ދިވެހިންނަކީ ރޯދަމަހަށް ވަރަށް ގިނަ ތައްޔާރީތައްވާ ބައެކެވެ. މި އަހަރުގެ ރޯދަމަސް އަންނަން މަހަކަށްވެފައިވާއިރު މިހާރުން ފެށިގެން ބައެއް މީހުން އަންނަނީ ރޯދަމަހަށް ތައްޔާރުވަމުންނެވެ. ރޯދައަށް ކުރަނީ ކޮން ކަންތައްތަކެއްތޯ އަހާލުމުން ބައެއް މީހުން ބުނީ ގޭގައި ކުލަލަނީ ކަމަށެވެ. އަނެއްބަޔަކު ބުނީ ބާ ފަރުނީޗަރުތައް އާ ކޮށްލަނީ ކަމަށެވެ. އަނެއްބަޔަކު ބަދިގޭގައި ހިފާގެންގުޅޭ ސާމާނު އާ ކޮށްލަނީއެވެ. ބައެއް މީހުން ގޭގެ ފާރުތައް ދޮވެ ސާފުކުރަނީ އެވެ. އަދި ރޯދަ ކުރުކުރުމަށް ކުޅޭ ސާމާނުވެސް ހޯދާނެކަމަަށް ބައެއް މީހުން ބުނެއެވެ.
ފޯރީގައި ރޯދައަށް ތައްޔާރުވަމުން އަންނައިރު ބައެއް ދިވެހިން ތިބެނީ ވަގުތު ކުޑަތަންވީމާ ކަންކަން ކުރާށެވެ. އެކަހަލަ ބައެއް މީހުންނާވެސް ދިމާވެއެވެ. އެމީހުން ބުނާގޮތުގައި މާ އަވަހަށް ކަންކަން ފަށައިގަތީމާ ދިގުލައިގެންދާތީ ބޭނުންވަނީ ރޯދަމަހާއި ވީހާވެސް ކައިރިކޮށްފައި ގޭތެރެ ޒީނަތްތެރިކުރުމާއި ފަރުނީޗަރު ބަދަލުކުރުމަށް ކަމަށެވެ. ރޯދަމަހަށް ފިހާރަތަކުގައި ރޯދަ ސޭލް އަޅުވާއިރު ކޮންމެ އަހަރަކުވެސް އަންނަނީ ފިހާރަތަކުގެ ކިއުތައް ބޮޑުވަމުންނެވެ. ކޮވިޑަށްފަހު ލުއެއް ލިބެމުންއަންނަ މި ދަނޑިވަޅުގައި ފިހާރަތަކުން ސޭލް އަޅުވާތޯ ބަލަބާލާ ތިބޭ މީހުންވެސް މަދެއް ނޫނެވެ. ރަށްރަށުންނާއި މާލެއިންވެސް ގިނަބަޔަކު މި ސޭލްތަކަށް އިންތިޒާރުކުރެއެވެ.
ސޯފާ އާއި ބަދިގޭ އުނދުން ފަދަ ތަކެތި އާކުރަން ބޭނުންވާ މީހުންނާއިވެސް ދިމާވިއެވެ. އޭގެތެރެއިން ބައެއް މީހުންނަކީ ކޮންމެ ރޯދައަކަށްވެސް އާ ފަރުނީޗަރު ހޯދާ ބައެކެވެ. ތިޔައީ އިސްރާފެއް ނޫންތޯއޭ އަހާލުމުން މީހަކު ބުނީ ބޭނުންކޮށްފައި ހުންނަ ސޯފާ އެހެންމީހަކަށް ދެނީ ކަމަށެވެ. އެހެންކަމުން އެއީ އިސްރާފެއްގެ ގޮތުގައި ނުދެކޭ ކަމަށެވެ.
