މާލޭގެ މަގުމައްޗަށް ކުނި އެޅުން އަނެއްކާވެސް މި ވަނީ އާންމުކަމަކަށް ވެފައެވެ. ކުނިވާޒާތުގެ ކުނިބުންޏާއި ކަރުދާސް ފޮށިގަނޑުފަދަ ތަކެތި ދުވާރުމަތީގަ އާއި ކާނުގަނޑު މަތީގައިވެސް ބަހައްޓާފައި ހުރެއެވެ. މާލެސިޓީ ކައުންސިލާއި ވެމްކޯއިންވެސް މާލެތެރެ ސާފުކޮށް ބޭއްވުމަށް ޚާއްސަ އިސްކަމެއް ދޭއިރު ރައްޔިތުންވެސް މި ކަމަށް އެއްބާރުލުން ދޭން އެބަޖެހެއެވެ. ކުނިބުނީގެ ސަބަބުން އުފެދޭ ބަލިމަޑުކަމާއި ނުތާހިރުކަން ކުޑަކުރުމަށް ފަރުދީޒިންމާ އަދާކުރުން ވަރަށް މުހިންމެވެ.
މާލޭގެ އެކި ސަރަހައްދުތަކުން ފެންނަނީ ގޭބިސީތަކާއި ބައެއް ފިހާރަތުން ނެރެފައިވާ ކުނިބުންޏެވެ. މި ގޮތަށް އަމަލުކުރާ ފަރާތްތަކުންވެސް ހިނގާބިނގާވެ އުޅޭ މީހުންނަށް މިކަމުން އުނދަގޫވާނެކަން އަމިއްލައަށް ވިސްނާ އެކަން ހުއްޓާލަން ޖެހެއެވެ. މާލޭގެ މަގުތައް ކުނިކަހާ ސާފުކޮށް ބޭއްވުމަށް ވެމްކޯގެ ގިނަ އަދަދެއްގެ މުވައްޒަފުން ރޭގަނޑުގެ ނިދި ނަގާލާފައި މަސައްކަތް ކުރެއެވެ. އަދި ގޭބިސީތަކާއި ކެފޭ ރެސްޓޯރެންޓާއި ފިހާރަތަކުން އުފެދޭ ކުނި ނައްތާލުމަށް ވެމްކޯއިންވެސް ކޮންމެ ދުވަހަކު މަސައްކަތް ކުރެއެވެ. އެހެންނަމަވެސް މަގުމަތީގައި ކުނި ބަހައްޓާ މަދުބައެއްގެ ސަބަބުން ފެނިގެންދަނީ ވިސްނުމާއި ފިކުރުގެ ނާތަހުޒީބު ކަމެވެ.
މަގުމައްޗަށް ކުނިއަޅާ އެތަކެއްޗާއި މެދު ޒިންމާވާނެ ފަރާތެއް ނެތި އެތައް ދުވަހެއް ވެގެންދާއިރު ބޮޑުވަމުން އަންނަ ޖީލަށް މި ދެވެނީވެސް ނުރަނގަޅު މެސެޖެކެވެ. ތޮއްޖެހުން ބޮޑު މާލޭގެ މަގުތަކުގައި ހިނގާމީހުންނަށް އޮންނަ ޖާގަވެސް އެހާމެ ކުޑައިރު މިގޮތަށް ދުވާރު މައްޗަށް ކުނި ނެރުމަކީ މަގުގައި ހިނގާ އެންމެންނަށްވެސް އެކަމުން ގެއްލުންވާ ކަންކަމެވެ. ވީމާ މިކަން ހުއްޓުވޭނީ އެކަން ކުރާ ފަރާތްތަކުން އަމިއްލައަށް އިސްލާހުވެގެންނެވެ. އަމިއްލައަށް އުފައްދާ ކުންޏަށް އަމިއްލައަށް ޒިންމާވެގެންނެވެ. މީހާ ތަހްޒީބުވާންވީ މިފަދަ ކަންކަމުގައެވެ. ވެމްކޯގައި ރަޖިސްޓްރީކޮށްގެ ކުނި އުކާ ނުލެވޭނަމަ އަމިއްލައަށް ވެމްކޯ ސައިޓަށްގޮސް ކުނި އުކާލުމުގެ ފުރުސަތުވެސް އޮވެއެވެ.
