ފާތިމަތު ޝަރުމީލާއަކީ ކެންސަރު ބައްޔާ ހަނގުރާމަކުރަމުންދާ ހިތްވަރުގަދަ މައެކެވެ. ޝަރުމީލާގެ ވާހަކައިގައި އެންމެ އަސަރާއެކު ފާހަގަކުރީ ކެންސަރުގެ ބަލިމީހަކަށް ވުމުން އޭނާއާމެދު ބައެއް މީހުން ދެކޭގޮތް ބަދަލުވި ވާހަކައެވެ. ކެންސަރާމެދު މުޖުތަމަޢު ދެކޭގޮތް ބަދަލުކުރުމުގެ މުހިންމުކަން 'ޒީޓައިމްސް' އަށް ދިން އިންޓަވިއުގައި ޝަރުމީލާ ދެއްކި ވާހަކައިންވެސް ވަނީ ޔަގީންވެފައެވެ.

ކެންސަރުޖެހިފައޭ ބުނުމުން ބައެއް މީހުން ދެކޭގޮތް ވަރަށް ތަފާތު ކަމަށާއި، ގައިންގަޔަށް އަރާ ބައްޔެއްކަމަށް ބައެއް މީހުންނަށް ހީވާކަމަށް ވަނީ ބުނެފައެވެ.

"ފިހާރައަކުން ފެނުނު މީހަކު ހީލާފަ ކިހިނެއްހޭ އަހާލީމަ ނުކެރުނު ބުނާކަށް ރަނގަޅޭ. އަސްލު ރަނގަޅު ނޫންވީމަ ބުނިން އެހާ ރަނގަޅެއް ނޫނޭ. ދެން ކިހިނެއްވީހޭ އެހީމަ ބުނެވުނު ކެންސަރ ޖެހިފައޭ. ބުނާއިރަށް އޭނަ ގޮއްސަ ވަންނަނީ އޭނަ ފިރިމީހާގެ އަނެއް ފަޅިއަށް. ވަރަށްދެރަވި. ހިތަށްއެރި އޭނަ ބިރުގަތީއޭ ކެންސަރއޭ ބުނީމަ" ޝަރުމީލާ އަސަރާއެކު އޭނައަށް ދިމާވިގޮތް ކިޔައިދިނެވެ.

Advertisement

ބައެއްފަހަރަށް ރަހުމަތްތެރިންގެ ފަރާތުން ވެސް ވަނީ ހިތްދަތިވާކަހަލަ ބަސްތައް އިވިފައެވެ. "ކެންސަރ އޭ ބުނާއިރަށް ބުނެފަ އެބަހުރި 'މަހީކުރީ ކަލޭ އޮންނާނީ އައިސީޔޫގަ ކަމަށޭ'. 'ކަލެއަށް ނުހިނގޭނެ ކަމަށޭ'. އެކަހަލަ ދެރަވާ އެއްޗެހި ރަހުމަތްތެރިންވެސް ބުނެފަ އެބަހުރި"

ކެންސަރުގެ ފެށުން

ވެރިރަށް މާލެއަށް އުފަން އުމުރުން 41 އަހަރުގެ ޝަރުމީލާއަށް ކެންސަރު ޖެހުނުކަން އެނގުނީ 2019 ވަނަ އަހަރުގެ މެއި މަހުގައެވެ. ސްކޫލުގައި ކިޔެވި ދުވަސްވަރުއްސުރެ ޝަރުމީލާ ދިޔައީ އޯވަރީގައި އެންޑޮމެޓްރިއޮސިސް ސިސްޓް ހުރެގެން ފަރުވާ ހޯދަމުންނެވެ.

" ކޮންމެ މަހަކު ސްކޭންކުރަމުން ދަނިކޮށް ސްކޭން އިން އެނގުނީ ލިވަރގައި ކަމެއް ހުރިކަން. ދެން އަންހެނުންގެ ޑޮކްޓަރަށް ދެއްކީމަ ބުނީ އެހެން ޑޮކްޓަރެއްގެ ނަން ބުނެފަ އެ ޑޮކްޓަރަށް ދައްކަން. އަދި ޓިއުމަރ ހުރިވާހަކަ ބުނި. ޓިއުމަރޭ ބުނާއިރަށް އެހިން ކެންސަރހޭ. ޑޮކްޓަރު ބުނި އެހެން ނުވެވެސްދާނޭ" ފުރަތަމަ އެނގުނުގޮތް ކިޔައިދެމުން ޝަރުމީލާ ބުންޏެވެ.

