އީމާން ކަމަށްފަހު އެންމެ ބޮޑު ނިޢުމަތަކީ، ސިއްޙަތު ސަލާމަތުން ހުރުމާއި އަމާންކަން ލިބިގެން ވުމެވެ. އަމާންކަމަކީ، ހަޔާތުގެ އެންމެ މުހިންމު ބަހާއެވެ. އެއާ ނުލައި، ކުރިއެރުމެއް ނުލިބޭނެއެވެ. އެއީ ހިތްތަކަށް ހަމަޖެހުމާއި، އުފާވެރިކަން ގެނެސްދޭ އެންމެ ހެޔޮ ފަރުވާއެވެ.
އަމާން ވެއްޓެއްގައި ނަފުސުގެ ރައްކާތެރިކަން އޮންނާނެއެވެ. އަނބިދަރީންނާއި މުދަލުގެ މައްޗަށް ކަންބޮޑުވާކަށް ނުޖެހޭނެއެވެ. އަބުރާއި ޢިއްޒަތާއި މެދު ބިރުގަންނާކަށް ނުޖެހޭނެއެވެ. ހައްގުތަކުން މަހުރޫމްވެދާނެތީ ފިކުރުކުރާކަށް ނުޖެހޭނެއެވެ. މިފަދަ ފުރިހަމަ ސިފަތަކެއް އެކުލެވިގެންވާ ދިރިއުޅުމަކަށް މަގުދައްކާ ނިޒާމަކީ ހަމައެކަނި އިސްލާމީ ނިޒާމެވެ.
" އަމާންކަމެއް ނެތް މުޖުތަމަޢެއް އެއްވެސް މައިދާނެއްގައި ތަރައްގީއެއް ނުވާނެ. ޖާނާއި މާލު ރައްކާތެރިއެއް ނުކުރެވޭނެ. އަބުރާއި ޢިއްޒަތް ހިމާޔަތް ނުކުރެވޭނެ. އެފަދަ ވެށްޓެއްގައި ދިރިއުޅޭ ބަޔަކަށް ފުރިހަމަ ސިއްޙަތާއި ތަނަވަސްކަމުގެ އުފަލެއް ނުލިބޭނެ. އަބަދުމެ ތިބެން ޖެހޭނީ ކަންބޮޑުވުމާއި، ހާސްކަމުގެ ތެރޭގަ. މިއާ ޚިލާފަށް އަމާންވެށްޓެއްގެ އަފްރާދުން ޤާބިލުކަން ހުރި ދާއިރާތަކުގައި ތަރައްގީވާނެ. މޮޅެއް ދެރައެއް ނެތި މުޅި މުޖުތަމައު ކުރިއަރާނެ".
އަމާންވެށްޓެއްގެ އަފްރާދުން ޤާބިލުކަން ހުރި ދާއިރާތަކުގައި ތަރައްގީވާނެއެވެ. މޮޅެއް ދެރައެއްގެ ތަފާތެއް ނެތި މުޅި މުޖުތަމައު ކުރިއަރާނެއެވެ. ދުނިޔެ އާއި އާޚިރަތުގެ ގޮވަތި އާރާސްތުކުރުމަށް ކެނޑިނޭޅި މަސައްކަތް ކުރާނެއެވެ.
މީސްތަކުންގެ މެދުގައި އަމަން އަމާންކަން ދެމި އޮންނާނީ، އިސްލާމް ދީނަށް ތަބާވެ ހެޔޮ އަމަލުކުރުންމަތީ ސާބިތުވި މިންވަރަކުންކަން ދަންނާށެވެ.
" ކީރިތި ރަސޫލާ ﷺ ގެ ސުންނަތުން ޢިބްރަތް ލިބިގަނެ، މުޖުތަމަޢަކީ ހުރިހާ ގޮތަކުންވެސް އަމާންތަނަކަށް ހެދިއްޖެނަމަ އެންމެހައި މީސްތަކުން މަސްލަހަތުތަކާއި ހައްގުތައް ރައްކާތެރިކުރެވޭނެ. ދެބަސްވުންތަކާއި އަރާރުންތައް މަދުވާނެ. ދޭދޭ ފަރުދުންނާއި ޖަމާއަތްތަކުގެ މެދުގައި އުފެދޭ އަރާރުންތަކާއި ޝަރުޢީ މަހްކަމާތަކުގައި ދެ ޚަސްމުންނަށްވެސް އިންސާފު ލިބޭނެ. ރުޅިވެރިކަމާއި ހަސަދަވެރިކަން ފިލައިގޮސް ބާއްޖަވެރިކަމާއި ހަމަޖެހުން ލިބޭނެ".
ރަސޫލާ ﷺ ހަދީސްކުރެއްވި ބަސްފުޅެއްގެ މާނައިގައިވެއެވެ. "ތިޔަބައިމީހުން އަމިއްލަ ނަފުސަށް ލިބުމަށް އެދޭ ކަމެއް ތިމާގެ އަޚާއަށް ވެސް ލިބުމަށް އެދެފުމަށް ދާންދެން، ތިޔަބައިމީހުން ކުރެ އެކަކުވެސް އީމާނެއް ނުވެއެވެ". މި ހަދީޘްގެ މާނައަށް ބަލާއިރު މުއުމިނުން ވާންޖެހޭނީ އަމާންކަމަށް ލޯބިކުރާ އުޚުއްވަތްތެރި ބަޔަކަށެވެ.
އަމާންކަމަކީ ކޮންމެ ފަރުދެއްގެ ވެސް އަސާސީ ހައްގެކެވެ. "ދިރިހުރުމުގެ ހައްގާއި މިލްކުވެރިކަމުގެ ހައްގަކީ އިންސާނާގެ އެންމެ އަސާސީ ދެ ހައްގެވެ. ނަމަވެސް މިހައްގުތަކަށް ހުރުމަތްތެރިކޮށް ހިތަނީ ކިތައް މުސްލިމުން ހެއްޔެވެ؟ ވައްކަންކޮށް ފޭރިގެން މީސްތަކުންގެ މުދާތައް ނުހައްގުން ކަނީ ކިތައް މީހުން ހެއްޔެވެ؟ ﷲ ތައާލާ ހުރުމަތްތެރި ކުރައްވާފައިވާ ނަފްސުތައް ހައްގަކާ ނުލައި މަރަނީ ކިތައް މީހުން ހެއްޔެވެ؟ އެންމެންގެ ލޯމަތީގައި އަނިޔާކޮށް މީހުން މަރަމުން ދާއިރު ކުޅިބަލަން ތިބެނީ ކިތައް މީހުން ހެއްޔެވެ؟ ފޮޓޯ ނަގައި ވީޑިއޯ ކޮށް ސޯޝަލް މީޑިއާ އަށް ލުން ނޫން ކަމެއް އެފަދަ މީހުން ކުރާތަނެއް ނުފެނެއެވެ. މިއީ ރަހުމެއް ހުރި ކޮންމެ އިންސާނަކު ކަރުނަ އަޅައި ރޯން ޖެހޭ ވަރުގެ ހިތާމަ ހުރި ކަމެކެވެ.
މައުލޫމާތު: ހުކުރު ޚުތުބާ