ބައެއް ޒުވާނުންނާއި މަޝްވަރާކޮށްލުމުން އެނގުނީ ރޯދައަށް ފުޓްސަލް މުބާރާތްތަކާއި ކުޅިވަރުގެ ކަންކަން ރާވަމުން އަންނަ ކަމަށެވެ. އެހެންކަމުން އެކަމަށް ބޭނުންވާތަކެތި ހޯދުމާއި ރޯދަމަހު ކުޅިވަރުގެ ފޯރިގަދަ ކުރުމަށް މަސައްކަތް ކުރަނީ ކަމަށެވެ. އަދި އަނެއްބަޔަކު އަންނަނީ ގޭގައި ކުޅޭނެ ރާޒުވާ ގޮނޑިއާއި، ކެރަމްބޯޑާއި ތާސްބައި ފަދަ ތަކެތި ހޯދުމަށް ތައްޔާރުވަމުންނެވެ. ރޯދަމަހު ރޯދަ ވަރުބަލި ފިލުވާލާ ހިތްހަމަ ޖައްސާލުމަށް ކޮންމެ އަހަރަކުވެސް މިފަދަ ކުޅިވަރުތައް ކުޅޭކަމަށް އެމީހުން ބުނެއެވެ.
ދެން ވާހަކަ ދައްކާލެވުނީ ތަފާތު ބަޔަކާއެކެވެ. އޭގެތެރޭގައި ގިނައީ ޒުވާން އަންހެނުންނެވެ. އެމީހުން ރޯދައަށް ތައްޔާރުވާ ގޮތް އެހެންމީހުންނާއި ތަފާތެވެ. އެމީހުން ބޭނުންވަނީ ބަރުދަން ލުއި ކުރުމަށެވެ. ޑައިޓެއް ފަށައިގެން ރޯދަމަހު ބަރުދަން ލުއިކޮށްލުމުގެ އަޒުމުގައި ތިބި މީހުންވެސް މަދެއް ނޫނެވެ. ކަސްރަތުކޮށްގެންނާއި މަދުން ކައިގެން ހަށިގަނޑަށް ލުއިކަމެއް ގެނެވޭތޯ އެމީހުން ރޯދަމަހު މަސައްކަތް ކުރާނެއެވެ. އެކަމަށް ތައްޔާރުވުމަށް ބައެއް މީހުން މިހާރުވަނީ ވޯމްއަޕް ކުރަންވެސް ފަށާފައެވެ. އެމީހުން ތިބީ ތެޔޮ ހެދިކާތައް ނުކައި ރޯދަމަހު ލުއި ގޮތަކަށް ކެއުން ގެންގުޅުމުގެ އަޒުމުގައެވެ.
ފިހާރަތައް ހިންގާ ބައެއް ފަރާތްތަކާއި ވާހަކަ ދައްކާލުމުން ބުނީ ރޯދަމަހަކީ ވިޔަފާރިއަށް ވަރަށް ބާރުބޮޑު މަހެއް ކަމަށެވެ. އެހެންކަމުން މި އަހަރުވެސް މަސައްކަތްކުރާނީ ވިޔަފާރި ރަނގަޅު ކޮށްލުމަށެވެ. އަދި ކަސްޓަމަރުން ބޭނުންވާ ހުރިހާ ސާމާނެއް ހުސްނުވެ އަބަދުވެސް ލިބެންހުންނަ ގޮތަށް ސްޓޮކުގައި ބެހެއްޓުމެވެ. ވިޔަފާރީގެ އަގުތަކަށް ބަދަލު އަންނާނެތޯ އަހާލުމުން ބައެއް ސޭޓުން ބުނީ އަގު ކަނޑައަޅާނީ މާރުކޭޓުގައި ތަކެތީގެ އަގުތައް ހުންނަ ގޮތަކަށް ބެލުމަށްފަހު ކަމަށެވެ.