އައިޖީއެމްއެޗް އަށް ގޮއްސަ ހެދި ޓެސްޓްތަކުން ކެންސަރ ޖެހިފައިހުރިކަން ޔަގީންވި ވަގުތު އޭނާގެ ހުރި ހަމައެކަނި ދަރިފުޅުވެސް ކައިރީގައި ހުރިކަމަށް ޝަރުމީލާ ވަނީ ހިތްދަތިކަމާއެކު ފާހަގަކޮށްފައެވެ.

" ފުރަތަމަ ދަރިފުޅަށް އެނގުނީ ކެންސަރކަން. ދަރިފުޅު ގޮވައިގެން ދެވުނީ ޑޮކްޓަރަށް ދައްކަން. ދަރިފުޅުއެހި މަންމަ މަރުވަނީހޭ. އެވަގުތު ބުނެވުނު ބަލިވާ ކޮންމެ މީހަކީ އަދި މަރުވާނެ މީހެއް ނޫނޭ. ފަރުވާހޯދީމަ ރަނގަޅުވެދާނޭ. 4 ވަނަ ސްޓޭޖްގައި ހުއްޓާ އެނގުނީ. ޖެހުނީ ޕެންކްރިއެޓިކް ކެންސަރ. ލިވަރއަށްވެސް ފެތުރިފަ ހުރީ"

ފަރުވާ ކުރިއަށްދާގޮތް

ކެންސަރު ބައްޔަށް ފަރުވާ ހޯދުމަށް ފުރަތަމަ ޝަރުމީލާ ދިޔައީ އިންޑިއާގެ ޓްރިވެންޑްރަމްގެ އާރުސީސީ އަށެވެ. ފަރުވާއަށް ބޭނުންވާ އިންޖެކްޝަން އެހޮސްޕިޓަލަށް ގެނެވޭނެގޮތެއް ނެތިގެން ދެން ދިޔައީ ބެންގަލޫރުގައި ހުންނަ މަނީޕާލް ހޮސްޕިޓަލަށެވެ. 

" ނިއުކްލިއަރ ރޭޑިއޭޝަން އިންޖެކްޝަނެއް ޖަހަން ބުނީ. އެއީ ޖަރމަނީ އިން ގެންނައެއްޗެއް. އެ އިންޖެކްޝަން ގެންނަން ފުދޭވަރަކަށް ވަގުތުނަގާ. އެއްމަސްވެފަހުރީ އެފަހަރުވެސް އިންޖެކްޝަން ޖަހައިގެން ރާއްޖެ އާދެވުނުއިރު. މިހާތަނަށް 7 ފަހަރު އިންޑިއާ އަށް ދެވިއްޖެ ފަރުވާއަށް. 8 ވަނަ ފަހަރު ފުރަން މިއުޅެނީ މި ފެބުރުވަރީ މަހުގެ 10 ވަނަ ދުވަހު"

ޝަރުމީލާ ދަނީ ކީމޯތެރަޕީ ބޭސް ކަމުންނެވެ. އަދި ކޮންމެ މަހަކު ހޯމޯން އިންޖެކްޝަން ދަނީ ޖަހަމުންނެވެ. އަދި ކޮންމެ 3 މަހަކުން ސިސްޓްގެ ފަރުވާއަށް އިންޖެކްޝަން ޖަހަމުންދާ ކަމަށް ވަނީ ބުނެފައެވެ. ސިސްޓްގެ ފަރުވާއަށް މިއިންޖެކްޝަން ޖަހާތާވެސް 12 އަހަރު ވަނީއެވެ.

ދަރިފުޅު ލިބުނީ އުންމީދު ގެއްލިފަވަނިކޮށް

ޝަރުމީލާ ބުނިގޮތުގައި ޑޮކްޓަރުން ވެސް ބުނަމުންދިޔައީ ސިސްޓް ހުއްޓާ ބަނޑުބޮޑުވާނެ ކަމުގެ އުންމީދެއް ނެތް ކަމަށެވެ. އެހެންނަމަވެސް މާތް ﷲ ގެ އިރާދަފުޅުން ލިބުނު ދަރިފުޅަށް މިހާރު ވަނީ 15 އަހަރު ފުރިފައެވެ.

