މަރިޔަމް ޝަފިއްޔާ ސްޓައިންހިލްބާގެ ނަން ގިނަބަޔަކު ފާހަގަކުރަނީ ދިމާވި ގޮންޖެހުންތަކާއި އެކުވެސް، ހޮސްޕިޓަލިޓީ ދާއިރާގައި މެދުކެނޑުމެއްނެތި ދިގު ރާސްތާއެއް ކަނޑަތުކޮށްފައިވާ ފިސާރި އަންހެނެއްގެ ގޮތުގައެވެ. އުމުރުން އެންމެ 16 އަހަރުގައި ފަތުރުވެރިކަމުގެ ދާއިރާއަށް އޭނާ ވަނީ ވެއިޓްރެސްއެއްގެ ގޮތުގައެވެ. ޒުވާން އުމުރުގައި އެދާއިރާގައި ކުރި ތަފާތު ތަޖުރިބާތަކާއެކު ފަތުރުވެރިކަމުގެ ދާއިރާއަށް ޒުވާނުން ހޭލުންތެރިކޮށް ޝައުޤު އުފެއްދުމަށް މަސައްކަތް ކުރާ ހިތްވަރުގަދަ ކަނބަލެއްގެ ގޮތުގައެވެ. ކުދި ވިޔަފާރިތައް ކުރިއެރުވުމުގައި އެކިގޮތްގޮތުން އެހީތެރިވެދޭ ފަރާތެއްގެ ގޮތުގައެވެ. ޒަމާނުއްސުރެ ބަދަލުނުވެ އޮތް ކުލައިގެ ތަފާތު ކުރުން ނައްތާލުމަށް ސޯޝަލް މީޑިއާގައި އަޑު އުފުލައި އެހެންމީހުނަށް ކުރިމަތިވާ މިފަދަ ކަންކަމުގައި ދިފާއީ އައްޑަނައެއްގެ ގޮތުގައެވެ. ވަކިން ހާއްސަކޮށް، ޖިންސީ އަނިޔާ އާއި ބުލީގެ ޝިކާރައިން މިއަދުގެ ޅަ ދަރިން ސަލާމަތް ކުރުމަށް އެންމެކުރީ ސަފުގައި ހުރި ޒުވާނެއްގެ ގޮތުގައެވެ.

ހޮސްޕިޓަލިޓީ ދާއިރާގައި ސާބިތުކަމާއެކު ޝަފިއްޔާ ހޭދަކުރި 19 އަހަރު ދުވަހުގެ ވާހަކަ ދައްކާ އެކަމާއި ފަހުރުވެރިވާނެ އެތައް ބަޔަކު އެބަތިއްބެވެ. ހޯދާ ކާމިޔާބީގައި އަތްތިލަބަޑި ޖަހާނެ އެތައް އަތެކެވެ. ނަމަވެސް މީގެ 19 އަހަރު ކުރިއަށް ބަލާއިރު ޝަފިއްޔާއަކީ ކާކުކަން އެނގޭ ހެއްޔެވެ؟ ލިބިފައިވާ ކާމިޔާބީގެ ވާހަކަ ދައްކާނަމަ މިއީވެސް ހަމަ ކޮންމެހެން ދައްކަން ޖެހޭނެ މުހިއްމު ވާހަކަތަކެކެވެ.

