ޅ. ހިންނަވަރަށް އުފަން އަބްދުﷲ މުހައްމަދު (އަބޭ) އަކީ، ހުޅުމާލޭގައި އަލަށް ހުޅުވި 'ލަ އަމީގޮސް' (LA AMIGOS) ރެސްޓޯރެންޓް ވުޖޫދަށް ގެނައުމުގަ އެންމެ ބުރަކޮށް މަސައްކަތްކުރި ޒުވާން ހިންގުންތެރިއެކެވެ. އަބޭ، ފުޑް އެންޑް ބެވަރޭޖް ދާއިރާގައި މަސައްކަތްކުރާތާ ވަނީ 14 އަހަރު ވެފައެވެ.
ދާއިރާގެ ފެށުން
ގްރޭޑް 10 ނިންމާލި ގޮތަށް ބޭބެގެ އެދުމުގެ މަތިން ކުރިމަތިލީ 'ފޯ ސީޒަން ކުޑަހުރާ' އިން ކުރިއަށްގެންދިޔަ ތަމްރީން ޕްރޮގްރާމަކަށެވެ. އެއް އަހަރު ދުވަހުގެ އެކޯސް ފުރިހަމަ ކުރުމަށްފަހު ކޯހުގެ 32 ބައިވެރިންގެ ތެރެއިން ވަޒީފާގެ ފުރުސަތު ލިބުނު 2 މީހުންގެ ތެރޭގައި އަބޭ ހިމެނުމަކީ އޭނާގެ ކެރިއަރގެ ފެށުމެވެ. ހިތްވަރާއެކު ކުރި މަސައްކަތުން ވަނީ ' ފޯ ސީޒަން ކުޑަހުރާ، ފޯ ސީޒަން ލަނޑާގިރާވަރު، ޝެވަލް ބްލަންކް، ލޯމާ ރިސޯޓް، ފުށިފަރު މޯލްޑިވްސް ގައި ވެސް ވެއިޓަރަކުން ފެށިގެން ތަފާތު މަގާމްތަކުގައި މަސައްކަތްކޮށްފައެވެ.
" ވެއިޓަރެއް، ސްޕަވައިޒަރެއްގެ އިތުރުން އެސިސްޓެންޓް މެނޭޖަރަކަށް ވެސް ރިސޯޓުތަކުގަ މަސައްކަތް ކުރިން. އެއަށްފަހު މާލެ ބަދަލުވީ އޮއިޝީގެ މެނޭޖަރެއްގެ ގޮތުގަ މަސައްކަތް ކުރުމަށް". އަބޭ ބުންޏެވެ.
ވެއިޓަރެކޭ ބުނުމުން ފަޚުރުވެރިވާ އަބޭ ވަނީ އޭނާގެ ބޭބެގެ އެހީތެރިކަމާއެކު އުފަން ރަށުގައިވެސް ޖޫގޯ ވިއްކުމަށް 'ޖޫސް ޖޮއިންޓެއް' ހުޅުވާ އަމިއްލަ ރެސިޕީތަކެއް އެތަނުގައި ތަޢާރަފް ކޮށްފައެވެ. ގިނަބައެއްގެ ސަޕޯޓް އެތަނަށް އެއިރު ވަނީ ލިބިފައެވެ. އެއަށްފަހު އަބަދުވެސް ދެކެމުން އައި ހުވަފެނަކީ އަމިއްލަ ރެސްޓޯރެންޓެއް ހުޅުވުމެވެ.
ލަ އަމީގޮސް ފެށުން
މީގެ 3 މަސްކުރިން ހުޅުމާލޭގެ ފުރަތަމަފިޔަވަހީގެ ރަބަރުގަސްމަގު 8 ނަންބަރު ގޯޅީގަ ހުޅުވި ލަ އަމީގޮސް ރެސްޓޯރެންޓަކީ 'މެކްސިކަން ފުޑްސް' އަށް ޚާއްސަކޮށްގެން ހުޅުވި ތަނެކެވެ.
"މެކްސިކަން ފުޑްސް އަށް ޚާއްސަ ހަމައެކަނި ރެސްޓޯރެންޓް މިއީ ހުޅުމާލޭގަ ހުޅުވި. އެންމެ ގިނަ މީހުން ބޭނުންވާގޮތަށް ކާއެއްޗެހި ލިބެން ހުންނާނީ. މިހާތަނަށް ހުރިހާ ކަސްޓަމަރުން ވަރަށް ހިތްހަމަޖެހޭ. 60 އިންސައްތަ ކަސްޓަމަރުންނަކީ އާންމުކޮށް އަންނަ މީހުން. މެކްސިކަން ފުޑްސް އާއި ބަލާއިރު އަގު ހެޔޮވާނެ. ސޯޝަލް މީޑިއާ ރިވިއުވެސް ވަރަށް ރަނގަޅު". އަބޭ ހިތްހަމަޖެހުމާއެކު ފާހަގަކުރިއެވެ.
