އޯޓިޒަމްގެ އުނދަގޫތައް ތަހައްމަލުކުރަމުންދާ ކުދިންގެ މައިންބަފައިން ދަރިންނަށްޓަކާ ނުކުރަނީ ކޮންކަމެއް ހެއްޔެވެ. މިއީ މާލޭގައި ދިރިއުޅޭ ފިޒްނާ ހުސެއިން އާއި އޭނާގެ ފިރިމީހާ އެދެމަފިރިންނަށް ފުރަތަމަ ލިބުނު އެއްމާބަނޑު ދެދަރިންގެ ތެރެއިން ދަރިއަކަށްޓަކައި ވަމުންދާ ގުރުބާނީ އެވެ. ނިމިގެންދިޔަ ރަމަޟާންމަހުވެސް ފިޒްނާ ހުރީ ފަންޑުފޮށި ހިފައިގެން ނިކުމެ ދަރިފުޅުގެ ފަރުވާއަށް ބޭނުންވާ ޑޮލަރު ހަމަކުރެވޭތޯ މަގުމަތީގައެވެ.
މިސްކިތްތައް ކައިރިންނާއި ޕާކުތަކާއި އަތިރިމަތީ މައިޒާން ތަކުންވެސް ފަންޑުފޮށި ފެނުމުން ހިތަށް ފުން އަސަރުކަތެއް ކުރިއެވެ. ވެގެން އުޅޭގޮތެއް އަހާލުމުން އޭނާ ބުނީ މިއީ ދަރިފުޅުގެ ފަރުވާއަކަށް ބޭނުންވާ ފައިސާ ހަމަކުރުމަށް އާންމުންގެ ދީލަތި އެހީއަށް އެދެނީ ކަމަށެވެ.
މިއަދު ފިޒްނާ އެ ޤުރުބާން ވަނީ އޭނާގެ 7 އަހަރުގެ ދަރިފުޅު އައިޝަތު ރައްޔާ ހަމްދޫން އަކީ އެކަނި އަމިއްލަ ކަންކަން ކޮށްގެން އުޅެވޭވަރުގެ ދަރިއަކަށް ހެދޭތޯއެވެ. މިއީ ފިޒްނާގެ ހިތުގެ ހާލިސް ދުޢާއެވެ.
ރައްޔާ އަކީ އުފަންވިތާ 7 މަސްފަހުން ފިޓް ޖެހެން ފެށި ކުއްޖެކެވެ. ކައިރި ކައިރީގައި ފިޓް ޖެހުމުގެ ސަބަބުން އޭނާގެ ސިކުނޑީގެ ނާރުތަކަށް ވަރަށް ބޮޑަށް ގެއްލުންވެފައިވާ ކަމަށް ޓެސްޓުތަކާ ހަވާލީ ޑޮކްޓަރުން އޭރު ވިދާޅުވިއެވެ. ފިޓް ޖެހޭތީ ހުއްޓާނުލާ އެކަމަށް ބޭސް ދިނުމަށްވެސް ޑޮކްޓަރުން ލަފާ ދެއްވިއެވެ. އޭރުންސުރެ މިއަދާހަމައަށްވެސް ފިޓް ޖެހޭތީ ދޭ ބޭހެއް ކަމުގައިވާ 'ވަލްޕަރިން 200 ސިރަޕް' ރައްޔާއަށް ދެއެވެ.
ރައްޔާގެ މަންމަ ބުނީ ފިޓް ޖެހުނު ފަހުން އާދަޔާޚިލާފު ބަދަލުތަކެއް ދަރިފުޅުގެ ކިބައިން ފެންނަށް ފެށިކަމަށެވެ. ނިދި މަދުވުމާއި ކުރިއަށްވުރެ ގިނައިން ރޮއި ބޮޑާހޭކުން ފަދަ ކަންކަންވެސް ފާހަގަވާން ފެށިއެވެ. އަދި ކުރިއާ ޚިލާފަށް ރުޅިގަދަވުމާއި، މީހަކު ރައްޔާއާއި ވާހަކަދެއްކިޔަސް އަޅާނުލުމާއި އެހެންމީހުންގެ އަޑުތަކަށް ސަމާލުކަން ނުދިނުން ފަދަ މައްސަލަތައް ކުރިމަތިވުމުން 10 މަހުގައި ޑޮކްޓަރަށް ދެއްކިއެވެ. އެހިސާބުން ތުއްތު ރައްޔާއަކީ އޯޓިޒަމް ސްޕެކްޓްރަމް ޑިސޯޑާރ ހުންނަ ކުއްޖެއްކަން އޭނާގެ މައިންބަފައިންނަށް އެނގުނެވެ.
