ވިޓަމިން ޑީ މަދުވުމުގެ ސަބަބުން ޑިމެންޓިއާ (ހަނދާން ނެތޭ ބަލި) ޖެހުމުގެ ފުރުސަތު އިތުރުވެދާނެ ކަމަށް އޮސްޓްރޭލިއާގެ ދިރާސާކާރުން ބުނެފިއެވެ.
ޔުނިވަރސިޓީ އޮފް ސައުތު އޮސްޓްރޭލިއާގެ ދިރާސާކުރާ ޓީމުން ބުނާ ގޮތުގައި ހަށިގަނޑުގައި ވިޓަމިން ޑީގެ މިންވަރު މަދުވުމުން، ހަނދާން ނެތޭ ބައްޔާއި ސްޓްރޯކް ޖެހުމުގެ ފުރުސަތު ބޮޑުވުމާ ގުޅުވިދާނެއެވެ.
އެ ޔުނިވަރސިޓީން ކުރި މި ދިރާސާއަކީ ސްޓްރޯކާއި ހަނދާން ނެތޭ ބަލީގެ ރިސްކަށް ވިޓަމިން ޑީ ލެވެލް ވަރަށް ދަށްވުމުން ކުރާ އަސަރުތައް ދެނެގަތުމަށް ބޮޑު އާބާދީއެއްގެ މެދުގައި ޖެނެޓިކް އެނަލިސިސް ބޭނުންކޮށްގެން ހެދި ފުރަތަމަ ދިރާސާ ކަމަށް އެ ޔުނިވަރސިޓީގެ ޕްރޮފެސަރ އަދި ދިރާސާގެ ސީނިއާ އިންވެސްޓިގޭޓަރ އެލީނާ ހައިޕޮނެން ވިދާޅުވިއެވެ.
މި ދިރާސާގައި ބޮޑެތި އާބާދީތަކުން 294،000 މީހުންގެ ޑާޓާ ބޭނުންކޮށްފައިވެއެވެ. މި ދިރާސާގެ ހޯދުންތަކުން އެނގުނު ގޮތުގައި ވިޓަމިން ޑީ ލެވެލް 25 ނެނޯމޯލްސް ޕާރ ލިޓާރ އަށްވުރެ ދަށް މީހުންގެ މެދުގައި ވިޓަމިން ޑީ ލެވެލް 50 ނެނޯމޯލްސް ޕާރ ލީޓަރ ގައި ހުންނަ މީހުންނަށްވުރެ ހަނދާންނެތޭ ބައްޔާ ސްޓްރޯކް ޖެހުމުގެ ރިސްކް 45 އިންސައްތައަށް ބޮޑެވެ. އެހެންކަމުން ވިޓަމިން ޑީ މަދުވުން މިއީ ޑިމެންޓިއާއި އާއި ސްޓްރޯކް އާއި ގުޅުމެއް ވެދާނެ ކަމަށް ދިރާސާކާރުން ބުނެއެވެ.
ބައެއް އާބާދީތަކުން ފާހަގަ ކުރެވުނު ގޮތުގައި ވިޑަމިންޑީ ލެވެލް 50 ނެނޯމޯލްސް ޕާރ ލިޓަރ އަށް އިތުރުވެފައިވާ ނަމަ ޑިމެންޓިއާ ކޭސްތަކުން ރައްކާތެރިވެވިދާނެކަމަށް ހޯދިފައިވެއެވެ.
މިދިރާސާއާއި ގުޅޭ ގޮތުން ތަޖުރިބާކާރެއްގެ ހިޔާލު
އެމެރިކާގެ ކެލިފޯނިއާގެ ޕެސިފިކް ނިއުރޯސައިންސް އިންސްޓިޓިއުޓްގެ ޑިރެކްޓަރެއް ކަމަށްވާ ޑޮކްޓަރ ސްކޮޓް ކެއިސާ ވިދާޅުވީ މި ދިރާސާއިން ވިޓަމިން ޑީ މަދުވުމުން ހަނދާން ނެތޭ ބަލީގެ ރިސްކު ބޮޑުވުމާއި ގުޅުމެއްވާކަމަށް ހޯދިފައިވާތީ މިކަން އިތުރަށް ދިރާސާ ކުރަންޖެހޭ ކަމަށެވެ. ޑރ. ސްކޮޓް ވިދާޅުވީ ވިޓަމިން ޑީ ލެވެލް ދަށްވުމުން ހަނދާން ނެތޭ ބަލި ޖެހުމުގެ ރިސްކް އިތުރުވާކަން ކަށަވަރު ކުރުމަށް އިތުރު ދިރާސާތަކެއް ހަދަން ބޭނުންވާ ކަމަށެވެ. މިއީ ވަރަށް ޝައުގުވެރި ދިރާސާއެއް ކަމަށާއި ހަނދާން ނެތޭ ބައްޔާއި ވިޓަމިން ޑީ އާއި ގުޅޭ ވަރަށް މުހިންމު ބަޔަކަށް މި ދިރާސާގައި ބަލާފައިވާ ކަމަށް އޭނާ ވިދާޅުވިއެވެ. އެހެންނަމަވެސް އެހެން ދިރާސާތަކެއް ހަދައިގެން މިކަން ކަށަވަރު ކުރެވިއްޖެ ނަމަ ހަނދާން ނެތޭ ބަލީގެ ރިސްކު ކުޑަކުރުމަށް މުހިންމު މި ދިރާސާގެ ބޭނުން ހިފިދާނެ ކަމަށް ޑރ. ސްކޮޓް ވިދާޅުވިއެވެ.
