ބައިނަލްއަގްވާމީ ހެޕަޓައިޓިސް ދުވަހަކީ ޖުލައިމަހުގެ 28 ވަނަ ދުވަހެވެ. މިދުވަސް ފާހަގަކުރަމުން ދާއިރު މިވައިރަސްގެ ނުރައްކާތެރިކަން އެތެރެހަށީގެ ބަލިތަކުގެ ޚާއްސަ ޑޮކްޓަރ މުހައްމަދު އަލީ ވަނީ ހިއްސާކުރައްވާފައެވެ. ސޯޝަލްމީޑިއާގައި އާންމުކުރެއްވި މައުލޫމާތަށް ބަލާއިރު، ހެޕަޓައިޓިސް ވައިރަސް ގެ ސަބަބުން މޭގަނޑު ދުޅަވެ ހަލާކުވުމާއި ގުޅިގެން ކޮންމެ 30 ސިކުންތަކު މީހަކު މަރުވެއެވެ.
ވައިރަލް ހެޕަޓައިޓިސް ޖައްސާ 5 ވައްތަރެއް ހުންނައިރު، އޭގެތެރޭގަ ހިމެނެނީ ހެޕަޓައިޓިސް އޭ. ބީ. ސީ. ޑީ. އީ ވައިރަސް އެވެ. ބަނޑުގައި އޮންނަ ކުޑަދަރިފުޅަށް ވެސް މަންމަގެ ފަރާތުން މި ވައިރަސް ވާސިލުވެއެވެ.
ހެޕަޓައިޓިސް އޭ އަށް ދެވޭނެ ފަރުވާއެއް ނެތެވެ. ފެތުރެނީ ޖަރާސީމުގެ އަސަރުކޮށްފައިވާ ފެނާއި ކާތަކެތިންނެވެ. ރައްކާތެރިވުމަށް ވެކްސިން ޖެހިދާނެއެވެ. އަދި ސާފުތާހިރުކަމަށް އިސްކަންދޭން ވާނެއެވެ.
ހެޕަޓައިޓިސް ބީ އަށް ބޭނުންކުރެވޭނެ ބޭސް އެބަހުއްޓެވެ. ފެތުރެނީ ބަލިޖެހިފަ ހުރި މީހެއްގެ ހަށިގަނޑުން ނިކުންނަ ދިޔަ ތިމާގެ ހަށިގަނޑަށް ވާސިލުވެގެންނެވެ. ރައްކާތެރިވުމަށް ލޭ އެޅުމުގެ ކުރިން ޓެސްޓްކޮށް، ވެކްސިންޖަހާ ސާފުތާހިރުކޮށް އުޅުން ހިމެނެއެވެ.
ހެޕަޓައިޓިސް ސީ އަށް ބޭނުންކުރެވޭނެ ބޭސް އެބަހުއްޓެވެ. ފެތުރެނީ އިންޖެކްޝަން ބޭނުންކޮށްގެން މަސްތުވާތަކެތި ބޭނުންކުރާ ފަރާތްތަކާއި ހޮސްޕިޓަލްތަކުގަ ބޭނުންކުރާ އާލާތްތައް ރަނގަޅަށް ސްޓެރެލައިޒްނުކޮށް ބޭނުން ކުރުމުންނެވެ. ރައްކާތެރިވުމަށް ލޭ އެޅުމުގެ ކުރިން ޓެސްޓްކުރުމާއި، މަސްތުވާތަކެތި ބޭނުންނުކުރުމާއި، ސިއްޙީ ހިދުމަތްދޭ ތަންތަނުގަ ބޭނުންކުރާ ސާމާނު ރަނގަޅަށް ސްޓެރެލައިޒް ކުރުން ހިމެނެއެވެ.
ހެޕަޓައިޓިސް ޑީ އަށް ވެސް ބޭނުންކުރެވޭނެ ބައެއް ބޭސް އެބަހުއްޓެވެ. ފެތުރެނީ ޖަރާސީމު ހުރި ލޭގެ ޒަރީއާއިން ނުވަތަ އިންޖެކްޝަން ޖެހުމުގެ ތެރެއިން ނުވަތަ ލޭ އެޅުމުގެ ތެރެއިންނެވެ. ރައްކާތެރިވުމަށް ލޭ އެޅުމުގެ ކުރިން ޓެސްޓްކޮށް، މަސްތުވާތަކެތި ބޭނުންނުކުރުން ހިމެނެއެވެ.
ހެޕަޓައިޓިސް އީ އަށް ވެސް ބޭނުންކުރެވޭނެ ބައެއް ބޭސް އެބަހުއްޓެވެ. ފެތުރެނީ ޖަރާސީމު ހުރި ލޭ އަނެކާގެ ހަށިގަނޑުގެ ލޭގެ ތެރެއަށް ދިއުން ނުވަތަ ޖިންސީ ގުޅުން ހިންގުން ނުވަތަ ކުޑަ ދަރިފުޅު ވިހެއުމުގެ ތެރޭގައި ކުޑަދަރިފުޅަށް. ރައްކާތެރިވުމަށް ކުރެވޭނެ ކަންތައްތަކުގެ ތެރޭގައި ސާފުތާހިރުކަމަށް އިސްކަންދީ ކައިވެނިން ބޭރުން ޖިންސީ ގުޅުން ނުހިންގުން ހިމެނެއެވެ.