ރައްޔާގެ ހާލަތު 'ޒީޓައިމްސް'އާއި ހިއްސާކުރަމުން އޭނާގެ މަންމަ ފިޒްނާ ބުނީ "ނަން ގޮވީމަވެސް ނުބެލުމާއި، އެއްވެސް ވަރަކަށް ބަސް ނުކިއުމާއި، ގިނަ އަޑުތަކަށް ބިރުގަތުން ފަދަ ކަންކަން ފާހަގަވާން ފެށީ ރައްޔާއަށް 10 މަހުގަ، ދެން ސައިކޮލޮޖިސްޓަކަށް ދައްކައިގެން އޭރުންސުރެ މިއަދާ ހަމައަށްވެސް މި އަންނަނީ ތެރަޕީތައް ދެމުން" ކަމަށެވެ.
ރައްޔާގެ ތެރަޕީއަށް މަހަކު ތިރީސް ހާސް ހަތަރުސަތޭކަ ރުފިޔާ ހޭދަވާ ކަމަށް ފިޒްނާ ބުންޏެވެ. ރައްޔާއަށް ދެމުން އަންނަ ހަތަރު ތެރަޕީއަކީ، ސްޕީޗް ތެރަޕީ އާއި އޮކިއުޕޭޝަނަަލް ތެރަޕީ އާއި ސްޕެޝަލް އެޑިއުކޭޝަން ތެރަޕީ އާއި ބިހޭވިއާ ތެރަޕީ އެވެ. މީގެ ތެރެއިން އޮކިއުޕޭޝަން ތެރަޕީއަށް ހަފްތާއަކު ތިން ދުވަހަށްވާ ފައިސާގެ އެއްބައި އާސަންދައިން ހަމަޖައްސައިދެއެވެ. މި ތެރަޕީއަށް އާސަންދަނުލާ އަމިއްލަ ޖީބުން 4000 ރުފިޔާ ކޮންމެ މަހަކު ހޭދަކުރަން ޖެހެއެވެ.
ތާޖުއްދީނު ސުކޫލުގެ ގްރޭޑް އެކެއްގައި ތައުލީމު ހާސިލް ކުރަމުން އަންނަ ރައްޔާ ވަނީ ފެބްރުއަރީ މަހު ސްޓެމްސެލް ތެރަޕީ (ނިއުރޯ ރިޖެނެރޭޓިވް ރިހެބިލިޓޭޝަން ތެރަޕީގެ) ފުރަތަމަ ޝޮޓް ނަގާފައެވެ. އޯޓިޒަމް ކުދިންގެ އުނދަގޫތަކަށް ލުއިތަކެއް ހޯދޭކަމަށް ބުނާ މި ފަރުވާ ހޯދީ ފަންޑްރައިޒިން ހަރަކާތްތަކާއި ޖަމްބަލް ސޭލް އާއި ނައިޓްމާކެޓްގައި ސްޓޯލެއް ބަހައްޓައިގެން އެއްކުރި ފައިސާއާއި އާއިލާ އާއި ރައްޓެހިންގެ ފަރާތުން ލިބުނު ދީލަތި އެހީއާއެކު އިންޑިއާގެ ނިއުރޯޖެން ބްރެއިން އެންޑް ސްޕައިން އިންސްޓިޓިއުޓުންނެވެ.
ރައްޔާގެ އެއްމާބަނޑު އަންހެން ދައްތަގެ އިތުރަށް ރައްޔާއަށްވުރެ 3 އަހަރު ހަގު ފިރިހެން ކޮއްކޮއެއް ހުރެއެވެ. އެކުދިން އުޅޭހެން މަޖާކޮށް އުޅުމަށް ރައްޔާވެސް ބޭނުންވެއެވެ. އެހެންނަމަވެސް އޭނާގެ ބޭނުންތައް ބުނެދޭން ނޭނގުމާއި ވާހަކަ ނުދެއްކުމަކީ އޭނާގެ މައިންބަފައިންގެ ލޯތަކުން ކަރުނުން ތެއްމާލާ ހިތް ރޮއްވާލާ ވަގުތުތަކެކެވެ. ގެއިން ބޭރަށް ގެންދިއުމުން ގެއަށް އަންނަ ހިތް ނުވުމާއި ގަދަކަމުން ރޮއްވާލައިގެން ގެއަށް ގެންނަން ޖެހުމުން އޭނާގެ މައިންބަފައިންނަށް ވަރަށް އަސަރު ކުރުވައެވެ.
ސްޓެމްސެލް ފަރުވާގެ ފުރަތަމަ ބުރު ފުރިހަމަ ކުރުމަށްފަހު ދެވަނަ ބުރަށް ފުރުމަށް ވަގުތު ކުޑަތަންވެފައިވާތީ ފިޒްނާ އާއި އާއިލާއިން އަދި ރައްޓެހިން އަންނަނީ ފައިސާ އެއްކުރުމަށް އެކި ހަކަރާތްތައް ބާއްވަމުންނެވެ. މިފަހަރު ގަސްތު ކުރަނީ ސެންޓްރަލް އެމެރިކާގެ ގައުމެއް ކަމުގައިވާ ޕެނަމާއަށް ފަރުވާއަށް ދިއުމަށެވެ.
