ތަރިކަ މުދަލަށް އަރައިގަނެވޭ ވަރަށް ގިނަ ސަބަބުތަކެއް ވެއެވެ. އޭގެތެރެއިން އެއް ކަމަކީ، އީމާންކަން ބަލިކަށިވުމެވެ. ނަމާދު ކުރިޔަސް، ރޯދަ ހިފިޔަސް، ޤުރުއާން ކިޔަވައި އުޅުނަސް، ތަރިކަ މުދަލަށް އަރައިގަންނަ މީހަކީ އޭނާގެ އީމާންކަން ބަލިކަށި މީހެކެވެ. ﷲ ގެ ދުޝްމަނުންނާ އެއްފަދަ މީހެކެވެ. ތަރިކަމުދާ ނުހައްގު ގޮތުގައި ކާމީހަކީ، ދުލުން އެހެން ނުބުންޏަސް އަމަލުން އެހެން ބުނާ މީހެކެވެ.
ތަރިކަމުދަލުގައި ޖެހެވޭ ސަބަބުތަކުގެ ތެރޭގައި، އަމިއްލަ އެދުން ބޮޑުވުމާއި ދަހިވެތިކަން އިންތިހާއަށް ދިޔުން ވެއެވެ. އެކަމާހެދި އެހެން ވާރުތަވެރީންގެ ހައްގަކަށް އަރައިގަނެވެނީއެވެ. ތިމާއަށް ހައްގުނުވާ މުދަލެއް ކެއުމަކީ އަނގުރު އަލިފާން ކެއުންފަދަ ކަމެކެވެ.
މީހަކު މަރުވުމުން އޭނާ ދޫކޮށްފައިދާ ތަރިކައަކީ، އެ ބަހާނެ އުސޫލުތަކަކާއި، ގަވާއިދުތަކެއް މާތް ﷲ ކަނޑައަޅުއްވާފައިވާ އެއްޗެކެވެ. ތަރިކަ މުދާ ބެހުމަށް، މާތް ﷲ ވަސިއްޔަތް ކުރައްވާފައިވެއެވެ. ވަސިއްޔަތަކީ، ތަންފީޛު ކުރެވެން ޖެހޭނެ އެއްޗެކެވެ. ތަރިކަ މުދަލަށް ބަލާއިރު، ނިސާ ސޫރަތުގެ 11 ވަނަ އާޔަތާއި، 12 ވަނަ އާޔަތާއި، 176 ވަނަ އާޔަތުގައި އެ މުދާ ބަހަންވީ ގޮތުގެ ތަފްސީލީ ގަވާއިދުތައް މާތްﷲ ވަނީ ބަޔާން ކުރައްވާފައެވެ. މި އާޔަތްތަކުން އެނގޭ ގޮތުގައި ތަރިކަމުދަލަކީ، އެމުދާ ބެހުން މާތް ﷲ ފަރުޟުކުރައްވާފައިވާ އެއްޗެކެވެ.
" އެއީ ހެޔޮކަމެއްގެ ގޮތުން ކުރަންޖެހޭ ކަމެއް ނޫން. ތަރިކަމުދާ ބެހުމުގެ މައްސަލާގައި އެއްވެސް ފަރާތަކަށް އިޚުތިޔާރު ލިބިގެނެއް ނުވޭ. އެމުދާ ބަހަން ޖެހޭނީ މާތް ﷲ ކަނޑައަޅުއްވާފައިވާ ގޮތަށް. ތަރިކައަކީ މާތް ﷲ ގެ ހައްގުތަކުގެތެރޭގައި ހިމެނޭ އެއްޗެއް. އެކަލާނގެ ހައްގަކަށް އަރައިގަނެގެން ނުވާނެ".
މައްޔިތާ ދުނިޔެ ދޫކުރުމުން އޭނާގެ ކަށުކަމާކެމީގެ ކަންކަމާއި، އޭނާގެ ދަރަނިތައް އަދާކޮށް، ވަސިއްޔަތްތައް ފުއްދަން ޖެހެއެވެ. ތަރިކަ މުދަލުގެ ގޮތުގައި ވާރިސުންނަށް ލިބޭނީ މިކަންކަން ފުރިހަމަކުރުމަށްފަހު ބާކީ ހުރި އެއްޗެކެވެ.
ތަރިކަމުދަލާ ގުޅޭ ކަންތައްތަކުގެ ތެރޭގައި ހިމެނޭ އެއްކަމަކީ، ވަސިއްޔަތެވެ. މިވަސިއްޔަތް ލިޔެ ކަމާބެހޭ އިދާރާތަކުގެ އިޖްރާއަތުތަކާ އެއްގޮތަށް ރަޖިސްޓަރީ ކުރެވިފައި އޮންނަންވާނެއެވެ. ތަރިކަމުދާ ބެހޭނީ މި ވަސިއްޔަތް ފުއްދުމަށްފަހުގައެވެ. ތަރިކަމުދަލުން ވަސިއްޔަތްކުރެވޭނީ އެމުދަލުގެ ތިންބައިކުޅަ އެއްބަޔަށްވުރެ އިތުރުނުވާ ގޮތަށެވެ. އަދި ކޮންމެ ވާރުތަވެރިއަކަށް ދިނުމަށް ޝަރުޢުކުރައްވާފައިވާ މިންވަރުގެ އިތުރަށް ވާރުތަމުދަލުން ބައެއް ދިނުމަށް ވަސިއްޔަތެއް ނުކުރެވޭނެއެވެ. އެއީ ވަކި ވާރުތަވެރިއަކަށް ވާރުތަ މުދަލުން ބައެއް ދިނުމަށް ވަސިއްޔަތްކޮށްފިނަމަ އެހެން ވާރުތަވެރިންގެ ހައްގުތައް ގެއްލިދާނެ ކަމަށްޓަކައެވެ. ތަރިކަމުދާ ބެހުމަށް އަވަސްވެގަތުމަކީ ގާތްތިމާގެ ކަމުގެ ގުޅުން ހަރުދަނާވެގެންދާނެ ކަމެކެވެ.
ނޯޓް: މައުލޫމާތު ނަގާފައިވާ މިއަދުގެ ހުކުރު ޚުތުބާއިންނެވެ.
