މާތް ﷲ ހެއްދެވި ގިނަ މަޚުލޫގުންގެ ތެރެއިން އިންސާނާ ވަނީ މާތްކުރައްވައި މަތިވެރިކުރައްވައިފައެވެ. އިސްލާމް ދީނުގެ ނަޒަރުގައި އިންސާނުންގެ ނަފްސަކީ ވަރަށްބޮޑަށް ހުރުމަތްތެރިވެގެންވާ އެއްޗެކެވެ. ހައްގަކާ ނުލައި އިންސާނަކު ޤަތުލު ކުރުމަކީ، އެންމެ ބޮޑެތި ފާފަތަކުގެތެރެއިންވާ ކަމެކެވެ.
" މިމުޖުތަމައުން މި ބޮޑު ފާފައަށް އަރައިގަތުން ދެކެނީ ވަރަށް އާދައިގެ ކުޑަ ކަމެއްގެ ގޮތުގަ. އެއްވެސް ރަހުމެއް ބިރުވެރިކަމެއް ނެތި، ހުރުމަތްތެރިކުރެވިފައިވާ އިންސާނާ މަރާލުމަށްފަހު ދޫކޮށްލަނީއެއް ނޫން. ހަނގުރާމައިގެ ހާލަތުގައި ވެސް ކުރުން ހަރާމް ކުރައްވާފައިވާ އަމަލެއް ކަމުގައިވާ ގުނަވަންތައް ބުރިބުރިކޮށް ވަކިކުރަނީ. މިއީ ކޮންފަދަ އަނިޔާވެރި ކަމެއްހެއްޔެވެ!".
ނުހައްގުން އެންމެ ނަފުސެއްވެސް މަރާލުމަކީ، ހުރިހާ އިންސާނުން މަރާލުންފަދަ ނުބައިކަން ބޮޑު އަމަލެއް ކަމުގައިވަނީ ކީރިތި ޤުރުއާނުގައި ބަޔާންކުރައްވާފައެވެ. ހައްގަކާ ނުލައި މީހުން މެރުމަކީ، މާތް ﷲ ހަރާމް ކުރައްވާފައިވާ ބޮޑު ފާފައެއް ކަމާއި، އެކަމުގެ ސަބަބުން މީހާ ހަލާކުވެގެން ހިނގައިދާނެކަން ބަޔާންކުރައްވައި ރަސޫލުﷲ ހަދީޘް ކުރައްވާފައިވެއެވެ.
މާނައީ: "ތިޔަބައިމީހުން ހަލާކު ކުރަނިވި ހަތް ފާފައިން ދުރުވެ، ރައްކާތެރިވާށެވެ. ދެން އަސްހާބު ބޭކަލުން ދެންނެވިއެވެ. އޭ ﷲ ގެ ރަސޫލާއެވެ. އެއީ ކޮން ކަންތައްތަކެއް ތޯއެވެ. ހަދީޘް ކުރެއްވިއެވެ. އެއީ މާތް ﷲ އާ ޝަރީކު ކުރުމާއި، ސިހުރު ހެދުމާއި، ހައްގުނޫން ގޮތުގައި ﷲ ހުރުމަތްތެރިކުރައްވާފައިވާ ނަފުސެއް މެރުމާއި، ރިބާ ކެއުމާއި، ނުހައްގުން ޔަތީމުންގެ މުދާ ކެއުމާއި، ހަނގުރާމައިގެ މައިދާން ފަސްދީ ފިލަން ދުވުމާއި، އިއްފަތްތެރި މުއުމިނު އަންހެނުންގެ ބޮލުގައި ޒިނޭގެ ތުހުމަތު އެޅުވުމެވެ".
ހައްގަކާ ނުލައި މީހަކު މަރައިފިނަމަ އެމީހެއްގެ ކިބައިން ޤިސާސް ހިފަން ޖެހޭނެއެވެ. ދިރިހުރުމުގެ ހައްގަކީ އިންސާނާގެ އެންމެ އަސާސީ ހައްގެވެ.
" އެންމެންގެ ލޯމަތީގައި އަނިޔާކޮށް، މީހުން މަރަމުން ދާއިރު އަނިޔާ ލިބޭ މީހާގެ ދިފާޢުގައި އެއްވެސް ކަމެއް ނުކޮށް ކުޅިބަލަން ތިބެނީ، ކިތައް މީހުން ހެއްޔެވެ؟. މިއީ ހިތުގައި ރަހުމު ހުރި ކޮންމެ މީހަކު ކަރުނަ އަޅައި ރޯންޖެހޭ ވަރުގެ ހިތާމަހުރި ކަމެކެވެ. އިސާމް ދީނާއި ބައިނަލް އަގްވާމީ މުއާހަދާތަކުގައިވެސް އިންސާނުންގެ ފުރާނަ ހިމާޔަތް ކުރުމުގެ ހައްގު ލިބިދީފައިވެއެވެ. ނުހައްގުން މީހުން މެރުމާއި، މީހުންގެ ނަފުސަށް ގެއްލުން ދިނުން ހުއްޓުވުމަށް އޮތް ނިހާއީ ހައްލަކީ، އިލާހީ ޝަރީއަތް ތަންފީޒުކޮށް ޤިސާސް ހިފުން ކަމުގައި ކީރިތި ޤުރުއާނުގައި ވަނީ އަންގަވާފައެވެ.
މައުލޫމާތު: ހުކުރު ޚުތުބާ