ތައުލީމީ ހަޔާތް ޝަފިއްޔާ ފެށީ ތާޖުއްދީން ސުކޫލުންނެވެ. ތާޖުއްދީން ސުކޫލްގެ ގްރޭޑް 6 ނިންމުމަށްފަހު ތައުލީމީ ހަޔާތުގެ ދެން އޮތް ސެކަންޑްރީ މަރުހަލާ ކުރިއަށް ގެންދިއުމަށް، އަމީނިއްޔާ ސުކޫލުގެ  ގޭޓުންވަނީ ވަރަށް ފޮނި އުއްމީދު ތަކަކާ އެކުއެވެ. މަދަރުސީ ދައުރުގައި ކިޔަވައި މޮޅު ދަރިއަކަށް ވުމުގެ ފޮނި ހުވަފެނާއި ވަރުގަދަ އަޒުމުގައެވެ. ނަތީޖާއަކީ ކިޔަވައި މޮޅު ދަރިވަރަކަށް ވުމަށް، ވަރުގަދަ އަޒުމަކާއެކު ކުރިއަށް ދިއުމަށް ކެނޑިނޭޅި ބުރަ މަސައްކަތެއް ކުރުމެވެ. އެކަމަކު އެމަސައްކަތުގައި އޭނާ އުޅެމުންދިޔަ މާހައުލުން ލިބުނީ އަނިޔާއާއި ފުރައްސާރައެވެ. މިއީ އޭނާގެ ކިޔެވުމަށް އެޅުނު އެންމެބޮޑު ހުރަހެވެ. އަމީނިއްޔާ ސުކޫލުގެ ތައުލީމީ ހަޔާތް ޝަފިއްޔާ ސިފަކުރަނީ ހިއްދަތި އަނދިރި ދުވަސްތަކެއްގެ ގޮތުގައެވެ.

Advertisement

" އުމުރުން އެހާ ޅައުމުރުގައި ތިމާ ހުންނަ ސިފައާއި ކުލައާއި ގުޅުވައިގެން ބަޔަކު މީހުން ފުރައްސާރަ ކުރަން ފެށުމުން، އޭރު އެކުރިމަތިވި ހިތްދަތިކަން މިހެން ބުނެލަން އެހާ ފަސޭހައެއްނޫން. ކަޅު މަރިޔަމް ކިޔާ، ދެލި މަރިޔަމް ކިޔާ، ހުންނަ  ސިފައަށް މިފަދަ ބަސްތައް ރައްދު ކުރާތީ އެބަ ހުންނަން ސުކޫލަށް ނުދާން. ކުލަ އަލިކުރަން ކުރެވެންއޮތް ކަމެއް ވިއްޔާ ކުރެވޭތޯ ބަލަނީ. އިނިން ތިންދުވަސް ވަންދެން ގެއިން ނުނިކުމެ ފެއާރިނގްލަވްލީ ލައިގެންވެސް. މިއީ އެއްވެސް ހާލެއްގައި ޝަފް ދޮންވާން ބޭނުންވެގެން ކުރި ކަމެއްނޫން. އެހެން ކުދިންނާއެކު އުޅެން ފަސޭހަވާނޭ ހިތައްއަރާ އޭރު ވިސްނުނު ގޮތް." ޝަފިއްޔާ ކިޔައިދިނެވެ.

އެއަށްފަހު ދެން ކުރިމަތިލާން ޖެހުނީ އެއަށްވުރެން އުނދަގޫ ހާލަތަކާ އެވެ. "އެއްދުވަހަކު ކުލާހުގައި ދައްކަމުންދިޔަ ވާހަކައެއް ތެރޭން ޝަފްއަކީ ބައްޕަ ނެތް ކުއްޖެކޭ ބުނެ އެންމެން ވަރަށް ބާރަށް ހޭންފެށި. އޭރު ޝަފްއަކަށް ނޭންގެ އެބުނީ ކީކޭކަމެއް. ހަނދާންވާ އެއްޗަކީ އެދުވަހު ޝަފްއަށް ކުރި ފުރައްސާރައިގައި މުޅި ކުލާސް ބައިވެރިވެ ޝަފް އިނީ އެކަނިކަން. އެދުވަހަށް ފަހު މުޅިސުކޫލު ތެރޭގައި ޝަފްއާއި ދިމާއަށް އެހެންގޮވާ ފުރައްސާރަ ކުރޭ". ފުންނޭވާއަކާއެކު ޝަފްގެ ވާހަކަ ހުއްޓުނީ އެހިތި ހިތްދަތި މާޒީގެ ހަނދާންތަކާއެކު ކުރި އަސަރުންނެވެ.

