އޭޕްރީލް 21 ވަނަ ދުވަހު ހަސަން އަނިލް އަސުރުން ފައިބައިގެން ދިޔައީ ގެއަށް ބޭނުންވާ ބައެއް ކާބޯތަކެތި ހޯދަން މާރުކޭޓަށެވެ. އެއްޗެހި ގަނެގެން ގޭ ކައިރިއަށް އައިސް ސައިކަލް ޕާކްކޮށްލަން މަޑުކޮށްލިއިރު ފެނުނީ ގެއާއި އިންވެގެން ހުރި ގަރާޖުތެރޭގައި ހުރި ސައިކަލެއްގައި ހުޅުހިފިތަނެވެ.
"އަޅުގަނޑުގެ ސައިކަލު ގެންގޮސް ޖަމާލުއްދީން ސުކޫލު ގޯޅިތެރޭގައި ބަހައްޓާފަ އަވަހަށް ދުވެފަ އައީ ގެއަށް. އަންހެނުން ކައިރި ބުނީ ރޯވެއްޖެއޭ އަވަހަށް ނިކުންނާށޭ. އޭރު ބަދިގެތެރޭގައި ހުސް ދުން. އަންހެނުން ކިޔައިފި ދަރިފުޅު އެބައޮތޭ ނިދާފަ. ކޮޓަރި ހުޅުވައިގެން އޭނަ ދަމާ ނެރެގެން ދޮރުން ނުނިކުމެވޭ ގޭ ކުރިމަތީގަ އިން ސައިކަލު ގޮވީ. އަޅުގަނޑުމެންނަށް ހަމަ ކިރިޔާ ނިކުމެވުނީ. ނިކުތް ވަގުތު ބަދިގެއާ ދިމާލުން އެއާކޯން ގޭސް ކަންނޭންގެ ގޮވައިގެން ހުޅުގަނޑު އޭރު ވަންނަނީ ގެއަށް" ހަސަން އެދުވަހުގެ މަންޒަރު ފެނުނުގޮތް 'ޒީޓައިމްސް' އާއި ހިއްސާކުރިއެވެ.
އޭރު ގާތްގަނޑަކަށް ހަވީރު 4:17 އެވެ. އެއްކޮޓަރިއާއި ބަދިގެ އަދި ހުސް ތަންކޮޅެއް އޮންނަ ގޭގައި ދިރިއުޅެނީ އެ ދެމަފިރިންނާ 3 ދަރިންނެވެ. އޭރު ދޮށީ ދަރިފުޅުވީ އޮފީހުގައެވެ.
ދެވަނަ ދަރިފުޅު އެއާޕޯޓްގައި ޑިއުޓީ އަދާކުރުމަށްފަހު މެންދުރުފަހު ގެއަށް އައިސް އޮތީ ނިދާށެވެ. ހަގު އަންހެން ދަރިފުޅުވީ ޖިމްގައެވެ.
އެއާއިލާއިން ރޯދައަށް ބަދިގޭގައި ކުލަލާ ކަބަޑުސެޓް އާކޮށް ދެދޮރުފަތްލީ ބޮޑު އައިސް އަލަމާރި އާއި ރައިސް ކުކަރާއި ފެންކައްކާ ޖަގުން ފެށިގެންގޮސް ކާ މޭޒާއި ތަށި ސަމުސާ އަދި ފެންބޯ ތައްޓަށް ދަންދެން އާކުރިއެވެ.
"ބަދިގޭގައި ރޯދަވީއްލަން އެއްޗެއް ތައްޔާރުކުރަން ހުއްޓާ ވަރަށް ބާރަށް އެއްޗެއް ވެއްޓުނު އަޑު އިވުނީ. އަޑުފައްގަނޑަށް ބަދިގެއިން ނިކުމެ ނިކުމެ ހުއްޓާ ފެނުނީ ކަރަންޓް ކެނޑެމުން ކެނޑެމުން ދިޔަތަން. ކަރަންޓް ބޯޑާއި ހަމައަށް ދިޔަތަނާ، ފިރިމީހާ އައިސް ބުނީ ރޯވެއްޖެއޭ އަވަހަށް ނިކުންނާށޭ. ދެން ދޮރުން ބޯ ދިއްކޮށްލިއިރު ފެނުނީ ސައިކަލުގައި ރޯވެފަ އޮއްވާ. ހަމަ ކިރިޔާ ދަރިފުޅު ހޭލައްވައިގެން ނިކުމެވުނީ. ކުޑަތަންކޮޅެއް ލަސްވި ނަމަވެސް އަޅުގަނޑެއް ނުފެންނާނެ. ދަރިން ތިބީ ޝޮކުގަ. ލޯކުރިމަތިން ގެ އަނދައިގެންދާތަން ބަލަން ތިބެވުނީ ހަމަ ރޮވިފަ" ޒަހީރާ ކިޔައިދިނެއެވެ.
