ހުޅުމާލޭގައި ދިރިއުޅޭ މީހުންގެ އަދަދު ދުވަހެއް ދުވަހަކަށް ދަނީ ގިނަ ވަމުންނެވެ. ދާދިފަހުން މީހުން އާބާދުވި ހިޔާ ފުލެޓުތަކުގައި ވެސް ގިނަ އަދަދެއްގެ މީހުންނާއި ކުދިން ދަނީ ދިރިއުޅެމުންނެވެ. މިދުވަސްވަރަކީ ސްކޫލު ބަންދު ދުވަސްވަރު ކަމަށްވުމާއެކު ގޭގައި ފޫހިވެފައި ތިބުމުގެ ބަދަލުގައި ހިތްހަމަޖެހޭ މާހައުލެއްގައި ހަރަކާތްތެރިކޮށް ކުދިންނަށް އުޅެވޭނެ ފުރުސަތު ހޯދައިދިނުމަކީ މުހިންމު ކަމެކެވެ.
ހުޅުމާލޭގެ މޫދަށް ގިނަ އަދަދެއްގެ ބަޔަކު މޫދު ކުޅިވަރު ކުޅުމަށް ގޮސް އުޅޭއިރު، މޫދާއި ކައިރި ސަރަހައްދުގައި ވޯޓަރ ސްޕޯރޓްސް އަށް ޚާއްސަ ތަންތަން އެބަހުއްޓެވެ. އެތަންތަނުގެ އެހީތެރިކަމާއެކު، ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ވަނީ މޫދު ކުޅިވަރަށް ޝައުގުވެރިކަން ހުންނަ ކުދިންނަށް އަމާޒުކޮށް، ސްކޫލް މިޑް ޓާމް ބަންދާއި ގުޅުވައިގެން 'މައި ހުޅުމާލެ ވޯޓާ ސްޕޯރޓްސް ކޭމްޕް 2021' ގެ ނަމުގައި ކޭމްޕެއް ކުރިއަށް ގެންގޮސްފައެވެ.
" މި ކޭމްޕްގެ މަގްސަދަކީ ހުޅުމާލޭގައި ދިރިއުޅޭ ދެޖިންސްގެ ކުދިންނަށް އަމާޒުކޮށްގެން މޫދު ކުޅިވަރެއް ކަމުގައިވާ 'ސްޓޭންޑް އަޕް ޕެޑަލް ބޯޑް' ދަސްކޮށްދިނުން. މި ކޭމްޕް މިފަހަރު ކުރިއަށްގެންދަނީ 13 އަހަރާއި 19 އަހަރާއި ދެމެދުގެ 63 ކުދިން ހިމަނައިގެން" އެޗްޑީސީ އިން މައުލޫމާތު ދިނެވެ.
ސްޓޭންޑް އަޕް ޕެޑަލް ބޯޑު ކުޅިވަރަކީ ކޮބާ؟
ސްޓޭންޑް އަޕް ޕެޑަލް ބޯޑަކީ ކަސްރަތެއްގެ ގޮތަށް އަދި ހިތްހަމަޖައްސާލަން ވެސް ކުރެވިދާނެ ކަމެކެވެ.
ވައިޓް ބީޗް ވޯޓަރ ސްޕޯރޓްސް އިން މައުލޫމާތު ދިންގޮތުގައި ސްޓޭންޑް އަޕް ޕެޑަލް ބޯޑު ބޭނުންކޮށްގެން ސަރފިންގ ވެސް ކުރެވިދާނެ އެވެ. " ވޯޓަރ ސްޕޯރޓްސް ތަންތަނަށް ކުދިން ބަހާލާފަ ދަސްކޮށްދިނީ. ފަސޭހައަކަށް އެގޮތަށް ގުރޫޕުތަކަށް ބަހާލީ. ކޮންމެ ދުވަހަކު ކުދިން ގެނެސްގެން ދަސްކޮށްދިނީ. ނިންމާލަމުން އެއްދުވަހުގެ މުބާރާތެއް ބޭއްވުމުގެ ބޭނުމަކީ ޗެލެންޖެއް ދިނީމަ ކުދިން ދަސްކުރާހިތްވާނެތީ" ވައިޓް ބީޗް ވޯޓަރ ސްޕޯރޓްސް އިން މައުލޫމާތު ދިނެވެ.
ކޭމްޕްގެ ބައިވެރިން
މިކޭމްޕް ކުރިއަށްގެންދިޔައީ ވަރަށްގިނަ ތަންތަނުގެ އެހީތެރިކަމާއެކުގަ އެވެ. މީގެތެރޭގައި މޫދު ކުލަބް، ވައިޓް ބީޗް ވޯޓަރ ސްޕޯރޓްސް، ބުލޫ ހޮރިޒަން، ޑީޕް ބުލޫ އެކްސްޓްރީމް ވޯޓަރ ސްޕޯރޓްސް، ޕްރޯ އެކްސްކަރޝަންސް މޯލްޑިވްސް، ޖަސްޓް ސޯލްޓް، ރިއޯ ވޯޓަރ ސްޕޯރޓްސް، މޯލްޑިވްސް ވޯޓަރ ސްޕޯރޓްސް، ސީހޮލިކްސް، ބީޗް ކްލަބް މޯލްޑިވްސް، ބީޗް ބަޑީސް، މެރިން ޕޮލިސް، އެމް އާރް ސީ، ހުޅުމާލެ ޕޮލިސް އަދި ހުޅުމާލެ ހޮސްޕިޓަލް ހިމެނެއެވެ.
މިފަހަރުގެ ކޭމްޕަށް ބައިވެރިން ހޮވީ، އޮންލައިންކޮށް ބައިވެރިވުމުގެ ފުރުސަތު އާންމުކޮށް ހުޅުވާލައިގެން ކަމަށް އެޗްޑީސީ އިން ވަނީ މައުލޫމާތު ދީފައެވެ. އަދި ކުރިއަށް އޮތްތާގައި މިފަދަ އިތުރު ކޭމްޕްތައް ކުރިއަށް ގެންދިއުމުގެ ވިސްނުން އެބަހުރި ކަމަށް ވަނީ ފާހަގަކޮށްފައެވެ.
މައި ހުޅުމާލެ ވޯޓަރ ސްޕޯރޓްސް ކޭމްޕް ކުރިއަށް ގެންދިޔައީ 26 ޑިސެންބަރ އިން ފެށިގެން ޖެނުއަރީ މަހުގެ 3 ވަނަ ދުވަހުގެ ނިޔަލަށެވެ. ކޭމްޕް ނިންމާފައިވަނީ ބައިވެރިވި ކުދިންގެ މެދުގައި 1 ދުވަހުގެ މުބާރާތެއް ބޭއްވުމަށްފަހުގަ އެވެ.