ސުކޫލުގެ މާހައުލު ހިއްދަތި ތަނެއްގެ ގޮތުގައި ސިފަކުރާ ޝަފިއްޔާގެ ދިފާއުގައި ބަހެއް ބުނެލާނެ އެއްވެސް މީހަކު ނުވިއެވެ. އަދި އަނގައިން ބުނެލާ އެކުގައި އެޅޭނެ ރަހުމަތްތެރިއަކު ނެތްކަމުގެ އިހްސާސް އެދުވަހު އޭނާއަށް ކުރެވުނެވެ. ދިފާއުގައި އެއްޗެއް ބުނެލާނެ ޓީޗަރަކު ނެތި ނިކަމެތިންނަށް ދެރަގޮތް، މޮޅުންނަށް މޮޅުގޮތް ކަމަށް ވިސްނާ އެދުވަހުވެސް ޝަފިއްޔާގެ ދުވަސް ހޭދަކުރީ  މާދަމާއަކީ ހިތްހަމަޖެހޭނެ ދުވަހަކަށް ވާނެކަމުގެ އުއްމީދުގައެވެ. އުމުރުން ކިތަންމެ ޅަނަމަވެސް އެހިތްދަތި ދުވަސްތަކާ ކުރިމަތިލާ އެކަންކަމުން އަރައިގަނެ ހިތުގައި ވަރުގަދަ އަޒުމެއް ކަނޑައެޅިއެވެ. ބުލީގެ ޝިކާރައަކަށްވެ ބައެއްގެތެރޭ ބާކީވުމަކީ ކިހާ ހިތްދަތިކަމެއްކަން ޝަފިއްޔާއަށް އިހްސާސް ކުރެވެއެވެ. ލިބިފައިވާ އަނިޔާއާއި ލަކުނުތައް ބޭރުފުށުން ފެންނަން ނެތް ނަމަވެސް ޝަފިއްޔާގެ މިހިތްދަތި ދުވަސްތަކުން އަރައިގަނެވޭނެ ދުވަހަކަށް އިންތިޒާރު ކުރެވުނެވެ.

ޝަފިއްޔާގެ ހަޔާތުގެ މިހިތްދަތި ދުވަސްތަކުން އަރައިގަތުމަށް ހިތްވަރު ހޯދީ މަންމައަށް އެހީތެރިވުމުގެ ފޮނި އުއްމީދުގައެވެ. ފަހަތަށްޖެހި ދިރިއުޅުމުގެ އުއްމީދު ފަނޑުވާ ކޮންމެފަހަރަކު ޝަފިއްޔާއަށް ބައްޕައެއް ނެތްކަމުގެ އިހްސާސްވިޔަ ނުދީ، އަތުގައި ބާރަށް ހިފަހައްޓައިގެން ހުރި ޝަފިއްޔާގެ މަންމަ ޝަފިއްޔާ ސިފަކުރަނީ އެއީ އޭނާއަށް ދުނިޔެމަތީގައި ލިބުނު ބޮޑު ނިއުމަތެއްގެ ގޮތުގައެވެ. ގޭގެއަށް ގޮސް ގުލާނުކޮށްގެން ހޯދި ފައިސާއިން އެމަންމަ ޝަފިއްޔާއަށް ބޭނުންވި ޒަރޫރީ ކަންކަން ފުރިހަމަކޮށްދިނެވެ. މިއަދު މިފެންނަ ހިތްވަރުގަދަ ޝަފިއްޔާއެއް ފެނުމުގެ ސަބަބަކީ އެދުވަހު އެމަންމަ ވީ ޤުރުބާނީއެވެ.