ހަނދާން ނެތޭ ބަލި ޖެހުމުގެ ކުރިން ރައްކާތެރިވުމަށް ވިޓަމިން ޑީ މަދުވުމާއި ގުޅޭގޮތުން ހެދި މި ދިރާސާ ރަނގަޅު ކަމަށާއި އެހެންކަމުން ހަނދާން ނެތޭ ބަލީގެ ރިސްކް ބޮޑުމީހުންނާއި ވިޓަމިން ޑީ މަދު މީހުންން ވަކިކުރެވިގެން އެ މީހުންނަށް ބޭނުންވާ ވަރަށް ވިޓަމިން ޑީ އިތުރުކުރެވޭނީ ކާ އެއްޗެހިންތޯ ނުވަތަ އިރުގެ އަވިންތޯ ދެނެގަތުމަށް މުހިންމު ކަމަށެވެ.
ޑިމެންޓިއާ އާއި ވިޓަމިން ޑީ
ޑިމެންޓިއާ އަކީ މެމޮރީ ލޮސް ނުވަތަ ކުރީގެ ހަނދާންތައް ފިލައިގެން ދިއުމާއި އާންމު ދިރިއުޅުމުގައި ވިސްނައިގެން ކަންކަން ނިންމުމަށް އުނދަގޫވާ ހާލަތްތައް މެދުވެރިވެ ފެންނަ މިފަދަ އަލާމާތްތަކަށް ކިޔާ ނަމެކެވެ. ޑިމެންޓިއާގެ އެންމެ އާންމު ވައްތަރަކީ އަލްޒެއިމާއެވެ. އެމެރިކާގެ ތަފާސްހިސާބުތައް ދައްކާ ގޮތުން އަލްޒެއިމާ ނުވަތަ އެއާ ގުޅުންހުރި ހަނދާން ނެތޭ ބަލިތައް ހުންނަ 5.8 މިލިއަން މީހުން އެގައުމުގައި އުޅެއެވެ.
އަލްޒެއިމާ ޑިޒީސް އިންޓަނޭޝަނަލްގެ އެންމެ ފަހުގެ ތަފާސް ހިސާބުތަކުން ދައްކާ ގޮތުގައި 2020 ވަނަ އަހަރާ ހަމައަށް ޑިމެންޓިއާ ޖެހިފައިވާ 55 މިލިއަނަށްވުރެ ގިނަ މީހުން މުޅި ދުނިޔޭގައި އެބަތިއްބެވެ. އަދި ކޮންމެ 3 ސިކުންތަކުން މީހަކު މި ބައްޔަށް ހުށަހެޅެއެވެ. 2030 އާއި ހަމައަށް 78 މިލިއަން މީހުން އަދި 2050 އާއި ހަމައަށް 139 މިލިއަން މީހުންނަށް ހަނދާން ނެތޭ ބަލި ޖެހިދާނެ ކަމަށް އަންދާޒާ ކޮށްފައިވެއެވެ. މުސްކުޅި އާބާދީ ހަލުވިކަމާއެކު އިތުރުވަމުން އަންނަ ޗައިނާ، އިންޑިއާ އަދި ސައުތު އޭޝިއާއި ވެސްޓާން ޕެސިފިކް ގައުމުތަކުން ހަނދާން ނެތޭ ބަލި ޖެހޭ މީހުން ގިނަވުން އެކަށީގެންވެއެވެ.
އޮސްޓްރޭލިއާގައި ހެދި ދިރާސާގައި ޑިމެންޓިއާ އާއި ވިޓަމިން ޑީ ދަށްވުމާ ގުޅުވިދާނެ ކަމަށް ބުނެފައިވީނަމަވެސް، ހަނދާން ނެތޭ ބަލި ހުންނަ މީހުންނަށް ވިޓަމިން ޑީ ސަޕްލިމެންޓް ދީގެން އެ ބަލީގެ ހާލަތު ރަނގަޅުވޭތޯ ބެލުމަށް ޓްރަޔަލް އެއްވެސް ކުރިޔަށް ގެންގޮސްފައެއް ނުވެއެވެ.
މައުލޫމާތު ނެގީ: ހެލްތްލައިން ޑޮޓް ކޮމް
ކިޔުންތެރިންގެ ހިޔާލު
ވިޓަމިން ޑީ އިތުރު ކުރުމަށް ކުރެވިދާނެ ކަންކަމުގެ މަޢުލޫމާތު ފޯރުކޮށްދީބަލަ..
ކޮމެންޓްސް ބަންދުކުރެވިފައި