ދަރިންނަކީ ބޮޑުވެގެންވާ އަމާނާތެކެވެ. މިއަދުގެ ހުކުރު ޚުތުބާގައި ވަނީ ދަރިންނާ ގުޅޭގޮތުން މާތް ﷲ އަހުރެމެންނަށް ކުރައްވާފައިވާ ވަސިއްޔަތަށް ރައްކާތެރިވުމަށް ހަނދާންކޮށްދީފައެވެ.
މާތް ﷲ ރުއްސުންލެއްވި އަލީގެފާނު ވިދާޅުވެފައިވެއެވެ. "ތިޔަބައިމީހުންގެ ނަފްސުތަކަށާއި ދަރީންނަށް ހެޔޮކަންތައްތައް އުނގަންނައިދޭށެވެ. އަދި އެކުދިން އަދަބުވެރި ކުރުވާށެވެ.
ދަރިންނަކީ ބޮޑުވެގެންވާ ނިޢުމަތެކެވެ. އެއީ އެކުދިންގެ ސަބަބުން ލޮލަށް ފިނިކަން ލިބޭތީއެވެ. ކުރިމަގު އުޖާލާވާތީއެވެ. ޙަޔާތް ބާއްޖަވެރިވާތީއެވެ. މައިންބަފައިން އެމީހުންގެ ދަރިން ތަފާތު ބަލިތަކުން ހިމާޔަތްކުރުމަށާއި، ހަށިގަނޑުގެ ދިފާޢީ ބާރު ވަރުގަދަކުރުމަށް، ވެކްސިންޖަހައި، އޭގެ ޑޯޒުތައް ފުރިހަމަ ކުރެއެވެ. ވާބައްޔާއި، އިދިފުށަށް ދަމާ ބައްޔާއި، ހޯއްގޮވާ ކެއްސުމާއި، ހިމަބިއްސާއި، ކެއްސުންބަލި ފަދަ ބަލިތަކުން ރައްކާތެރިކަން ހޯދައިދިނުމަށެވެ.
ދަރިން، ދުނިޔަވީ ބަލިތަކާއި އާފާތްތަކުން ރައްކައުތެރިކުރަން މަސައްކަތްކުރާ ފަދައިން، އައްތަޙްރީމު ސޫރަތުގެ ހަވަނަ އާޔަތުގައި، މާތް ﷲ އަންގަވާފައިވާ ގޮތަށް، އެދަރިން ނަރަކައިން ސަލާމަތް ކުރުމަށް އެކަށީގެންވާ މަސައްކަތެއް ކުރެވޭބާވައެވެ. އެކުދީން އިލްޙާދާއި، ލާދީނިއްޔަތުން ސަލާމަތްކުރުމަށް، ރަނގަޅު ދީނީ ތަޢުލީމެއް ދެވޭ ބާވައެވެ.
ބައެއް މައިންބަފައިން މިއަދު ދައްކާ ވާހަކައަކީ، އެމީހުންގެ ދަރީން ކުއްލިއަކަށް ނަމާދާ ދުރުހެލިވާ ވާހަކައެވެ. ފޯނާއި ކޮމްޕިޔުޓަރު ފަދަ ޒަމާނީ ވަސީލަތްތަކުގެ ތެރެއަށް ގެނބި މާތް ﷲ ހަރާމް ކުރެއްވި ކަންތައްތަކަށް އަރައިގަންނަމުންދާ ވާހަކައެވެ. ކުއްލިއަކަށް މާބޮޑަށް މިނިވަންވެ، މައިންބަފައިންނަށް ނުވެސް އެނގި ހަޔާތުގެ ބައިވެރިޔަކު ހޯދުމުގެ މަސައްކަތް ފަށާ ވާހަކައެވެ. މިފަދަ ގޮތެއް ކުދިންނަށް ވަނީ އެކުދިން ހިމާޔަތް ކުރުމަށް އަޅަންޖެހޭ ހަރުދަނާ ފިޔަވަޅުތައް ނާޅާތީއެވެ.
"މިކަމަށް އަޅަންޖެހޭ ފުރަތަމަ ފިޔަވަޅަކީ، އީމާންކަމުގެ ތަރުބިއްޔަތު ދިނުމުގެ ފިޔަވަޅު. މި ތަރުބިއްޔަތު ދޭންވާނީ އޯގާވެރިކަމާއި ލޯތްބާއިއެކު. ޅަދަރީން ލައްވާ ގަދަކަމުން ނަމާދުކުރުވައި، ރޯދަހިއްޕުވާ ނަމަ އެކުދިން އެކަންކަން ކުރާނީ ކުރާ ހިތަކުން ނޫން. އިސްލާމް ދީން ގޮވާލަނީ އޯގާވެރިކަމާއި، ލޯތްބާއި ކުލުނާއެކު ދަރިންނަށް ދީނީ ތަރުބިއްޔަތު ދިނުމަށް. ކީރިތި ރަސޫލާ އަންގަވާފައިވަނީ، 7 އަހަރުގައި އެކުދިންނަށް ނަމާދު ކުރުމަށް އަމުރު ކުރުމަށް. ރިވެތި ނަމޫނާ ދައްކައިގެން އެކުދިން ތަރުބިއްޔަތު ކުރުމަށް".
ބައެއް ފަހަރަށް ދަރިން ބޭނުންވާ ކޮންމެ އެއްޗެއް ހޯދައިދޭއިރު، ދަރިންނަށް ތިލަފަތްހަމަ ތަރުބިއްޔަތެއް ދިނުމަށް ފަރުވާލެއް ނުބަހައްޓައެވެ. ދަރިންނަށް އުނގަންނައިދޭންޖެހޭ ކަންތައްތަކުގެ ތެރޭގައި ޤަޟާޤަދަރަށް އީމާންވުމާއި، ތެދުބަސް ބުނުމަށް އާދަކުރުވުން ހިމެނެއެވެ.
ދަރިންނަށް ރަނގަޅު ތަރުބިއްޔަތެއް ދިނުމަށް ހަރުކަށިކަމާއި ހިތްހަރުކަމާ ދުރުވާންޖެހެއެވެ. އަދި ޢަމަލީ ގޮތުން ހެޔޮ ނަމޫނާ ދައްކާ، ލޯތްބާއި އޯގާވެރިކަމާއި، ކުލުނުގެ ވެއްޓެއްގައި ދަރީން ތަރުބިއްޔަތު ކުރުމަށް މަސައްކަތްކުރަންޖެހެއެވެ.
މައުލޫމާތު: ހުކުރު ޚުތުބާ