ބޭނުންވަނީ ލޯތްބާއި އެހީތެރިކަން

ޝަރުމީލާގެ މަންމައަކީ ވެސް 2018 ވަނަ އަހަރު ކެންސަރުޖެހި މިހާރު ބަލި ރަނގަޅުވެފައިވާ މީހެކެވެ. ވަރަށް ކުޑައިރު ބައްޕަ ނިޔާވެފައިވާއިރު، އާއިލާގައި އާމްދަނީ ލިބޭ މީހަކަށް ހަމައެކަނި ހުރީ އޭނާގެ ފިރިމީހާ ކަމަށް ވަނީ ބުނެފައެވެ. އެހެންވުމުން ރާއްޖެއިން ބޭރުން ތަކުރާރުކޮށް ބޭސްފަރުވާ ހޯދުމަކީ ވެސް ގޮންޖެހުންބޮޑު ކަމެކެވެ.

" ވަޒީފާއެއް އަސްލު ބޭނުންވެފަ މިހިރީ. ފިރިމީހާއަށް އެކަނި ލިބޭ އާމްދަނީގެ އިތުރަށް އެހީތެރިކަން ހޯދައިގެން މިދަނީ ފަރުވާއަށް. އާސަންދަ ހަމަޖެހުނަސް އިންޑިއާ އަށް ގޮސް ހުރުމާ ކެއުމާ އެތެރޭގެ ދަތުރުތަކަށް ބޮޑުއެއްޗެއް ހަރަދުވޭ. އާންމުކޮށް މަދުވެގެން 20 ދުވަސް ނޫނީ އެއްމަސް ފަރުވާ އަށް ހޭދަވޭ އިންޑިއާގަ"

ނިންމުން

ޝަރުމީލާ ފާހަގަކުރިގޮތަށް ބަލިމީހެއްވިއްޔާ އެހެން މީހުންގެ ލޯތްބާއި އަޅާލުމާއި އޯގާތެރިކަން ވަރަށްބޮޑަށް ބޭނުންވެއެވެ.

" ބަލި މީހަކު އެހީތެރިކަމަށް އެދުމުން އެމީހެއްގެ އަތުގައި ހުރި މިންވަރަކުން އެހީތެރިވެވިދާނެ. އެއްފަހަރަކު މީހަކު ދިން 50 ރުފިޔާ. އަސްލު އެއީ އެހީއަށް ބޭނުންވެފަ ހުންނަ މީހާއަށް ވަރަށްބޮޑު އެއްޗެއް. އެގޮތަށް ހިތްހެޔޮކަމާއެކު މީހުންނަށް އެހީތެރިކަން ފޯރުކޮށްދޭށޭ. ވަރަށް ރަނގަޅު މީހުންތިބިއިރު ހިތްހަރު މީހުންނާވެސް ދިމާވެފަ އެބަހުރި"

ކެންސަރ ސޮސައިޓީ އޮފް މޯލްޑިވްސްގެ ކެންސަރ ސަޕޯޓް ގުރޫޕަކީ ހުރިހާގޮތަކުން ވެސް ވަރަށްބޮޑު އެހީތެރިކަމެއް ފޯރުކޮށްދިނުމުގެ އިތުރަށް މިބަލިން އަރައިގަތުމަށް ކުރާ މަސައްކަތުގައި ލިބޭ ހިތްވަރެއްކަމަށް އިންޓަވިއު ނިންމާލަމުން ޝަރުމީލާ ވަނީ ފާހަގަކޮށްފައެވެ. "ޚާއްސަކޮށް ކެންސަރ ސޮސައިޓީގެ ރައީސް ޖުވޭރިޔާ ސަޢީދު އަދި އަޅުގަނޑުގެ ފިރިމީހާއާއި އާއިލާގެ އިތުރުން އެހީތެރިކަން ފޯރުކޮށްދޭ އެންމެންނަށް ހިތުގެ ފުންމިނުން ޝުކުރު އަދާކުރަން" ޝަރުމީލާ ބުންޏެވެ.

'ޒީޓައިމްސް' އިން އެދެނީ، ކެންސަރުގެ ފަރުވާއާއެކު ދިރިއުޅުން ކުރިއަށްގެންދިއުމުގައި ޝަރުމީލާ އަށް ދިމާވާ ގޮންޖެހުންތަކަށް ލުޔެއްލިބި، އަވަސް ޝިފާއެއް މިންވަރު ކުރެއްވުމެވެ.

ނޯޓް: ޝަރުމީލާ އާއި ގުޅޭގޮތުން އިތުރު މައުލޫމާތު ސާފުކުރެއްވުމަށް ގުޅުއްވާނީ 7986745