އަހްމަދު މުޖުތަބާ ނުވަތަ އެކުވެރިންގެ ނަމުންނަމަ މުޖޭ، އުމުރުން 39 އަހަރުގައި ކުއްލި ގޮތަކަށް މިއަދު ވަކިވުމާއި ގުޅިގެން، އާއިލާއާއި ރައްޓެހިން އަދި އޭނާއާއެކު މަސައްކަތްކުރި ފަރާތްތަކުން ތިބީ ފުން ހިތާމައެއްގައެވެ. އޭނާ ނިޔާވީ، ގއ.ދެއްވަދޫގައި ހުންނަވަނިކޮށް ހުންއައިސް ބަނޑުގައި ރިއްސާތީ ފަރުވާއަށް ގދ.ތިނަދޫ ހޮސްޕިޓަލަށް ގެންދިއުމަށްފަހު އިތުރު ފަރުވާ ހޯދުމަށް މާލެގެނެސް އައިޖީއެމްއެޗްގައި ފަރުވާ ދެމުން ދަނިކޮށެވެ.

ޕްރޮކިއުމަންޓް ޕޮލިސީ ޑިޕާޓްމަންޓުގެ ޗީފް ޕްރޮކިއުމަންޓް އެގްޒެކެޓިވްގެ މަގާމު ފުރުއްވަމުން ގެންދެވި މުޖުތަބާ، ފިނޭންސް މިނިސްޓްރީއާއި ގުޅިވަޑައިގަތީ 2008 ވަނަ އަހަރުއެވެ. ފާއިތުވެދިޔަ 14 އަހަރު ދައުލަތުގެ ޕްރޮކިރުމަންޓް ނިޒާމު ހަރުދަނާ ކުރެއްވުމުގައި އެންމެ އިސް ދައުރެއް އަދާކުރެއްވި އެއްބޭފުޅަކީވެސް މުޖުތަބާއެވެ. އަދި އޭނާއަކީ ޕްރޮކިއުމަންޓްގެ މަސައްކަތުގައި ހަރަކާތްތެރިވާ މުވައްޒަފުންގެ ކުރިއެރުމަށް މަސައްކަތްކޮށް އެދާއިރާއިން މީހުން ތަމްރީނު ކުރުމުގައި އެތައް މަސައްކަތްތަކެއް ކުރައްވަމުންއައި ބޭފުޅެކެވެ.

" މުޖޭގެ ނަމާއި ނުލާ ދައުލަތުގެ ޕްރޮކިއުމަންޓް ނިޒާމާއި ގުޅޭގޮތުން އެއްވެސް ވާހަކައެއް ދެއްކެން ނޯންނާނެ. އެއީ އެކުގައި މަސައްކަތްކުރަން ފަސޭހަ، އެހެންމީހުން ކުރިއެރުމަށް މަސައްކަތްކުރި ވަރަށް ހިތްވަރުދޭ ވެރިއެއް. އަނެއްހެން ބުނަންޏާ ކުރިއަށް މިދަނީ މުޖޭ މަސައްކަތުގައި ކުރިއަށްދާ މަގުން ފިލާވަޅު ހޯދަމުން". އޭނާއާއެކު ގިނަ ދުވަސްތަކެއް އެކުގައި މަސައްކަތްކުރި މީހަކު ބުންޏެވެ.

Advertisement

އޭނާ ބުނި ގޮތުގައި މުޖުތަބާ ކޮށްދީފައިވާ އަގުހުރި ހިދުމަތްތައް މިއަދު ފެންނަން އެބަހުއްޓެވެ. އެގޮތުން އެންމެ ފަހުން ކުރައްވާފައިވާ މުހިންމު މަސައްކަތެއްގެ ގޮތުގައި "ޕްރޮކިއުމަންޓް ސެޓްފިކޭޝަން" ގެ ނަމުގައި ކުރު މުއްދަތެއްގެ ކޯހެއް ފުރިހަމަ ކުރުމުގެ ފުރުސަތު ސަރުކާރުގެ އިދާރާތަކުގައި މަސައްކަތްކުރާ މުވައްޒަފުންނަށް ހުޅުވާލައިގެން ކުރިއަށް ގެންދެވި މަސައްކަތް ފާހަގަ ކޮށްލެވެއެވެ. އަދި މިކޯހުގެ ފުރަތަމަ ބެޗް ވަނީ ނިމިދިޔަ ޖޫންމަހު ކޯސް ފުރިހަމަ ކޮށްފައެވެ. މި ކޯސް ހިންގަމުން ގެންދިޔައީ އެމް.އެން.ޔޫ އާއި ގުޅިގެން މުޖުތަބާ އިސްވެހުރެއެވެ.

