އުމުރުން 5 މަހުގެ އަކްމަލް ބިން އަޙްމަދު ޢަބްދުﷲ އާއި އަޖްމަލް ބިން އަޙްމަދު ޢަބްދުﷲ އަކީ އެއްމާބަނޑު ދެކުދިންނެވެ. މިއަހަރު ޖެނުއަރީ މަހުގެ 4 ވަނަ ދުވަހު އުފަންވި މި ދެކުދިންނަކީ ޏ.ފުވައްމުލައް ފުނާޑު، ލޫނާ އަޙްމަދު ޢަބްދުﷲ އާއި ސ.މީދޫ ޒޯނިޔާ، ޢާއިޝަތު ހަމްދާ ގެ އެއްމާބަނޑު ދެކުދިންނެވެ.
ދެކުދިންގެ ބައްޕަ އަޙްމަދު 'ޒީޓައިމްސް' އަށް މައުލޫމާތު ދިންގޮތުގަ ދެކުދިން އުފަންވީ މައިމީހާގެ ބަނޑަށް އެންމެ 27 ހަފްތާގައެވެ.
" ބަނޑުގަ ރިއްސާތީ ފުވައްމުލަކު ހޮސްޕިޓަލަށް ދިޔައިމަ ޑޮކްޓަރު ބުނީ ވިހަން ކައިރިވެފަ ހުރިކަމަށް. މާލެ ދާނެ ފުރުސަތެއް ނުލިބުނު. ހޮސްޕިޓަލަަށް ދިޔަތާ އެއްގަޑިއިރުން ފުރަތަމަ ދަރިފުޅު ވިހައިފި. އެކަމަކު ދެވަނަ ދަރިފުޅު ހުރީ ބަނޑުގެ ހުރަހަށް ވާގޮތަށް. އެހެންވެ ޖެހުނީ އެމަޖެންސީ ސިޒޭރިއަނެއް ހެދުމަށްފަހު ދަރިފުޅު ނަގަން". އަޙްމަދު ކިޔައިދިނެވެ.
ބަނޑަށް އެންމެ 6 މަހުގައި ދެކުދިން އުފަންވުމުން މި ދެމަފިރިންނަށް ޖެހުނީ އިތުރު ފަރުވާއަށް އެމަޖެންސީކޮށް އައްޑޫ އިކުއެޓޯރިއަލް ހޮސްޕިޓަލަށް ދެކުދިން ގޮވައިގެން ދާށެވެ.
" އެމަޖެންސީގަ ދާން ބެލިއިރު ހެލިކޮޕްޓަރ އޮތީ ގުރައުންޑްކޮށްފަ. ފުލައިޓުން ޖާގަ ނުލިބުނު. ދެން ދާންޖެހުނީ ލޯންޗުގަ. އިކުއެޓޯރިއަލް ހޮސްޕިޓަލުގެ އެންއައިސީޔޫގަ 2 މަސް ދުވަހު ވަނީ ދެކުދިންނަށް ފަރުވާދީފަ. ބޮޑު ދަރިފުޅު (އަކްމަލް) ގެ ހިތުގަ މައްސަލައެއް ހުރިކަން ފާހަގަކުރެވިގެން ޑޮކްޓަރު އެއިރު ބުނެފަ އޮތީ ހިތުގެ ސްކޭނެއް ހެދުމަށް. އެހޮސްޕިޓަލުން ދޫކުރުމާއެކު މާލެ ދިޔައީ އިތުރު ޓެސްޓްތައް ހެދުމަށް. މާލެއިން ހެދި ޓެސްޓްތަކުން އެނގުނީ އަކްމަލްގެ ހިތުގެ ބޮޑު އޮޕަރޭޝަނެއް ކުރަންޖެހޭކަން" އަޙްމަދު ހިތްދަތިކަމާއެކު ކިޔައިދިނެވެ.
އާއިލާއިން މައުލޫމާތު ދޭގޮތުގައި މިއީ މިވަގުތު ރާއްޖެއިން ކުރެވޭ އޮޕަރޭޝަނެއް ނޫނެވެ. މި އާއިލާއިން ވަނީ މާލެއިން ދެއްކި ޑޮކްޓަރުންގެ ލަފާގެ މަތިން އިންޑިއާއަށް ގޮސް ކޮޗިންގަ 2 މަހެއްހާ ދުވަހު މަޑުކޮށް، ލިސީ ހޮސްޕިޓަލުގަ ފަރުވާދޭ ހިތުގެ ބަލިތަކާގުޅޭ ޑޮކްޓަރުންގެ ލަފާވެސް ހޯދާފައެވެ.
