އަނެއްކާވެސް ބަނޑުބޮޑީތަ؟ މިއީ މިއަދު ބައެއް މަންމައިންނަށް ކުރިމަތިވަމުންދާ ސުވާލެކެވެ. ހަގީގަތަކީ މިސުވާލު ކުރާމީހާ އަށް މިކުރެވެނީ ކިހާވަރެއްގެ ސުވާލެއްކަން ނުވިސްނޭތީއެވެ.
ހަގީގީ ހާދިސާއެއް:
ކައިވެނިކޮށްގެން ފުރަތަމަ ދަރިފުޅަށް ބަނޑުބޮޑުވީ އަހަރުތަކެއް ފަހުންނެވެ. ބައިގެންދިއުމާއި ގުޅިގެން އެދެމަފިރިންނަށް ލިބުނީ ބޮޑު ހިތާމައެކެވެ. ރާއްޖެއިންނާއި ރާއްޖެއިން ބޭރުން ނުކުރާކަށް ބޭހެއް ނެތެވެ. އެންމެފަހުން ދިރިއުޅުމުގައި އެތައް ގޮންޖެހުންތަކެއް ދިމާވުމަށްފަހު ދެވަނަފަހަރަށް ބަނޑުބޮޑުވީ ފުރަތަމަ ދަރިފުޅު ބައިގެންދިޔަތާ 7 ވަރަކަށް އަހަރު ފަހުންނެވެ. އެއިރު ކައިވެނިކުރިތާ ވަނީ 15 އަހަރާއި ގާތްވެފައެވެ.
މި ދެމަފިރިން ބޭނުންވީ ވީހާއަވަހަކަށް އިތުރު ކުއްޖަކު ހޯދާށެވެ. ނަސީބު ކަންދިމާކުރި ގޮތުން ބަނޑުބޮޑުވީ ފުރަތަމަ ދަރިފުޅަށް 2 އަހަރު ނުވަނީސްއެވެ. ދެމަފިރިންނަށް އެއީ ލިބުނު ބޮޑު ނަސީބެކެވެ.
ބައެއް މީހުންގެ ފާޑުކިޔުން:
އެހާހިސާބުން އެ އަންހެންމީހާއާއި ކުރިމަތިވީ ސުވާލުތަކެކެވެ. އަނެއްކާވެސް ބަނޑުބޮޑުވީތަ؟ ހަމަ ބޭނުންވެގެން ހޯދާ ކުއްޖެއްތަ ތިއީ؟ ކިހިނެއް އެހާ ކައިރިކައިރީގައި ދެކުދިން ބަލާނީ؟ ދެން ވަޒީފާއަށްވެސް ނުދެވޭނެދޯ؟ ވިސްނާތި! ދެކުދިން ލިބުނީމަ ފިރިމީހާ އަށް ވަގުތު ނުދެވިގެން ފިރިމީހާ ގެއްލުމުގެ ފުރުސަތުވެސް ބޮޑު! ދެން ކޮފީއަކަށް ވެސް ނުދެވޭނެ ދޯ؟ އެއަންހެން މީހާ ޚިޔާރުކުރީ އެސުވާލުތަކަށް ޖަވާބު ނުދޭށެވެ. އެއީ އަމިއްލަ ދިރިއުޅުމުގައި ކަންތައް ދިމާވިގޮތް އެންމެންނަށް އެނގެން ބޭނުންނުވާތީއެވެ.
މިކުރެވެނީ ކިހާވަރެއްގެ ސުވާލެއް؟
ސުވާލު ކުރާ މީހާއަށް އަނެއްމީހާގެ ދިރިއުޅުމުގައި ކަންކަން ދިމާވިގޮތެއް އެނގޭބާ؟ ނޫނީ އެއީ ސުވާލު ކުރާމީހާއާއި ގުޅުންހުރި ކަމެއްބާ؟ ނޫނެކެވެ. ދިރިއުޅުމުގެ އަމިއްލަ ކަންތައްތަކާއި ބެހެމުގު ހައްގެއް އެހެން ބަޔަކަށް ނޯންނާނެއެވެ. އެއީ އެދެމަފިރިއެއްގެ އަމިއްލަކަމެކެވެ. އަދި އެދެމަފިރިންނަށް ގިނަކުދިން ލިބުނަސް ބަލާނީވެސް އެދެމަފިރިންނެވެ. އެހެން މީހުންނަކަށް އެކަމުން ވާނެ އުދަގުލެއްވެސް ނޯންނާނެއެވެ. ވީއިރު ނުބެހޭ ކަންތައްތަކާއި ބެހުމުގެ ބޭނުމަކީ ކޮބައިހެއްޔެވެ.
ވީވަރަކުން އެހީތެރިކަން ފޯރުކޮށްދެމާ!
ގާތް ރަހުމަތްތެރިއަކު ނުވަތަ އެއް އޮފީހެއްގައި މަސައްކަތްކުރާ މީހަކު ބަނޑުބޮޑުވުމުން ވީވަރަކުން އެމީހާގެ މަސައްކަތްތައް ލުއިކޮށްދީ އެހީތެރިކަން ފޯރުކޮށްދޭ މީހުންވެސް އުޅެއެވެ. މަދުންނަމަވެސް މިއުޅޭ ފާޑުކިޔާ މީހުންގެ ފަރާތުން އެއަމާޒުވާ ނޭދެވޭ ބަސްތަކުން މާބަނޑުމީހާއަށް ކުރާނެ އަސަރު އެއްފަހަރުވެސް ހިތަށް ގެނެސްބަލާށެވެ. ބައެއްފަހަރަށް އެމީހާ ބަނޑުބޮޑުވީ އެކަމަށް ތައްޔާރުނުވެ ހުއްޓާކަމުގައިވެސް ވެދާނެއެވެ. އެފަދަ ހާލަތެއްގައި ދިރިއުޅުމުގެ އެބޮޑު ބަދަލަށް ތައްޔާރުވާން އެމީހަކަށް ވަގުތުވެސް ނަގާފާނެއެވެ. ބޭނުންވަނީ މިފަދަ ވަގުތުތަކުގައި ފާޑުނުކިޔާ ތިމާއަށް ވެވެން އޮތް އެހީތެރިކަމަކީ ކޮބައިތޯ ބެލުމެވެ. ދަރިއަކު ހޯދަނީ މާއަވަހަށް ކަމަށް ބުނުމުގެ ބަދަލުގައި ހިތްވަރު އާލާވާނެ ބަހެއް ބުނާށެވެ. ނޫނީ އަނގަމަޑުންލައިގެން ހުރުން އެއީ އެންމެ ބުއްދިވެރިގޮތެވެ.
ދަރިންނަކީ މާތްﷲ ދެއްވާ އަމާނާތެކެވެ. އެއަމާނާތް އެކި މީހުންނަށް ލިބޭ މުއްދަތު ތަފާތުވެދާނެއެވެ. އަޅުގަނޑުމެންނަށް އޮތީ ދެއްވި ނިއުމަތަށް ޝުކުރުވެރިވުމެވެ. ފާޑުކިޔުމެއް ނޫނެވެ.