ރޯދަމަހެއް އަންނަނަމަ ބައެއް ގޭގެއަށް ދުރާލާ ކޭސް ކޭހުންވެސް ކާބޯތަކެތި ގަނެއެވެ. ބައެއް މީހުން ގަންނަނީ ފިޔާ، އަލުވި، ކުކުޅު ބިސް ކޭސް، މަސްދަޅު ކޭސް، ގެރިކިރު ކޭސް، ޓޯމާޓޯ ޕޭސްޓް ކޭސް، އަލަނާސިދަޅު ކޭސް، އަދި ކަދުރުފަދަ ތަކެއްޗެވެ.
ރޯދަމަހަށް ދަނޑުވެރިންވެސް އަންނަނީ ތައްޔާރުވަމުންނެވެ. ރޯދައަށް ކަރާ ހެއްދުމާއި، ކޮޕީފަތާއި މިރުސް ފަދަ ތަކެތި ހައްދަނީ އެވެ. ބައެއްމީހުން ހަވާދު ހެދުމާއި އަސާރަ ހެދުމުގައި އަވަދިނެތި އުޅޭ ކަމަށްވެސް ފާހަގަވިއެވެ.
ދިވެހިންގެ އާދަކާދަ ހުންނަގޮތުން ރޯދައަށް މާހެފުން ބޭއްވުމަކީވެސް ވަރަށް ފޯރީގައި ކުރަމުން އަންނަ ކަމެކެވެ. ގުރޫޕު ގުރޫޕަށް މާހެފުން ބޭއްވުމާއި އާއިލީ މާހެފުމާއި އޮފީސް މާހެފުންވެސް ބާއްވައެވެ. މީގެ އިތުރުން ރޯދަ ހަދިޔާ ބަދަލުކުރުންވެސް އޮވެއެވެ. ބައެއް މީހުން ހަދިޔާގެ ގޮތުގައި ނަމާދުކުރާ މުސައްލައާއި ޤުރުއާން ޙަތިމާއި، ތަސްބީހަފަތި ފަދަ އެއްޗެހި ހަދިޔާ ކުރެއެވެ. އަނެއްބަޔަކު ކަދުރު ހަދިޔާ ކުރެއެވެ. ރޯދަމަސް އައުމުން ރެސްޓޯރެންޓުތަކަށް ރޯދަވީއްލަން ދިއުމާއި ގުރޫޕު ހަދާފައި ތަރާވީހު ނަމާދަށް ދިއުމަކީވެސް އޮންނަ އާދައެކެވެ. ބައެއްމީހުން ޤުރުއާން ހަތިމުކުރުން ފަދަ ކަންކަންވެސް ކުރެއެވެ.
ސްކޫލުތަކުން ރޯދައަށް ތައްޔާރުވަމުން އަންނަނީ ކިހިނެއްތޯ ބަލާލިއިރު ގިނަ ސްކޫލުތަކުން އަންނަނީ ޤުރުއާން މުބާރާތާއި މަދަހަ މުބާރާތައް ތައްޔާރުވަމުންނެވެ.
މިހުރިހާ ކަމެއްގެ އިތުރުން ރޯދައަށް އެންމެ ބޮޑަށް ތައްޔާރުވާންވީ ނަފްސެވެ. ރޯދަމަހަކީ އަޅުކަމުގެ މައްސަރެއް ކަމުން އިސްރާފު ކުރުން މަދުކުރުމާއި އަޅުކަންކުރުން ގިނަކުރުން މުހިންމެވެ. މިހާރުން ފެށިގެން ރޯދައަށްޓަކައި އަމިއްލަ ނަފްސްތައް ތައްޔާރުކޮށް، ދީނީ އަޅުކަންތަކާއިގެން މަސްއޫލުވެ އުޅުމަށްވުރެ ވަކިންބޮޑަށް ރޯދައަށް ވާނެ ތައްޔާރެއް ނެތްކަމަށްވެސް ބައެއް މީހުން ބުންޏެވެ. އެމީހުން ދެކޭގޮތުގައި ރޯދަމަހަކީ އަޅުކަން އިތުރުކޮށް މިސްކިތްތައް ފުރާލަންވީ މައްސަރެކެވެ.
