މިއީ އަހަރެމެން ދިވެހިންގެ ތެރޭގައި ވަރަށް ގިނައިން ދެކެވޭ ވާހަކައެކެވެ. ފުރަތަމަވެސް ބައްދަލުވާ ހިނދު މަސައްކަތް ކުރަނީ ކޮންތަނެއްގައިތޯ ސުވާލުކުރެއެވެ. ވަޒީފާއަކަށް ނުގޮސް ގޭގައި ދަރިން ބަލަން ހުންނަނީއޭ ބުނުމުން ގިނަ މީހުންނަށް އެހާ އަޑުއަހަން ފަސޭހައެއް ނުވެއެވެ. ވަޒީފާއަކަށް ނުގޮސް ގޭގައި ހަމަ ހުންނަނީތޯ ސުވާލު ކުރެއެވެ. ދިރިއުޅެނީ ހަމައެކަނި ފިރިމީހާއަށް ލިބޭ އެއްޗަކުންތޯ ބަލަން ބޭނުންވެއެވެ. ދިރިއުޅުމުގެ ކަންކަން ހަމަޖައްސަނީ ތިހެން ކިހިނެއްތޯ އަހާ އަދި ނިންމާލަނީއެއް ނޫނެވެ. މިފަދަ ޒަމާނެއްގައި ގޭގައި ދަރިންބަލަން ހުރެގެން ލިބޭނެ މާބޮޑު ކުރިއެރުމެއް އޮތް ކަމަކަށް ޚުދު އަހަރެމެން ދިވެހިންނަށް ޤަބޫލެއް ނުކުރެވެއެވެ. މިއީ ވަޒީފާއަށް ނުގޮސް 24 ގަޑިއިރު ދަރިންގެ ޚިދުމަތުގައި އެތައް ޤުރުބާނީއެއް ވަމުން އަންނަ މައިންނަށް އެންމެ ގިނައިން ރައްދުވާ އެއްވާހަކައެވެ. މިދައްކަނީ އަމިއްލަ ނަފްސަށްވުރެ ދަރިންގެ ޙައްޤުތައް ކުރިއަށްލާ ގޭގައި ދަރިންގެ ޙައްޤުގައި ދިރިއުޅުމުގެ ހުރިހާކަމެއް ޤުރުބާންކޮށްގެން އުޅޭ މައިންގެ ވާހަކައެވެ.

މަސައްކަތް ކުރާތަން އަހާލުމުން ވަޒީފާއަށް ދާކަމަށް ބުނާ ހިސާބުން ދަރިންނަށް ވަގުތު ދެމުން ވަޒީފާއަށްގޮސް ތިހެން އުޅެވޭތޯ ސުވާލު އުފައްދައެވެ. ދަރިންގެ ކަންކަން ކުރަން އެހެންމީހުންނަށް ދޫކޮށްލަން ހިތަށް ކެތްވޭތޯ އަހާ، ފާޑުކިޔުންތައް ރައްދުކުރެއެވެ. މިއީ ދަރިންނަށް ރަނގަޅުގޮތް ހޯދައިދިނުމުގެ މަޤްޞަދުގައި ކެނޑިނޭޅި ބުރަމަސައްކަތް ކުރަމުން ވަޒީފާއަށް ދަމުން ދިރިއުޅުމުގެ އެހެނިހެން ކަންކަމާއިއެކު ދިރިއުޅުން އާރާސްތު ކުރަމުން އަންނަ މައިންނަށް ރައްދުކޮށް ދައްކާ ވާހަކައެވެ.

ދިރިއުޅުމުގެ ހާލަތު ހުންނަގޮތުން ފަހަރުގައި ކޮންމެ މީހަކީ ދަރިންބެލުމަށް ގޭގައި ވަޒީފާއަކަށް ނުގޮސް ހުރެވޭނެ މަންމައެއް ނޫނެވެ. އަދި މިއަދުގެ މިތަރައްޤީވެ ތަހުޒީބުވެފައިވާ ދުނިޔޭގައި އެމީހަކު ކުރިއަށް ދިއުމަށް އިޚްތިޔާރުކުރާ ދާއިރާއަކުން ކުރިއަށް ދިއުމުގައި ކެނޑިނޭޅި ކުރާ ބުރަ މަސައްކަތަކީ، އަންހެނަކަށް އަދި މަޔަކަށް ވުމުން ހުރަހެއް އޮންނަން ޖެހޭނެ ކަމެއްނޫނެވެ. ތަޢުލީމީ ޙަޔާތް ނިންމާ ހިސާބުން ފެށިގެން ދެކެމުންދާ ހުވަފެނުގައި ކުލަޖެއްސުމަށްޓަކައި މަޔަކަށްވެ ހުރެ ކުރަމުންދާ ބުރަ މަސައްކަތް އިންތިހާއަށް ބުރައެވެ.

