބަތިއްބެވެ. އެ މީހުން މިލިސްޓުގައި ހިމަނައިފިނަމަ ރާއްޖެއިން ކޮވިޑް ޖެހުނު މީހުންގެ އަދަދު މިއަށްވުރެ އިތުރުވާނެއެވެ.
ސުކޫލުތައް ބަންދު ދުވަސްވަރު މާލެއަށް ރަށްރަށުން ގިނަ އަދަދެއްގެ ބަޔަކު ޒިޔާރަތްކޮށް، ރަށްރަށަށްވެސް މާލެއިން ގިނަ އަދަދެއްގެ ބަޔަކު ވަނީ ޗުއްޓީއަށް ގޮހެވެ. ޗުއްޓީގައި އުޅޭއިރުވެސް މާސްކް އެޅުމާއި ގައިދުރުކަން ބޭއްވުމަށް އިދާރާތަކުން އައީ އަންގަމުންނެވެ. މީހުން އެއްވާ ކުޅިވަރުތައް ބޭއްވުން ރައްކާތެރިނޫން ކަމަށް ކަމާބެހޭ ފަރާތްތަކުން ބުނަމުންދިޔައެވެ.
މާލޭގައި އަދަދުތައް މައްޗަށްދާއިރު ރަސްފަންނުގައި ބޭއްވި ނައިޓް މާކެޓަކީވެސް ގިނަ މީހުން އެއްވެ ގައިދުރުކަމެއް ނެތި އަދި މާސްކް ނާޅާ އުޅޭ މީހުންވެސް ގިނަ ހަރަކާތެކެވެ. އަދި އާ އަހަރު ފާހަގަކުރަން ބޭއްވި މިއުޒިކް ޝޯވް އާއި ހިތާނީ ޕާޓީތަކަކީ ގިނަ މީހުން އެއްވެގެން ބޭއްވި ހަރަކާތްތަކެވެ. ފާޓީތަކާއި ވެޑިންތައްވެސް އެހާމެ ގިނައެވެ. މިފަދަ ހަރަކާތްތައް ބާއްވާއިރު މާސްކް އެޅުމާއި ގައިދުރުކަމަށް ސަމާލުކަން ދިނުން މުހިންމެވެ. ކޮވިޑް ޖެހޭ މީހުންގެ އަދަދުތައް އިތުރުވަމުން އަންނައިރު ފަރުދީ ޒިންމާ އަދާކުރުމާއި އިދާރާތަކުން އަންގާ އެންގުންތަކަށްވެސް ބޯލެނބުން މުހިންމެވެ. އަނެއްކާވެސް ކޭސްތައް އިތުރުވެ ހިދުމަތްތައް ބަންދުވެ ސުކޫލުތަކާއި ކެފޭ ރެސްޓޯރެންޓްތައް އަދި ޖިމްތައް ބަންދުވެއްޖެނަމަ އެއީ މާބޮޑު ގެއްލުމަކަށް ވެދާނެއެވެ.
އާމްދަނީ ދަށްވެ ނަފްސާނީ ގޮތުން މީހާ ބަލިކަށިވުންފަދަ އަސަރުތައް ކުރާނެއެވެ. ވީމާ ރައްކާތެރިކަން ހިޔާރުކޮށް މާސްކް އެޅުމަށާއި ގައިދުރުކަން އިހްތިޔާރުކޮށްގެން އަދިވެސް އުޅެންވީއެވެ. ސެނިޓައިޒަރ ބޭނުން ކުރުމަށާއި، ބޭރުން ގެއަށް ގެންނަ ތަކެތި ދޮވެ ސާފުކުރުންވެސް ކުރިއެކޭ އެއްގޮތަށް ކުރިއަށް ގެންދިއުން މުހިންމެވެ. ކުޑަދުވަސްކޮޅަކު ކުރިންކުރި ހިތްވަރު ކޮށްފިނަމަ މާސްކް ނާޅާ އުޅެވޭ ހިސާބަށްވެސް މުޖުތަމައު އަމާންވުން އެކަށީގެންވެއެވެ. މިހާރުވެސް ކޮވިޑް ނުފެތުރޭ ރަށްރަށުގައި މާސްކް ނާޅާ އުޅޭހެން މާލޭގައިވެސް މާސްކް ނާޅާ އުޅެވޭނެ ދުވަހެއް ހޯދަން އެންމެން އެކީގައި މަސައްކަތް ކުރަންވީއެވެ. މިއަހަރު ކޮވިޑުން އަރައިގަނެވިދާނެ ކަމުގެ އުންމީދު ދުނިޔޭގެ ސިއްހަތު ޖަމްއިއްޔާއިން ދީފައިވާއިރު ކޮވިޑް ހުއްޓުވަން ރައްކާތެރިކަމުގެ ފިޔަވަޅުތައް ދޫކޮށްނުލާ އަދި ކުރިއަށް ގެންދިއުން ބުއްދިވެރިއެވެ.
ކޮވިޑް 19ގެ ބަލިމަޑުކަން ފެތުރެން ފެށިފަހުން މިހާތަނަށް މުޅި ދުނިޔެއިން 297،105،083 (ދުއިސައްތަ ނުވަދިހަ ހަތް މިލިއަން ސަތޭކަފަސްހާސް އަށްޑިހަ ތިނެއް) މީހުންނަށް މި ބަލި ޖެހިފައިވެއެވެ. ކޮވިޑް ބަލީގައި މުޅި ދުނިޔެއިން 5،478،851 (ފަސްމިލިއަން ހަތަރުސަތޭކަ ހަތްދިހަ އަށްހާސް އަށްސަތޭކަ ފަންސާސް އެކެއް) މީހުން ވަނީ މަރުވެފައެވެ. ދުއިސައްތަ ފަންސާސް ހަ މިލިއަނަށްވުރެ ގިނަ މީހުން ބަލިން ރަނގަޅުވެފައިވެއެވެ. މިއީ 5 ޖެނުއަރީ 2022 އާއި ހަމައަށް ދުނިޔޭގެ ސިއްހަތު ޖަމްއިއްޔާއިން އަދާ ހަމަކޮށްފައިވާ ތަފާސްހިސާބުތަކުން ދައްކާ އަދަދުތަކެވެ.