" އިންޑިއާ އިން މި ފަރުވާއަށް ހޭދަވާނީ 8200 ޑޮލަރު. އެކަމަކު މިފަހަރު އަޅުގަނޑުމެން މިބަލަނީ ޕެނަމާއަށް ދެވޭތޯ. އެތަނުގެ ސްޓެމްސެލް އިންސްޓިޓިއުޓް މާ އެޑްވާންސްވީމަ އާއި އެހާދުރު ގައުމަކަށް ދާތީ އަޅުގަނޑުމެން މަސައްކަތްކުރަނީ 16400 ޑޮލަރު ހޯދުމަށް. ދިވެހި ރުފިޔާ އިން ދެލައްކަ ފަންސާސް ދެހާސް އަށްސަތޭކަ އަށްޑިހައަށްރުފިޔާ އެއީ". ފިޒްނާ ބުންޏެވެ.
ސްޓެމްސެލް ޓްރީޓްމެންޓްގެ ފުރަތަމަ ބުރުން ރައްޔާއަށް ކުދިކުދި ބަދަލުތައް އަންނަކަން ފާހަގަކުރަމުން ފިޒްނާ ބުނީ ގެއިން ބޭރުގައި އުޅޭއިރު ގެއަށްދާ ގަނޑި ޖެހުމުން ރޮއްވާލައިގެން ކުރިން ގެނައިނަމަވެސް މިހާރު އެކަން ހައްލުވެއްޖެ ކަމަށެވެ. މޫދަށް އެރިއްޖެއްޔާ ނޫނީ ގޮނޑުދޮށުގައި ކުޅުންފަދަ ކަމެއްގައި އުޅުނަސް ކުރިން ގެއަށް ގެންދަން ޖެހޭނީ ގަދަކަމުން ރޮއްވާލައިގެން، މިހާރު ހަމަ ހޯމް ޓައިމް އޭ ބުނާއިރަށް އެއްވެސް މައްސަލައެއް ނުޖައްސާ އަންނާނެ، ދެން އަނެއް ބަދަލަކީ ކަމެއް ބޭނުންވީމަ މިހާރު ދެބަސްވަރު ބުނާނެ. ކުރިން އަމިއްލައަކަށް އެންމެ ބަހެއްވެސް ނުކިޔާނެ" ފިޒްނާ ބުންޏެވެ.
ރައްޔާއަށް އެހެން ކުދިންގެ ތެރޭގައި އުޅެން ވަރަށް އުނދަގޫވެއެވެ. އަޑުގަދަވިޔަސް ބާރަށް ރޮއި ހަދައެވެ. މީހުންގެ ތެރޭގައި އުޅޭއިރު ރައްޔާ ބޭނުންވަނީ އެހެންމީހުންނާ އެކަހެރިވެގެން މާ ދުރުގައި އިންނާށެވެ. މި ކަންކަމުން ރައްޔާއަށް އަރައިގަނެވޭތޯ ދެވެން އޮތް ފަރުވާއެއްވިއްޔާ އޭނާގެ މައިންބަފައިިން އަންނަނީ ހޯދައިދެމުންނެވެ.
ފަރުވާގެ ފުރަތަމަ ބުރުން ރައްޔާއަށް ބަދަލުތައް އައިކަން ޝުކުރުވެރިކަމާއެކު ފާހަގަކުރަމުން ފިޒްނާ ބުނީ މިހާރުވެސް ދަރިފުޅު ރޭގަނޑު ނިންދަވަން އުނދަގޫވުމާއި ނިދި މަދުވުމުގެ މައްސަލަ ދިމާވާކަމަށެވެ. މިކަމަށް އަދި ބަދަލެއް ނައިކަމުގައިވިޔަސް ސްޓެމްސެލް ތެރަޕީގެ ފުރަތަމަ ބުރުން ރައްޔާގެ ބިހޭވިއާގެ ވަރަށް ގިނަ މައްސަލަތައް ރަނގަޅުވަމުން އަންނަ ކަމަށް ފިޒްނާ ބުންޏެވެ.
"އެހެން މީހެއްގެ އެހީއާއި ނުލާ އަމިއްލަ ކަންތައް ކޮށްލެވޭ ކުއްޖަކަށްވާނެ ދުވަހެއް ވަރަށް ދެކެން ބޭނުން. ދަރިފުޅުގެ ފަރުވާއަށް އެހީވެދޭ ހުރިހާ އެންމެންނަށް ތިޔަކޮށްދެއްވާ ހެޔޮކަމަށް އަބަދުވެސް ހިތުގެ އަޑިން ޝުކުރު އަދާކުރަން" ފިޒްނާ ބުންޏެވެ.
ރައްޔާއަށް އެހީތެރިވުމާ ގުޅޭގޮތުން އިތުރު މައުލޫމާތު ސާފުކުރެއްވުމަށް ގުޅުއްވާނީ:
ފިޒްނާ ހުސައިން: 9846664
އެކައުންޓް ނަންބަރު: ފިޒްނާ ހުސައިން 7730000336881 (ރުފިޔާ)
7730000429719 (ޑޮލަރު)