"މިއަދަކީ ފިނޭންސްގެ ހުރިހާ މުވައްޒަފުންނަށް ހިތާމަވެރި ދުވަހެއް. މުޖުތަބާ އަކީ ހިތްހެޔޮ، ގާތް ރަހުމަތްތެރިއެއް. މާތް الله މުޖުތަބާގެ ފުރާނަ މަތިވެރިވެގެންވާ ޖަންނަތުލް ފިރުދައުސްގައި ލައްވައި ސުވަރުގޭގެ ދާއިމީ ނިއުމަތް މިންވަރު ކުރައްވާށި އަދި އާއިލާއަށް ކެތްތެރިކަން ދެއްވާށި". މިނިސްޓަރ އޮފް ފިނޭންސް އިބްރާހިމް އަމީރު، ޓުވިޓާގައި ކޮށްފައިވާ ޕޯސްޓެއްގައި ވިދާޅުވިއެވެ.

"މުޖޭއަކީ އޯގާތެރި، ތެދުބަހުން ވާހަކަދައްކާ ހިއްތިރި މީހެއް. އެކުގައި މަސައްކަތްކުރި 14 އަހަރުތެރޭ ދުވަހަކުވެސް މަސައްކަތްކުރުމުގައި ދެބަސްވެ ހިތްހަމަ ނުޖެހިފައެއް ނެތް. ވަރަށް ގާތް ކޮންމެކަމަކާއި ގުޅޭގޮތުންވެސް ވާހަކަ ދައްކާލެވޭ ވަރުގެ އަހްލާގް ރަނގަޅު ރައްޓެއްސެއް އެއީ. މަސައްކަތުގެ އިލްމުހުރި ތަޖުރިބާހުރި ބޭފުޅެއް. ދުވަހަކުވެސް ހިނިތުންވުމާއިއެކު ނޫނީ ވާހަކަ ނުދައްކާ" މުޖުތަބާއާއި އެކު، އެކުގައި ގިނަދުވަސްތަކެއް މަސައްކަތް ކުރެއްވި ދައުލަތުގެ ފައިނޭންޝިއަލް ކޮންޓްރޯލަރ ފާތިމަތު ރަޒީނާ ވިދާޅުވިއެވެ.

މުޖޭއާއި އެކު މަސައްކަތްކުރި މީހެއްގެ ހައިއްސިޔަތުން މުޖޭގެ ހިތްހެޔޮކަމާއި، އެހެންމީހުންގެ ކުރިއެރުމަށް ކޮއްދެއްވާފައިވާ ގިނަގުނަ މަސައްކަތްތައް އަޅުގަނޑަށްވެސް ވަނީ ވަރަށް ކައިރިން ފެނިފައެވެ. މަސައްކަތުގެ މާހައުލުގައި އޭނާގެ އެހީތެރިކަމާއި އެއްބާރުލުން ނުލިބޭ މީހަކު ނުހުންނާނެއެވެ. އަދި އެއީ މިނިސްޓްރީގެ ހުރިހާ މުވައްޒަފުންނާއިވެސް ގާތްގުޅުމެއް ބާއްވާ، އޮފީހުގެ މުވައްޒަފުންނާއި އެކުވެރިންނާއި ސަމާސާ ކުރައްވާ މުޅި ފިނޭންސްގެ މައިތަނބެވެ. 

މިއަދު މިގައުމުން އެގެއްލުނީ ހުނަރުވެރި ގާބިލު ޒުވާނެކެވެ. ހުވަދުއަތޮޅަށާއި މުޅިގައުމަށް އޭނާ ކޮށްދެއްވި ޚިދުމަތްތަކުގެ އަގު މިފަދަގޮތަކަށް އަގު ނުކުރެވޭނެފަދަ ހިންގުތެރި ވެރިއެކެވެ.

މުޖުތަބާގެ ފުރާނައަށް ހެޔޮ ރަހުމަތް މިންވަރު ކުރައްވާ މަތިވެރިވެގެންވާ ޖަންނަތުލްފިރުދައުސްގައި ލައްވާށިއެވެ. ލޮބުވެތި ތުއްތު ބޭފުޅުންނާއި އަނބިކަނބަލުންނާއި ޢާއިލާއަށް ކެތްތެރިކަން ދެއްވާށިއެވެ. އާމީން