ގެއާ ޖެހިގެން ހުރީ ކުއްޔަށްދީފަ ހުރިތަނުގައި ހަދާފަހުރި ގަރާޖެކެވެ. އެތަނުގައި އެއާކޮންޑިޝަން ގޭހާއި ޕެޓްރޯލްވެސް ހުއްޓެވެ. ސައިކަލާއި އެއާކޯން މަރާމާތުކުރާ އެ ގަރާޖުގައި އަލިފާން ނިއްވާ އާލާތެއް ނެތެވެ.
އެހާ އަވަހަށް ހުޅުގަނޑު ފެތުރިގެން ދިޔައީ ގަރާޖުގައި ހުރި ޕެޓްރޯލާއި ގޭސް ފުޅިތަކުގައި ހުޅުހިފުމުގެ ސަބަބުންނެވެ. "ގަރާޖަކީ ކުއްޔަށް ދީފަ ހުރި ތަނެއް. އަލިފާން ނިއްވާ ސާމާނު ބެހެއްޓުމަށް ފެށުނީންސުރެވެސް ހަނދާންކޮށްދެމުން އައީ. ދޮޅު އަރަހަށްވުރެ ގިނަ ދުވަސްވެއްޖެ ގަރާޖު ހިންގާތާ" ހަސަން ބުންޏެވެ. އެކަން ފުރިހަމަ ނުކޮށް އޮތްވާ ގަރާޖްގައި ރޯވި އަލިފަަންގަނޑު ފެތުރިގެން ގޮސް ހަސަން އާއި ދަރިން އެންމެ ކުޑައިރުންފެށިގެން އުޅެމުންއައި އަމިއްލަ ވަޒަން އަނދާ އަޅިޔަށް ހަދާލީއެވެ.
ރޯދައަށް ލައްކައަކަށްވުރެ ގިނަ ރުފިޔާ ހަރަދުވެފަ ހުންނާނީ ބަދިގޭ ސާމާނު އާކުރުމަށް. ބަދިގެވެސް އެއްކޮށް އަނދައިގެން ދިޔައީ، ކޮޓަރީގެވެސް އެއްބައި އަނދާ ހުލިވެފައި، ފުރާޅު ބައެއްވެސް އަނދައިގެން ފައިބާފަ ހުރީ. ފާރުތަކުގައިވެސް ވަރަށް ބޮޑަށް ރެނދުލާފަ" ޒަހީރާ ބުންޏެވެ.
މި ހާދިސާގައި ނުއަދާ ހުރީ ކޮޓަރީގެ މަގުމައްޗާއިވީ ފަޅީގައި ހުރި ފާރާއި އެތާގައި ހުރި އަލަމާރިއެއް އެކަންޏެވެ. ބައެއް އަންނައުނު ފިޔަވާ އެއްޗެއް ސަލާމަތެއް ނުކުރެވުނެވެ. ޒަހީރާ ބުނީ ބަދިގޭގައި އޮތް އޭނާގެ ފޯނު ބަލާ ވަންނަމަވެސް ސަލާމަތުން ނުނިކުމެވޭނެ ކަމަށެވެ. އެހާވެސް އަވަހަށް ގޭތެރެއަށް ހުޅުގަނޑު ފެތުރިގެން ދިޔައެވެ.
" ކޮޓަރީގައި ހުރި އަލަމާރިވެސް ކަޅުވެފަ ހުރީ އެތެރޭގައި ހުރި ކުލަ އަލި އަންނައުނުތައްވެސް ކުލަ ބަދަލުވެފަ. ދޮވެގެންވެސް ބޭނުމެއް ނުކުރެވުނު. އުކާލަން ޖެހުނީ" ޒަހީރާ ބުންޏެވެ.
