ދުނިޔޭގެ ތާރީޚު ލިޔުއްވާ ބޭބޭކަލުން ފާހަގަކުރައްވާގޮތުގައި އިންސާނުން އަޚްލާޤީ ގޮތުންނާއި، ދީނީގޮތުން، އެންމެ ދަށުދަރަޖަ އަކަށް ވެއްޓިފައިވީ ދުވަސްވަރަކީ، މީލާދީގޮތުން ފަސްސަތޭކައިގެ އަހަރުތަކެވެ. އެދުވަސްވަރުގެ މުޖުތަމައުގައި އަރައިނުގަންނަ ފާފައެއް ނެތެވެ. ނުކުރާ ހަޑި މުޑުދާރު އަމަލެއް ނެތެވެ. އަޅުކަން އެއިރު ކުރީ އަމިއްލަ އަތްތަކުން ކޮށާމަށައިގެން އަމިއްލައަށް އުފެއްދި ބުދުތަކަކަށެވެ.
މިފަދަ ދަށުދަރަޖައަކަށް އިންސާނިއްޔަތު ވެއްޓިފައިވަނިކޮށް، ނަރަކައިގެ މިފުން އަނދަވަޅުން މުޅި އިންސާނިއްޔަތު ސަލާމަތް ކުރެއްވުމަށްޓަކައި، މާތްﷲ ފޮނުއްވި މާތް ރަސޫލު ބޭކަލަކީ މާތް ނަބިއްޔާ މުހައްމަދު ﷺ އެވެ. " އެކަލޭގެފާނު ފޮނުއްވީ އާލަމްތަކަށް ރަހުމަތެއްގެ ގޮތުގަ. ހިދާޔަތުގެ މަގަށް އަލިކުރާ ވޮށެއްގެ ގޮތުގަ" އެވެ.
މުސްލިމުންގެ މާތް ނަބިއްޔާ މުހައްމަދު ﷺ ގެ އިއްޒަތާއި ކަރާމަތަށް އުނިކަން ގެނައުމަށްޓަކައި، އަދާވާތްތެރި ބާރުތަކުން، އަބަދުވެސް ދަނީ މަސައްކަތް ކުރަމުންނެވެ. މިއަދުވެސް އެކަން ކުރިއަށް އެބަދެއެވެ. އެއީ މިޒަމާނުގައި ދޭދޭ ޤައުމުތަކުގެ މެދުގައި އެއްބަސްވެފައިވާ ބައިނަލް އަޤްވާމީ މުއާހަދާތަކާ ޚިލާފު، ނުހަނު ދަށުދަރަޖައިގެ އަމަލެކެވެ. ހަގީގަތަށް ލޯބިކުރާ ކޮންމެ އިންސާނަކު މިފަދަ ނުބައި އަމަލުތައް ކުށްވެރިކުރާނެއެވެ.
" ބައެއް ފަހަރު ރަސޫލާގެ މަތިވެރި ޝަހުސިއްޔަތަށް ނިސްބަތްކޮށްގެން މުސްލިމުންގެ މިދިވެހި ފަސްގަނޑުގައި ވެސް، އެކި ފާޑުގެ ވާހަކަތައް ޝާއިޢުކުރާތީ ފެނޭ. އެފަދަ ދޮގު ލިޔުންތައް އުފައްދައި އާއްމު ކުރާ މީހުންނަކީ އަޤީދާ ފާސިދުވެފައިވާ ބައެއް. އެމީހުންގެ ބޭނުމަކީ މުޅި ދުނިޔެއަށް ފެތުރިފައިވާ ﷲ ގެ ދީން މީސްތަކުންނަށް އޮޅުވާލުން. އެއީ އިސްލާމް ދީން ނުހަނު ބާރަށް ފެތުރެމުން އަންނާތީ ގަންނަ ބިރެއްގެ ސަބަބުން ހިންގާ ފިނޑި އަމަލުތަކެއް".
މާތް ނަބިއްޔާ މުހައްމަދު ﷺ ގެ ހަޔާތްޕުޅުގައި އެކަލޭގެފާނު ކުރައްވާފައިވާ ކަންކަމާމެދު މަލާމާތްކޮށް، ފުރައްސާރައިގެ މޭރުމުން ބަސްބުނުމުގެ ހައްގަކީ އެއްވެސް ބަޔަކަށް ލިބިގެންވާ ހައްގެއް ނޫނެވެ. އިތުރު އެކަލޭގެފާނުގެ އެންމެހާ އަމަލުފުޅުތަކަކީ އިލާހީ އަމުރުފުޅުތަކަށް ތަބާވެވަޑައިގެންނެވުމުގެ ގޮތުން ކުރައްވާފައިވާ ކަންކަމެވެ.
ކީރިތި ރަސޫލާ ﷺ ދެކެ ލޯބިވެ އެކަލޭގެފާނު ދިފާޢުކުރުމަކީ މުސްލިމުންގެ ވާޖިބެކެވެ. އެމީހެއްގެ އަމިއްލަ ނަފްސާއި، މުދަލާއި، އަނބިދަރީންނަށްވުރެ ބޮޑަށް އެކަލޭގެފާނު ދެކެ ލޯބިވެ، އެކަލޭގެފާނަށް ނަސްރުދީގެން މެނުވީ އެއްވެސް މުސްލިމެއްގެ އީމާންކަން ފުރިހަމައެއް ނުވާނެއެވެ. އެކަލޭގެފާނާއި، އެކަލޭގެފާނުގެ ތެދުމަގަށް ނަފްރަތުކުރުމާއި، ކުޑައިމީސް ބަސް ބުނެ، ފުރައްސާރަކުރުމަކީ، އީމާންކަމުގެ ދާއިރާއިން ބޭރުވާނޭ އަމަލެއްކަމަށް އިލްމުވެރިން ވަނީ ވިދާޅުވެފައެވެ.
ނޯޓު: މައުލޫމާތު ނަގާފައިވަނީ ހުކުރު ޚުތުބާ