"އަހަރެންނަކީ ހިތްވަރުގަދަ އެކަނިވެރި މަޔަކު ގޭގެއަށް ގޮސް ގުލާނުކޮށްގެން، އެތައް ޤުރުބާނީއަކާއި ދަލެއް އޮހޮރުވައިގެން މިހިސާބަށް ގެނައި ދަރިއެއް. މިއަދު މިހިތްވަރާއި އަޒުމާއެކު ކުރިމަތިވި ހުރިހާ ގޮންޖެހުމަކާއި ފުރައްސާރައަކަށް ކުރިމަތިލައި މީހުންގެ ލޯބި ލިބޭނެފަދަ ހިތްވަރެއް އަހަރެންނަށް ދިން މީހަކީ އަހަރެންގެ މަންމަ. އެދުވަހު ގޭދޮށު މީހުންނާއި އާއިލާ އަދި ރައްޓެހިންވެސް މަންމައާއި ޝަފްއަށް ކުރީ މަލާމާތާއި ފުރައްސާރަ. އާއިލާއިންވެސް ޝަފް ބަލައި ނުގަން. ނަމަވެސް ޝަފްއަށްޓަކައި އެމަންމަ ހިތްވަރު ދުލެއް ނުކުރޭ" ޝަފިއްޔާ ބުންޏެވެ.

ޝަފިއްޔާ ކަނޑައެޅި އަޒުމްގައި ފެށި ދަތުރުގެ އުއްމީދުތައް އާވީ މަދަރުސީ ހަޔާތް ނިންމައި ވަޒީފާގެ މާހައުލަށް ނުކުން ހިސާބުންނެވެ. ރިސޯޓެއްގެ ވެއިޓްރެސްގެ ގޮތުގައި ވަޒީފާއަށް ނިކުން ޝަފިއްޔާގެ ޅަސިކުނޑިއަށް ވިސްނުނީ ހުރިހާ ގޮންޖެހުންތަކަކާއި އެކުވެސް މަސައްކަތް ކުރަންޖެހޭކަމެވެ. ޝަފިއްޔާ ބޭނުންވީ އަމިއްލަ މަސައްކަތުން ފައިސާ ހޯދާށެވެ. ދާއިރާއަށް ޝަފިއްޔާ ނިކުތުމުން އެއްވެސް ހާލަތެއްގައި އޭނާއަށް ކުރިމަތިވަމުންދިޔަ މަލާމާތާއި ފުރައްސާރައިން މިންޖުވީކީ ނޫނެވެ.  ކުލައާއި، ނަސްލުގެ ތަފާތުކަން އިތުރަށް އިހްސާސް ކުރަންޖެހުނެވެ. ހަމުގެ ކުލަ އަނދިރި މީހުނަށް ފަތުރުވެރިކަމުގެ ދާއިރާގައި ފުރުސަތު ނެތްކަމަށް ވިސްނުނެވެ. އަންހެން ކުދިންނަށް ފުރުސަތުއޮތް ދާއިރާއެއް ނޫންކަމަށް ވިސްނާ ވަޒީފާ ދޫކޮށް އެނބުރި މާލެ ދާންވެސް އެތައްފަހަރަކު ހިތަށް އެރިއެވެ. ގޭދޮށުމީހުންނާއި އާއިލާ މީހުންގެ މަލާމާތް މަންމައަށް ރައްދުވާނެ ފެށިއެވެ. އޭރު ރިސޯޓެއްގައި އަންހެން ކުއްޖަކު މަސައްކަތް ކުރުން ވެގެންދަނީ ވަރަށް ހަޑިކަމަކަށެވެ.