'ނިއު ކޮލަމްބިއާ'ގެ ކައިރީގައި ޕާކްކޮށްފަހުރި 6 ސައިކަލެއްވެސް އަނދާ ހުލިވިއެވެ. ގޭ ކައިރީގަ ހުރި ދަރިފުޅުގެ ސައިކަލް ސަލާމަތްވީ ހަސަން އޭނާގެ އަނބިދަރިން ގެއިން ނެރެގެން ދިޔަވަގުތު ސައިކަލް ދަމާފަ ގެންގޮސް ދުރަށް ޖެއްސުމުގެ ސަބަބުންނެވެ.
"ކަދުރެއް ކާލައިގެން ފެންބޮއެގެން ހުރީ މަގުމަތީގަ. އަންހެނުންނާ އަންހެންދަރިފުޅު ދިޔަ ތިމާގެ މީހެއްގެ ގެއަށް ރޯދަވީއްލަން. ގެއަށް ވަންނަން ހުއްދަ ލިބުނީ އެރޭ 9:30 ހާއިރު" ހަސަން ބުންޏެވެ.
އަންހެން ދަރިފުޅު ގެންގުޅޭ ދޫނިކޮޅުވެސް އަނދައިގެންދިޔައީ. ވަރަށްދެރަވި އެ ދޫނިތައް މަރަށްތެޅޭނެ ގޮތް އިހްސާސްކުރެވުނީމަ. ފަހުން ހިތަށްއެރި އެސޮރުމެން ގޮވައިގެން ނިކުމެވުނު ނަމައޭ. އެކަމަކު އަވަސްއަރުވާލައިގެން އުޅުނީމަ ހަނދާން ނުވީ" ޒަހީރާ ބުންޏެވެ.
ހަސަން ބުނީ އަލިފާން ނިއްވާ ސިފައިންގެ މަސައްކަތް ވަރަށް ފުރިހަމަ ކަމަށެވެ. ވަރަށް އަވަހަށް އައިސް އަލިފާން ނިއްވުމުގެ މަސައްކަތް ފެށުމުގެ ސަބަބުން ކައިރީގަ ހުރި އެހެން ގެއަކަށް މާ ބޮޑު ގެއްލުންތަކެއް ނުވެ ﷲގެ އިރާދަފުޅުން އަލިފާންގަނޑު ކޮންޓްރޯލު ކުރެވުނު ކަން ޒަހީރާވެސް ފާހަގަކުރިއެވެ.
ގެއާ ގަރާޖާއި އެކު ޖުމްލަ 1217 އަކަފޫޓްގެ އެ ސަރަހައްދު އޮތީ 10 ވަރަކަށް ދުވަހަށް ބަންދުކޮށްފައެވެ. އެތަން ސާފުނުކުރެވިގެން އުޅެނިކޮށް ވައިގަދަވެ ވިއްސާރަވުމުގެ ސަބަބުން އެތަނަށް ވަނުމަކީ ރައްކާތެރިކަމެއްވެސް ނޫނެވެ. ފުރާޅުގެ ޓިނުތައްވެސް ބިމަށް ފައިބާފަވާއިރު ބަދިގޭގައި އައިސްއަލަމާރީން ފައިބާފައިވާ ދިޔަގަނޑުން ކުނިވަސްދުވައެވެ.
"އެމްއެންޑީއެފުން ބުނީ ސްޓްރަކްޗާއަށް ލިބުނު ގެއްލުމުގެ ބަދަލު ސަރުކާރުން ދޭނެއޭ. އެކަމަކު އެތަން ސާފުކުރަން ޖެހޭނީ އަމިއްލައަށޭ. އެ މަސައްކަތް ކުރާ ބަޔަކާ ވާހަކަ ދައްކާލީމަ ބުނީ އެއްލައްކަ ވިހި ހާސް ނޫނީ އެއްލައްކަ އަށްޑިހަ ހާސްވަރު އަރާނެއޭ ސާފުކުރަން". ހަސަން ބުންޏެވެ.
