ރާއްޖޭގެ ފުރަތަމަ ސްމާޓް ސިޓީ އަށް ހުޅުމާލެ ހެދުމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ދަނީ ގިނަ ގުނަ މަސައްކަތްތަކެއް ކުރަމުންނެވެ.
އެޗްޑީސީގެ ސްމާޓްކޮމް ބްރޭންޑްގެ ދަށުން ކުރިއަށްގެންދާ ސްމާޓް ސިޓީ ތަސައްވުރުގެ އެންމެ ބޮޑު މަޤުސަދަކީ ހުޅުމާލޭގައި ތިމާވެށި ދެމެހެއްޓެނިވި ގޮތެއްގައި ބެލެހެއްޓުމަށް ކުރަންޖެހޭ މަސައްކަތް ކުރުމެވެ.
މިއަހަރު މާރިޗް މަހުގެ 31 ވަނަ ދުވަހު ހުޅުމާލޭ ސެންޓްރަލް ޕާކުގައި ވަނީ ސްމާޓް ޕޯލް އަދި ސްމާޓް ބެންޗެއް ބަހައްޓާފައެވެ.
ސްމާޓް ޕޯލް އިން ލިބޭ ޚިދުމަތަކީ ކޮބާ؟
- ސްމާޓް ޕޯލް އަކީ އިރުގެ އަލި އަދި ވައިގެ ޒަރީއާއިން އިޔާދަ ކުރަނިވި ހަކަތަ ބޭނުންކޮށްގެން ދިއްލޭ ޕޯލްއެކެވެ. ސްމާޓް ޕޯލް މެދުވެރިކޮށް މިފަދަ ދިއްލުންތަކުގެ ކަރަންޓު ބޭނުންކުރެވޭ މިންވަރު 90 އިންސައްތަ ކުޑަ ކުރެވިގެން ދާނެއެވެ.
- ސްމާޓް ޕޯލް މެދުވެރިކޮށް ޕަބްލިކް ވައިފައި، ސެކިއުރިޓީ ކެމެރާ، އައިއޯޓީ ސެންސަރ އަދި މުހިއްމު އާންމު މައުލޫމާތާއި، ޕަބްލިކް އެނައުންސްމެންޓްތައް ފޯރުކޮށްދެވުމުގެ އިތުރުން ޑިޖިޓަލް އިސްތިހާރުތައް ދެއްކުން ފަދަ ގިނަ ޚިދުމަތްތަކެއް ފޯރުކޮށްދެވޭނެއެވެ.
- ކަރަންޓުގެ ޚިދުމަތް ކެޑިގެންދާ ވަގުތުގައި މި ޕޯލްތަކުގައި ހިމެނިފައިވާ ބެޓެރީ ސްޓޯރޭޖްއިން ބޮކި ދިއްލުމާއި ކެމެރާ ފަދަ ޚިދުމަތް ލިބިގެންދާނެއެވެ.
ސްމާޓް ބެންޗް އިން ލިބޭ ޚިދުމަތަކީ ކޮބާ؟
- ސްމާޓް ބެންޗް އަކީ އޭގެ ޒަރީއާއިން ގިނަ ޚިދުމަތްތަކެއް ފޯރުކޮށްދެވޭ އެއްޗެކެވެ. މިގޮތުން އާކިޓެކްޗުރަލް ލައިޓިން، ޔޫއެސްބީ ނުވަތަ ވަޔަލެސް ޗާޖިން ޕޮއިންޓްސް އަދި އިލެކްޓްރިކަލް ބައިސިކަލް އަދި ވީލްޗެއަރ ފަދަ ތަކެތީގެ ޗާރޖިންގ ސްޓޭޝަންސް މީގެތެރޭގައި ހިމެނެއެވެ.
ރާއްޖޭގައި ފުރަތަމަފަހަރަށް މި ގާއިމްކުރެވުނު ސްމާޓް ޕޯލް އަދި ސްމާޓް ބެންޗް އަކީ ޒަމާނީ ގޮތަކަށް ރީތިކޮށް ފަރުމާ ކުރެވިފައިވާ އޮމްނިފްލޯގެ އުފެއްދުމެކެވެ.
އެޗްޑީސީ އިން މައުލޫމާތުދޭގޮތުގައި ސްމާޓް ޕޯލް އަދި ސްމާޓް ބެންޗަކީ ދެމެހެއްޓެނިވި ގޮތެއްގައި ސްމާޓް ސިޓީތައް ތަރައްގީ ކުރުމުގަ މުހިއްމު ރޯލެއް އަދާކުރާނެ ވަސީލަތްތަކެކެވެ. ތިމާވެށީގެ ރައްކާތެރިކަމަށް ބަލައިގެން ޓެކްނޮލޮޖީގެ ޒަރީއާއިން ގެނެވޭ މިފަދަ ކަންތައްތަކަކީ އިޤުތިސާދީ، އިޖުތިމާއީ، ސަސްޓެނަބަލް އަދި ކާމިޔާބު ހައްލުތަކަށް ވެގެންދާނެ މުހިއްމު މަސައްކަތެއް ކަމަށް ވަނީ ފާހަގަކޮށްފައެވެ. އަދި މީގެ ސަބަބުން ދިގު މުއްދަތެއްގައި ހުޅުމާލެ ފަދަ އާބާދީ ބޮޑު އަރބަން ސިޓީތަކުގެ ތިމާވެއްޓަށް ހެޔޮ ބަދަލުތަކެއް އަންނާނެ ކަމަށް އެ ކޯޕަރޭޝަނުން ލަފާކުރެއެވެ.