މާލޭގައި މަގުތައް ގޮނޑުވުން އާންމު ކަމެއް
މާލޭގެ އެކި ސަރަހައްދުތަކުގައި ކުނި ގިނަވުމުގެ މައްސަލައަކީ ވަރަށް އާންމުކޮށް ފެންމަތިވާ މައްސަލައެކެވެ. މިގޮތަށް ޖަމާކޮށްފައި ހުންނަ ކުނިތައް ބައެއްފަހަރަށް ނަގާ އުކާލާނީ މާލެ ސިޓީ ކައުންސިލުންނެވެ. ނުވަތަ އެސަރަހައްދުގައި ދިރިއުޅޭ ކޮންމެވެސް މީހަކަށް އުނދަގޫވެގެން ކުނިތައް ނަގާ ސާފު ކުރަނީއެވެ.
މާލޭގައި ކުނި ޖަމާކޮށްފައި ހުންނަ ބައެއް ސަރަހައްދުތަކުގެ ތެރެއިން ފާހަގަ ކުރެވުނު ބައެއް ތަންތަނުގެ ތެރޭގައި ގަލޮޅު ސްޓޭޑިއަމް ކައިރި (ބަނަފްސާ މަގު)ގެ މެދެއްހާ ހިސާބުގައި ޖަމާކޮށްފައި ހުންނަ ކުނި ފުންޏެއް ހުރެއެވެ. ނުބައިވަސްދުވާޒާތުގެ ކުންޏާއި ހުސްފޮށިގަނޑުތަކާއި ރަބަރު ކޮތަޅުތައް އެތަނުގައި ހުރެއެވެ. އަލިކިލެގެފާނު މަގު ކަޅުހުރާމަގާއި ގުޅޭ ހިސާބުގައިވެސް ކުނިތަކެއް ނެރެފައި ހުރެއެވެ. ބެލެވޭގޮތުގައި އެއީ ފިހާރައަކުން ނެރޭ ކުންޏެވެ. ބައެއްފަހަރު މި ކުނިތައް ހުންނަނީ ސައިކަލްތައް ޕާކްކުރަން އޮންނަ ޖާގައިގައި މަގުމަތީގައެވެ.
މާލޭގެ ނީލަންފިހާރަ ކައިރީގައިވެސް ކުނިތައް ޖަމާކޮށްފައި ހުރެއެވެ. ނީލަން ފިހާރަ ސަރަހައްދު ކުނިގޮނޑަކަށްވެފައި ވަނިކޮށް މި ހަފްތާގައި މާލޭ ސިޓީ ކައުންސިލުން ވަނީ އެތަނުން ކުނިތައްނަގާ ސާފުކޮށްފައެވެ.
މިގޮތަށް ކުނި ޖަމާކޮށްފައި ހުންނަ ތަންތަނުން ބުޅަލާއި މީދާ ފަދަ އެއްޗެހި ވަރަށް އާންމުކޮށް ކުނިކޮތަޅުތައް ފަޅާ މައްސަލަވެސް އެހާބޮޑެވެ. މިކަންކަން ހުއްޓުވުމަށް އެންމެން އެއްބާރުލައިގެން މަސައްކަތްކުރާނަމަ މާލެސިޓީ ވެގެންދާނީ ސާފުތާހިރު ސިޓީއަކަށެވެ. މީގެ އިތުރުން މަގުމަތިން ދާއިރު މަގުމައްޗަށް އެއްލާލާ ސިނގިރޭޓް ފިލްޓަރާއި ބޭނުންކޮށްފައި ހުންނަ ޕްލާސްޓިކް ކޮތަޅާއި ޓިޝޫ އަދި ސުޕާރީ އާއި ފޯއް ހުސްކުރި ރަބަރު ޕެކެޓާއި ސިނގިރޭޓް ފިލްޓަރު ފަދަ ތަކެތި ބިންމައްޗަށް އެޅުމުގެ ބަދަލުގައި އެންމެކައިރީގައި ހުންނަ ޑަސްޓްބިނަކަށް އަޅަން އާދަކުރަމާތޯއެވެ. އަދި އަމިއްލައަށް އުފައްދާ ކުނި އުކާލާނެގޮތް އެންމެ ތުއްތު ކުއްޖާއަށްވެސް ބުނެދީ ފަރުދީޒިންމާ އަދާކުރުމުގައި ފަރުވާތެރިވުމަށް ކުދިން ހޭނުވުން މުހިންމެވެ.