ހުކުރު ދުވަސް ފިޔަވާ ކޮންމެ ދުވަހަކު މެންދުރު 12 އިން ރޭގަނޑު 12 އަށް އަދި ހުކުރު ދުވަހު 2 ޖަހާއިރު ހުޅުވާ މިރެސްޓޯރެންޓުން ލިބެންހުރި ބާވަތްތަކުގެ ތެރޭގައި މެކްސިކަން ފުޑްގެ މެއިން ފުޑްސް، ޓާކޯސް، ނާޗޯސް، ކަސަޑިއްޔާ، ޗިމިޗަންގާ، ބްރިޓޯ، ލޯޑެޑް ފްރައިސް، ފަހިތާ، ކްއެސޯ ރައިސް، ޗޫރޯސް، ޕައި އެމްޕަނާޑާ ހިމެނެއެވެ. މީގެ އިތުތުން ތަފާތު ބާވަތުގެ ބާގަރސް، ސޭންޑްވިޗްސް އަދި ޕާސްތާސް ހިމެނެއެވެ. އެގޮތުން، ކަސްޓަމަރުން ޚިޔާރުކުރާ މީޓެއްގެ ބާބަކިއު، ގްރިލްޑް، ޑަބަލްޕެޓީ ބާގަރ ލިބެން ހުރެއެވެ. މިކެއުންތައް އިތުރަށް ފުރިހަމަކޮށްދެނީ ތަފާތު ވައްތަރުގެ މީރު ބުއިންތަކުންނެވެ.
" މީހުން ގަޔާވާކަހަލަ ތަފާތު ޑްރިންކްސް ލިބެން ހުންނާނެ. އަޅުގަނޑުގެ އެންމެ ބޮޑު ބޭނުމަކީ ޚިދުމަތް ހޯދާ މީހުން ހިތްހަމަޖެހޭ ފަދަ މީރު، ފެންވަރު ރަނގަޅު ކެއުންތަކެއް ފޯރުކޮށްދިނުން. އަދި ރެސްޓޯރެންޓް ހުޅުވުމުގަ ބެލީ ހަމަޖެހިލައިގެން ވާހަކަ ދައްކާލަން ތިބެވޭނެ އަޑުމަޑު ތަނެއް ހަމަޖެއްސުން. ޑޭޓްސް ތަކަށް އަންނަ މީހުންނަށް މިތަން މިއީ ރަނގަޅުތަނެއް. އަދި ކޮފީ ބޯން އަންނަ މީހުންނަށް އޯޕަން އޭރިއާގަވެސް ތިބެވޭނެ". އަބޭ ބުންޏެވެ.
ލަ އަމީގޮސް ގެ މީރު އުފެއްދުންތަކުގެ ތަފްސީލް ފޭސްބުކް ޕޭޖް laamigosmv އަދި އިންސްޓަގްރާމް ޕޭޖް la_amigos.mv އިން ލިބެން ހުރިއިރު، ލަ އަމީގޮސް ގެ ނަންބަރު 7437427 އަށް ގުޅައިގެން އޯޑަރު ދެވޭނެއެވެ.
އިންޓަވިއު ނިންމާލަމުން އަބޭ ވަނީ އޭނާގެ ކުރިއެރުމަށް ފެށުނީއްސުރެ އެންމެ ބޮޑު އެހީތެރިކަމެއް ވެދިން ބޭބެ އިބްރާހިމް ރިޝްވާން އަދި އަންހެނުން މަޖީ އަށް ވަރަށް ޚާއްސަ ޝުކުރެއް އަދާކޮށްފައެވެ. އަދި އާއިލާގެ މެންބަރުންނާއި އެކި ގޮތްތޮތުން އެހީތެރިކަން ފޯރުކޮށްދިން އެންމެންނަށް ޚާއްސަ ޝުކުރެއް އަދާކޮށްފައެވެ.
އަބޭގެ އުންމީދަކީ ލަ އަމީގޮސް ފުޅާކޮށް އިތުރު އައުޓްލެޓެއް ހުޅުވާ ދިވެހިންނާއި ބޭރު މީހުންނަށް ޚިދުމަތް ދިނުމުގަ ދެމިހުރުމެވެ. އަދި ރާއްޖޭގައި ފައިން ޑައިނިންގެ ޚިދުމަތް ދޭ ފުރަތަމަ ރެސްޓޯރެންޓްތަކުގެ ނަންތަކުން ޖާގަ ހޯދުމެވެ.