މިވަގުތު ތިބީ ވަގުތީ ބޯހިޔާވަހިކަމެއްގަ
މި އާއިލާއިން މިހާރު ތިބީ ވަގުތީ ހިޔާވަހިކަމެއްގައެވެ. ނޭޝަނަލް ޑިޒާސްޓާ މެނޭޖްމެންޓުން އެދުނީ އަމިއްލައަށް ތަނެއް ހޯދުމަށެވެ. އާއިލާ މީހެއް މެދުވެރިކޮށް ލިބުނު ދެކޮޓަރީގެ އެޕާޓްމެންޓްގައި އިނދެ 'ޒީޓައިމްސް' އާ ވާހަކަ ދައްކަމުން ހަސަން ބުނީ "ޑިޒާސްޓާއިން ކުލިދޭ. ބުނި ދެމަސް ވަންދެން މިތަނުގައި އުޅެވޭނެއޭ. މިބަލަނީ 3 ކޮޓަރީގެ ތަނެއް ލިބޭތޯ. ގެއްލުމުގެ ބަދަލު ސަރުކާރުން ދިނީމަ އަހަރެއްހާ ދުވަސްވާއިރު ގެއަށް ކޮންމެވެސް ވަރެއް ކުރެވޭނެ ކަމަށް މިބަލަނީ. ޑިޒާސްޓާއިން ބުނަނީ ހަމައަކަށް އެޅެންދެން އަދި ސަރުކާރުން ވަކި ގޮތެއް ނިންމަންދެން މިތަނުގައި މަޑުކުރާށޭ. ފައިސާގެ ތަނަވަސްކަމެއް ނެތީމަ އަދި އެތަނަށް ވަދެވޭނެ ދުވަހެއް ނޭންގެ. ސާފުވެސް ނުކުރެވިގެން މިއުޅެނީ" ހަސަން ބުންޏެވެ.
އަލިފާނުގެ ޚަބަރު ލިބުމާއެކު ގާތް އެކުވެރިންނާއި ދެފަރާތުގެ އާއިލާގެ މީހުން ދިޔައީ ހާލު ބަލަމުންނެވެ. "ކުރިން ގާތްކޮށް އުޅުނު މީހުންވެސް ގުޅި. މިތަނަށް އައިއިރު ނެތް ކާ ތައްޓެއް ކަހަލަ އެއްޗެއްވެސް. ދެފަރާތުގެ އާއިލާގެ އެއްބަނޑު އެއްބަފާ މީހުންވެސް ވަރަށް އެހީވި. ވަރަށް އުފާވި. ތެލި ތައްޓާ އެއްޗެހި ހަދިޔާކޮށް ހަރޯދަ ނިމެންދެން އާއިލާއިން ރޯދަވީއްލާ އެއްޗެހި ފޮނުވި". ޒަހީރާ އާއި އޭނާގެ ފިރިމީހާ ބުންޏެވެ.
އަނދާ ހުލިވިޔަސް ވަގުން ވަދޭ
ހަސަން ބުނީ "ގަރާޖު ދޮރުގައި ޖަހާފަ ހުރި ފިލާގަނޑު ފަޅާލާފައި އެތެރޭގައި ހުރި ބައެއް އެއްޗެހި ވަގަށް ނަގާފަ ހުރީ. ބަދިގެތެރެވެސް ހާވާފަ އެމީހުން ބޭނުންވާ އެއްޗެހި ނަގާފަ ހުރީ. ކޮޓަރިތެރޭގެ އެއްޗެހިވެސް ހާވާފަ ހުރީ. އަވައްޓެރިން ގުޅާފަ ބުނީ ވަގުން ވަދެއޭ އެބަ. އޭރު ދެބުރަށް ވަދެފި" ކަމަށެވެ. ވަގުންގެ އުނދަގޫ ބޮޑުވެގެން މިހާރު ހުރީ ގަރާޖު ދޮރު ޓިނުން ބައްދާ ތަޅުލާފައެވެ.
އަލިފާނުގެ ހާދިިސާގައި ލިބުނު ގެއްލުމުގެ އިތުރަށް ގެ ސާފުކުރެވޭވަރުގެ ތަނަވަސްކަމެއް ނެތުމުން މި އާއިލާ މިވަނީ ވަރަށް ބޮޑަށް މާޔޫސްވެފައެވެ.