" ދަރިފުޅު އުފެދުމުގަ ހިތުގަ ހުރި މައްސަލައެއް ރަނގަޅުކުރުމަށް އޯޕަންހާޓް ސާޖަރީއެއް ކުރަންޖެހޭ ކަމަށް ބުނީ. އުމުރުން 6 މަސް ފުރުނީމަ އޮޕަރޭޝަން ކުރަންޖެހޭނެ ކަމަށް ބުނީ. އެގޮތަށް ހިތް އުފެދިފަ ހުރުމުގެ ސަބަބުން އޮކްސިޖަން މަދުވުމުގެ މައްސަލަ ކުރިމަތިވެދާނެ ކަމަށް ޑޮކްޓަރު ބުނެފަަވަނީ. ލިސީ ހޮސްޕިޓަލަކީ އާސަންދަ ލިބޭ ހޮސްޕިޓަލެއް ނޫން. އެންސްޕާއިން ކުރިން ވެސް އެހީތެރިކަން ފޯރުކޮށްދިން. ޖުލައި 1 ގަ ފުރަން މިއުޅެނީ އޮޕަރޭޝަން ކުރުމަށް. އެހެނިހެން ހަރަދުތައް ނުހިމަނާ އޮޕަރޭޝަނަށް 5000 އާއި 6000 ޑޮލަރާއި ދެމެދުގެ އަދަދަކަށް ފައިސާ ބޭނުންވޭ". އަޙްމަދު މައުލޫމާތު ދިނެވެ.
އަޙްމަދަކީ ފުލުހުންގެ ވަޒީފާ އަދާކުރާ މީހަކު ކަމުގަވިއަސް ވޭތުވެދިޔަ 5 މަހެއްހާ ދުވަހު ބޮޑެތި ޚަރަދުތަކެއް ވަނީ ހޭދަވެފައެވެ. "އިންޑިއާގަ ތިބިއިރު ހުރުމާ ކެއުމުގެ އިތުރަށް ދަތުރުފަތުރަށް ވެސް ޚަރަދުތަކެއް ހޭދަވި. ދެކުދިންގެ ލޮލުގެ ލޭޒަރ އޮޕަރޭޝަނެއް ވެސް ކޮށްފަ ވަނީ. އެއީ އެއޮޕަރޭޝަން ނުކޮށްފިނަމަ ލޮލުގެ ފެނުން ގެއްލިދާނެ ކަމަަށް ޑޮކްޓަރުން ބުނެފަވާތީ. ހިތުގެ ބޮޑު އޮޕަރޭޝަނެއް ކުރާއިރު ގިނަދުވަސްތަކެއް އިންޑިއާގަ ހޭދަވާނެ ކަމަށް ބެލެވޭ. އަޅުގަނޑުމެން އެދެނީ އަކްމަލްގެ ހިތުގެ އޮޕަރޭޝަން ކުރުމަށް އާންމުންގެ ދީލަތި އެހީތެރިކަމެއް ފޯރުކޮށްދިނުމަށް". ހާލަތު ކިޔައިދެމުން އަޙްމަދު ބުންޏެވެ.
ލޯބި ލޯބި 2 ފިރިހެން ކުދިންނާއެކު އިންޑިއާއަށް ފުރުމަށް ތައްޔާރުވަމުންދާ މި އާއިލާއިން އެދެނީ އެހީވެވޭނެ ތަނަވަސްކަމެއް ނެތްނަމަ އެމީހުންގެ ދަރިފުޅަށް ހެޔޮ ދުޢާ ކޮށްދިނުމަށެވެ. އަދި މި ޕޯސްޓް ގިނަ މީހުންނަށް ފެންނަގޮތަށް ހިއްސާ ކޮށްދިނުމަށެވެ.
ނޯޓް: މި ޢާއިލާ އަށް އާންމުންގެ ފަރާތުން އެހީތެރިކަން ލިބިފައިވާތީ، މިރިޕޯޓުގައި ކުރިން ހިމަނަައިފައިވާ ފޯން ނަންބަރާއި އެކައުންޓް ނަންބަރު ވާނީ އުނިކޮށްފައެވެ. ޒީޓައިމްސްގައި މިރިޕޯޓު ޕަބްލިޝް ކުރުމުން މި އާއިލާއަށް އެހީތެރިކަން ފޯރުކޮށްދިން މީހުންނަށް ވަރަށްބޮޑަށް ޝުކުރިއްޔާ!
