ވިޔަފާރި ކުރަން ދާއިރު ޕްލާސްޓިކް ކޮތަޅެއް ގެންދިއުމުގެ ބަދަލުގައި ތިމާވެއްޓާއި ރައްޓެހި ކޮތަޅެއް ގެންދިއުމަކީ ވަރަށް މުހިންމުކަމެކެވެ. އެސްޓީއޯ ޕީޕަލްސް ޗޮއިސް އަށް ވިޔަފާރި ކުރުމަށްދާ މީހުންވެސް ޓޯޓް ބޭގް/ ފޮތިކޮތަޅު ގެނައުމަށް އެސްޓީއޯގެ ޓްވިޓަރ އެކައުންޓުގައި އާންމުކުރި ޕޯސްޓެއްގައި ވެސް ވަނީ އެދިފައެވެ.
އެސްޓީއޯ އިން 'ޒީޓައިމްސް' އަށް މައުލޫމާތު ދިންގޮތުގައި އަމިއްލައަށް ކޮތަޅު ނުގެންދާނަމަ ވިޔަފާރި ކުރާ ފަރާތްތަކުން ޖެހޭނީ އެމާޓުން ކޮތަޅު ގަންނާށެވެ. ކަރުދާސް ކޮތަޅެއް 2 ރުފިޔާ އަށް ވިއްކާއިރު، ޕްލާސްޓިކް ކޮތަޅެއް ވިއްކަނީ 2.5 ރުފިޔާ އަށެވެ.
" މި ޖުލައި މަހުގެ 17 ވަނަ ދުވަހުން ފެށިގެން މިގޮތަށް އަމަލުކުރުމުގެ ބޭނުމަކީ ޕްލާސްޓިކް ބޭނުންކުރާ މިންވަރު މަދުކުރުމަށް ބާރުއެޅުން. އަދި ވިޔަފާރި ކުރަން އަންނައިރު އެމީހެއްގެ އަމިއްލަ ފޮތިކޮތަޅެއް ގެނައުމަށް އާދަކުރުން".
ވިޔަފާރިކުރާ ކޮންމެ ފަހަރަކު ކޮތަޅު ގަތުމަށް ބޭކާރު ރުފިޔާ ޚަރަދު ކުރުމަށް ބޭނުން ނުވާނަމަ ފަހަންވީ ފޮތި ކޮތަޅެކެވެ. ޕްލާސްޓިކް ކޮތަޅާއި އަޅާބަލާއިރު ފޮތިކޮތަޅު ގިނަދުވަހަށް ބޭނުންކުރެވޭނެއެވެ. އަދި އެއްފަހަރު ބޭނުންކޮށްފަ ދޮވެލެވިދާނެއެވެ. ގިނަ ދުވަހަށް ބޭނުންކުރެވޭ ގޮތަށް ތައްޔާރުކޮށްފަ ހުންނަ ފޮތިކޮތަޅުތައް އަގުހެޔޮކޮށް ވިއްކަންވެސް ހުރެއެވެ.
އެއްފަހަރު ބޭނުންކޮށްފައި އުކާލާ ވައްތަރުގެ ޕްލާސްޓިކް ރާއްޖެ އެތެރެކުރުމާއި، އުފެއްދުމާއި، ބޭނުންކުރުން ހުއްޓާލުމަށް ދަނީ މަސައްކަތްތަކެއް ކުރެވެމުންނެވެ. މިކަން ކާމިޔާބުވެއްޖެނަމަ ރާއްޖެއަށް އެތެރެކުރެވޭ ޕްލާސްޓިކްގެ އަދަދު ވަރަށްބޮޑުތަނުން މަދުވެގެންދާނެއެވެ.