Advertisement

ވަޒީފާއަށް ދަމުން ދަރިންގެ ކަންކަން ކުރުމަކީ މަސައްކަތުގެ ބުރަ މިފަދަ ޒަމާނެއްގައި އެހާ ފަސޭހަކަމެއް ނޫނެވެ. އޮފީހުގެ ހަތަރުފާރުން އެތެރެއަށް ވަނުމާއިއެކު އަމިއްލަ ދިރިއުޅުމުގެ ކަންކަމާއި މަސައްކަތުގެ މާހައުލުގެ ކަންކަން ވަކިކުރަންޖެހެއެވެ. އޮފީހުގައި ކުރާ މަސަކަތުގެ ސަބަބުންނާއި ހޭދަކުރާ ވަގުތުތަކުގެ ސަބަބުން ސިނކުޑިއަށް ލިބިފައިވާ ވަރުބަލިކަމާއި އެކުވެސް ގެއަށް އެނބުރިގޮސް ދަރިންގެ ކަންކަން ނިންމާ ވަގުތު ހޭދަކުރަން ކޮންމެ މަޔަކުމެ ބޭނުންވެއެވެ. ލިބިފައިވާ ވަރުބަލިކަމާއި އަމިއްލަ ނަފްސަށް ވަގުތުކޮޅެއް ބޭނުންވާކަމުގެ އިޙްސާސް ކޮށްލެވެނީ ދަރިންކޮޅުގެ ކަންކަންކޮށް ދަރިން ނިދާ ހިސާބުންނެވެ.

ހަގީގަތުގައި ވަޒީފާއަށްދާ މައެކޭ ގޭގައި ދަރިންބަލަން ހުންނަ މައެކޭ ކުރާ މަސައްކަތުގައާއި ވަމުން އަންނަ ޤުރުބާނީ އަދި ދަރިންނަށްޓަކައި އުފުލަމުންދާ ބުރައިގެ ތަފާތުކަމެއް ނެތެވެ. ދުނިޔޭގެ މިތަރައްގީ ވެފައިވާ މުއާސަލަތުގެ އެހީގައި ގޭގައި ކުދިން ބަލަންތިބެވެސް އެކިއެކި މަސައްކަތްތައް ކުރަމުން އަންނަ މައިންގެ އަދަދު މަދެއްނޫނެވެ. އަދި ހަމައެހެންމެ ކިތަންމެ މޮޅަށް ކިޔަވައި، ވަޒީފާގެ މާހާއުލުގައި ކުރިއަށް ދެވޭނެ ގިނަ މަގުތަކެއް ތަނަވަސް ވެފަހުރިކަމުގައި ވިޔަސް ދަރިންނަށްޓަކައި، އަދި ދިރިއުޅުމުގައި އެނޫން އެހެން ގޮތެއް ނެތުމުގެ ސަބަބުން، އެކަން ޤުރުބާންކޮށް ގޭގައި ތިބޭ މައިންވެސް ގިނައެވެ. ހަމައެހެންމެ ދަރިން ބެލޭނެ މާބޮޑު ގޮތެއް ނެތް ކަމުގައިވިއަސް ފައިސާ ހޯދޭނެ ލިބޭނެ އިތުރު މަގެއް ނެތުމުން، ވަޒީފާއަށް ދާން މަޖުބޫރު ވެފައިވާ އެކަނިވެރި މައިން ކުރަމުންދާ މަސައްކަތުގެ ވާހަކަ ދައްކަން ޖެހެއެވެ.

ތުއްތު ދަރިފުޅު ދުނިޔެއަށް އުފަންވުމާއިއެކު މައެއްގެ ދިރިއުޅުން އެއްގޮތަށްވުރެ ގިނަ ގޮތްގޮތުން ބަދަލުވެގެން ދެއެވެ. އެއީ ގޭގައި 24 ގަޑިއިރު ދަރިން ބަލަން ހުރެގެން ނުވަތަ ވަޒީފާއަށް ގޮސްގެން ނިންމޭނެ ކަމެއް ނޫނެވެ. އެހިސާބުން އާމްދަނީ ހޯދޭނެ އިތުރު ގޮތްތައް ވިސްނައެވެ. މުޖުތަމައަށް ކުއްޖާ ބަލައިގަންނާނެ ދަރިޔަކަށް ހެދޭނެ އެކިގޮތްގޮތް ބަލައެވެ. މުސްތަޤްބަލަށްޓަކައި ހުވަފެންތަކެއް އެދަރިންނާ ދޭތެރޭ ކުރެވެން ފަށައެވެ. ދިރިއުޅުމުގައި އަންހެނަކަށް ކުރިމަތިކުރުވާ އެންމެ އުނދަގޫ އެއްޙާލަތާއި ކުރިމަތިލާން މިޖެހެނީ މިހިސާބުންނެވެ. ވަޒީފާއާއި، ކުރިއެރުމާއި ދެކޭ ހުވަފެންތައް ހަގީގަތަކަށް ހެދުމަށް މިއުނދަގޫ ޙާލަތުގައިވެސް ތެދުވެ ކުރިއަށް ދާނީތޯ ސުވާލު ކުރެވެއެވެ. މިއީ ހަގީގަތުގައި ދެމަފިރިޔަކު ނުވަތަ މަޔަކު އިޚްތިޔާރު ކުރަންޖެހޭ އަމިއްލަ ކަމެކެވެ.

ސުވާލުތައް އޮއްސާލުމުގެ ކުރިން ފުރަތަމަ ވިސްނާލަންވީ މި ކުރެވެނީ ކީއްކަމާމެދުއެވެ. އެހެން މީހެއްގެ އަމިއްލަ ދިރިއުޅުމުގެ މިފަދަ ވާހަކަތައް އަހާއިރު އަނެކާގެ ހާލަތު ހުރިނެތް ގޮތެއް ނޭނގި ސުވާލުބޮނޑި އޮއްސާލުމުން، ސުވާލު ކުރިމަތިވާ މީހާގެ ހިތަށް އަރާ ފައިބައިގެން ދާނެ އެއްޗިއްސާމެދުއެވެ. މިއީ މި މުޖުތަމައުން ރަނގަޅުކޮށްލަން ޖެހިފައި އޮތް ކަމެއް ނޫންތޯއެވެ.