ނެޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން އޮފް މޯލްޑިވްސް (އެންއެޗްގޭމް) އިން ބޭއްވި އެނުއަލް ޖެނެރަލް މީޓިންގައި ވަނީ މި ޖަމްއިއްޔާގެ އާ ލޯގޯ އާއި ސްލޯގަން ދައްކާލާފައެވެ. އާ ސްލޯގަން އަކީ 'އައިއޭމް މޯލްޑިވްސް' އެވެ.
ރާއްޖޭގެ ގެސްޓްހައުސްތައް އިސްތިހާރު ކުރުމަށް އެންއެޗްގޭމް އިން ހަރަކާތްތަކެއް ރާވަމުން އަންނައިރު، މިޖަމްއިއްޔާގެ ރައީސް އަބްދުﷲ ނަޝީދު ވިދާޅުވީ ޔުކްރޭނުގެ ހަނގުރާމައިގެ ސަބަބުން ގެސްޓްހައުސް ވިޔަފާރި ހީނަރުވެ 15 އިންސައްތައިގެ ދަށްވުމެއް ފާހަގަވެފައިވާކަމަށެވެ.
މިރަސްމިއްޔާތުގައި އަބްދުﷲ އިތުރަށް ވިދާޅުވީ، ކުދި ގެސްޓްހައުސްތަކަށް ސިނާއަތުގެ އެންމެ ރަނގަޅު ފައިދާ ލިބޭނެގޮތް ހަދަންޖެހޭ ކަމަށެވެ. އަދި ގެސްޓްހައުސްތަކަށް ދިމާވާ މައްސަލަތައް ސަރުކާރާއި ހިއްސާކޮށްފައިވާ ކަމަށް ވަނީ ފާހަގަކޮށްފައެވެ.
ހޮޓާތައް ހިމެނޭގޮތަށް ގެސްޓްހައުސް ތަކަށް ޚާއްސަ މެގަޒިނެއް ނެރުމަށް މަސައްކަތްކުރަމުންދާއިރު، އިތުރަށް އިސްތިހާރު ކުރުމަށް ޚާއްސަ ޕްލެޓްފޯމެއް ހެދުމަށް ވެސް ދަނީ މަސައްކަތްކުރަމުންނެވެ.
