މާތް ﷲ އެކަލާނގެ ޚަލްޤުކުރެއްވި އެއްޗެހި ތަފާތު ޖިންސުތަކަށް ތަފާތު ގިންތިތަކަށް ތަފާތު ސިފަސިފައިގައި ހެއްދެވީ، އަހަރެމެން އެއިން ފައިދާ ލިބިގަތުމަށްޓަކައެވެ. އެއިން މޮޅު ވިސްނުންތަކާއި ހަރުދަނާ ހިޔާލުތައް ހޯދުމަށްޓަކައެވެ. އޭގެ ބޭނުންކޮށްގެން އަހަރެމެންގެ އުފެއްދުންތައް ގިނަކޮށް ކާމިޔާބީތައް އިތުރުކުރުމަށްޓަކައެވެ. ރުޅިވެރިކަމާއި އަދާވާތްތެރިކަމާއި ގުޅުން ކެނޑުމާ ދުރުހެލިވުމަށްޓަކައެވެ. އިސްލާމްދީން ގޮވާލަނީ ރަނގަޅު ގޮތުގައި މިތަފާތުތަކުގެ ބޭނުން ހިފުމަށެވެ.
ޚިޔާލު ތަފާތުވިއަސް ވާހަކަދެއްކުމުގައި ހިފަހައްޓަންޖެހޭ އަދަބުތަކެއް ވެއެވެ. އެކަކު އަނެކަކުގެ އަބުރު ކަތިލައިގެން ނުވާނެއެވެ. އެކަކު އަނެކަކުގެ އިއްޒަތާއި ކަރާމާތަށް އަރައިގެން ނުވާނެއެވެ. އިސްލާމީ ތާރީޚުން ފެނިފައިވާ އަދަދު ނުކުރެވޭހައި ގިނަ މިސާލުތަކުން އަހުރެމެންނަށް އެނގެނީ މުސްލިމުންނަކީ، ޚިޔާލު ފާޅުކުރުމުގެ ރިވެތި އުސޫލުތަކުގައި ހިފަހައްޓައިގެން މީސްތަކުންނާ މުއާމަލާތުކޮށްފައިވާ ބައެއްކަމެވެ.
އެކުވެރީންނާއި މުވައްޒަފުންނާއި، ގާތްތިމާގެ މީހުންނާއެކު ވާހަކަދައްކާއިރު ނުވަތަ މައްސަލައަކާ ބެހޭގޮތުން ބަހުސްކުރާއިރު މިރިވެތި އަދަބަށް ތަބާވާން ޖެހޭނެއެވެ. ޚިޔާލުތަފާތުވާ ކޮންމެ މީހަކު ކާފިރުކޮށްގެން ނުވާނެއެވެ. ދެބަސްވާ ކޮންމެ މީހަކު މުޖުރިމަކަށް ހަދައިގެން ނުވާނެއެވެ. ދީނީ މައްސަލަތަކުން މައްސަލައެއްގައި ބަހުސްކުރާނަމަ، އެ މައްސަލައަކާ ބެހޭ ގޮތުން ޢިލްމުވެރީންގެ ރައުޔުތަކާއި ހުއްޖަތްތަކުގެ އަލީގައި މެނުވީ ޖަދަލުތައް ކުރިއަށްގެންގޮސްގެން ނުވާނެއެވެ.
އަހަރެމެން ތަބާވާންޖެހޭނީ އިސްލާމީ އަދަބުތަކަށާއި ސުލޫކަށެވެ. މުސްލިމުން އަބަދުވެސް ބުނަންވާނީ ހެޔޮ ބަހެވެ. ރަހުމަތްތެރިކަން ނެތިގެން ހިނގައިދާނެ ބަހެއް ރަށްޓެއްސަކާ ދިމާއަށް ބުނެގެން ނުވާނެއެވެ. ދުޝްމަނުންނާއެކު ބަސް ބުނަންވާނީ އަދާވާތްތެރިކަން ނިއްވައިލާ ފަދަ ބަސްބަހުންނެވެ. މާތް މީހުންނަކީ ހުރިހާ ވަގުތެއްގައިވެސް ބަސްމަގު ރީތި ބައެކެވެ. މާތް ޚުލްގުގެ ވެރިޔާ އޭނާގެ އިއްޒަތް ގެއްލިގެން ހިނގައިދާނެ އެއްވެސް ބައެއް އެއްވެސް ވަގުތެއްގައި ނުބުނާނެތެވެ. ކީރިތި ޤުރުއާން ސިފަކޮށްދީފައިވާ ގޮތުގައި ފުރިހަމަ މުއުމިނުންނަކީ ހުތުރު ބަސްތަކާ އެކަހެރިވާ ބައެކެވެ.
މިޒަމާނުގައި ކޮފީތަކުގައްޔާއި ނާދީތަކުގައްޔާއި، ޓުވިޓާ އާއި ފޭސްބުކް ފަދަ މަންސަތަކުގައި މީހުންގެ އައިބުތައް ހާމަކޮށް ފަތުރާ މީހުން ވަނީ ގިނަވެފައެވެ. މި އާފަތް ވަނީ ޒަމާނީ މުޖުތަމައުތަކުގައި ބޮޑު ރޯގާއަކަށް ވެފައެވެ. ހިތުގައި އީމާންކަން ފުރިހަމަ ނުވާ ކޮންމެ މީހަކު ވަނީ މި ރޯގާގެ ޖަރާސީމުން އޭނާގެ ހިތް ކިލަނބު ކޮށްފައެވެ. ޓުވިޓާ އާއި ފޭސްބުކް ފަދަ މީސްމީޑިއާގެ މަންސަތަކުގައި މުސްލިމުންގެ އަބުރާއި އިއްޒަތަށް ބުރޫއަރާ ގޮތަށް ދައްކާ ވާހަކަތަކަކީ ނެތިމޮށުމާއި ޣީބަ ބުނުމުގެ ތެރޭގައި ހިމެނޭ އަމަލުތަކެއްކަން ކަށަވަރެވެ. ޣީީބަ ބުނުމާއި ނެތިމޮށުމަކީ މީސްތަކުން ބައިބައިކުރުމަށާއި މީހުންގެ ހިތްތަކުގައި ރުޅިވެރިކަމުގެ އަލިފާން އެނދުމަށްޓަކައި ބޭނުންކުރާ ދަރެކެވެ. އެއީ ފަރުދުންނާއި ޖަމާއަތްތައް ޚަރާބުކުރާ ނުރައްކާތެރި ވަބާއެކެވެ. އެހެންކަމުން މިފަދަ އެންމެހައި ސިފަތަކުން ދުރުހެލިވުމަށް ނަސޭހަތްތެރިވަމެވެ.
މައުލޫމާތު: ހުކުރު ޚުތުބާ