ކަށި ކުބުރު ޖަންގަޔަކުން އަލި ހާވާ މަންޒިލަށް ވާސިލުވެވޭނެ ރާސްތާއެއް އޭނާވަނީ ކަނޑައްތު ކޮށްފައެވެ. ވިމެން ލީޑަރޝިޕް އެވޯޑް 2022 އުފުލާލާ ގައުމުގެ ކަނބަލުންނަށް ހިތްވަރެއް ގެނުވައިދިނެވެ. އަދި ވިމެން އިން މެނޭޖްމަންޓް މޯލްޑިވްސްގެ ފަރާތުން ޝަފިއްޔާއަށްވަނީ ޓޫރިޒަމް މެރިޓް އެވާރޑް އަރުވާފައެވެ. ޕެސިފިކް އޭޝިއާ ޓްރެވަލް އެސޯސިއޭޝަންގެ ޓްރެވަލް ފޯރަމްގައި ރާއްޖެ ތަމްސީލް ކޮށްދިން ޝަފިއްޔާ ގަބޫލުކުރާ ގޮތުގައި އޭނާއަށް ލިބިފައިވާ ކުރިއެރުމާއި ކާމިޔާބީ އޭނާ މިނެކިރަނީ ލިބިފައވާ އެވޯޑަކުން ނޫނެވެ. ޝަފިއްޔާ ގަބޫލުކުރާ ގޮތުގައި އޭނާއަށް ލިބުނު އެންމެބޮޑު ކާމިޔާބީއަކީ ފަސްއެނބުރި ބެލުމެއްނެތި ކުރި މިދަތުރެވެ. އޭނާ ކުރާ މަސައްކަތަށް ހުރި ޝައުގާއި ލޯއްބެވެ.

ކޮންމެއަކަސް އެދުވަސްތައްވެސް މަޑުމަޑުން ފަހަނައަޅާ ތަޖުރިބާތައް ހޯދަމުން ގޮސް ކުރިއެރުމަކަށްފަހު ކުރިއެރުމެއް ހޯދިއެވެ.  މިއަދު އެހިތްދަތި ދިރިއުޅުން އޭނާ ބަދަލުކޮށްފިއެވެ. 'ޖެން މޯލްޑިވްސް މާލެ ބައި ޝަންގްރިއްލާ'ގެ ޑިރެކްޓަރ އޮފް ސޭލްސްގެ މަގާމު ފުރަމުން ގެންދާ ޝަފިއްޔާ މިއަދު ހުރި މަގާމަށް އައުމަށް ކުރެވުނު އެދިގު ދަތުރު ހިތްދަތިވި ނަމަވެސް މިއަދު އޭނާއަކީ މުޅިއާއިލާ ފަހްރުވެރިވާފަދަ ދަރިއެކެވެ. ޤައުމުގެ ޒުވާނުން ހާއްސަކޮށް ގިނަ އަންހެން ކުދިންގެ އިންސްޕިރޭޝަނެކެވެ. އޭނާއަށް ކިޔަވައި ދިން ސުކޫލުގެ ޓީޗަރުންނާއި ގައުމުވެސް އޭނާއާއި ދޭތެރޭ ފަޚުރުވެރިވެއެވެ. ހުރިހާ ކަމަކީވެސް އޭނާގެ ނުގުޑާފަދަ އަޒުމާއި ކެރުމެވެ.

ޝަފިއްޔާ އެންމެނަށް ދޭން ބޭނުންވާ މެސެޖެއް އެބައޮތެވެ. އެމީހެއްގެ ދިފާއުގައި ބަސްބުނެ ތެދުވަންޖެހޭނީ ހުދު އެމީހެއްކަމެވެ. އަދި ތިމާގެ ދުލުން ބޭރުކުރާ ބަހެއްގެ ސަބަބުން އެހެންމީހެއްގެ ދިރިއުޅުމަށް އޭގެ ފުންއަސަރު ކުރާނީ ކޮންއިރަކު ކޮންހިސާބަކުން ކަމެއް ނޭންގެއެވެ. ވީމާ ތިމާބުނާ ބަހަކީ އެހެންމީހެއްގެ ފަރާތުން ތިމާއަށް އެބަސް ރައްދުވެ ހިތުގައިޖެހޭ ބަހަކަށް ވާނަމަ އެހެން އިންސާނަކަން އެފަދަ ބަހަކުން މުހާތަބު ނުކުރުމެވެ.