މުދަލާއި ތަނަވަސްކަން ހޯދުމަކީ، އިސްލާމްދީން މަނާކުރާ ކަމެއް ނޫނެވެ. ހަލާލުގޮތުގައި، މަސައްކަތް ކޮށްގެން އާމްދަނީ ހޯދުމަށް އިސްލާމްދީން ހިތްވަރުދެއެވެ. އިސްލާމް ދީނުގައި މީސްތަކުންނަށް ގެއްލުން ހުރި ރިބާގެ ދޮރުތައް ބަންދުކޮށް، ވިޔަފާރީގެ ދޮރުތައް ހުޅުއްވައިދެއްވާފައި ވަނީ ހަލާލު ގޮތުގައި ވިޔަފާރިކޮށްގެން އާމްދަނީ ހޯދުމަށްޓަކައެވެ.
ވިޔަފާރި ކުރާނެ އުސޫލުތަކާއި، ވިޔަފާރީގެ ގޮތުގައި ކޮށްގެން ނުވާނެ ކަންކަން ވަނީ ބަޔާންކުރައްވާފައެވެ. މަކަރާއި ހީލަތް ހެދުމާއި އޮޅުވާލުން ވަނީ ހަރާމް ކުރައްވާފައެވެ.
ދުނިޔޭގެ ފެންވަރުގައި މަޝްހޫރު ބްރޭންޑުތަކުގެ އިތުރަށް ވަރަށްގިނަ ބާވަތްތަކުގެ މުދާ ރާއްޖެއަށް އެތެރެކޮށް ވިއްކައެވެ. ވިޔަފާރި ކުރުމުގެ ބޭނުމުގައި މިބާވަތް ބާވަތުގެ މުދާ އެތެރެކޮށް ވިއްކާއިރު، ވަރަށް ބޮޑަށް އޮޅުވާލުމާއި، މަކަރު ހަދަމުންދާކަމުގެ ޝަކުވާގެ އަޑުތައް މުޖުތަމައުން އަބަދުވެސް އިވެމުންދެއެވެ.
" މިއީ ބައެއް ވިޔަފާރިވެރިންގެ ފަރާތުން ފެންނަމުންދާ ކަމެއް. މުދާ އެތެރެކޮށް ވިއްކުމުގައި ބައެއް ވިޔަފާރިވެރިން މަކަރުހަދައި، އޮޅުވާލައި، ފެންވަރު ދަށް މުދާ، ނަން މަޝްހޫރު ބްރޭންޑުތަކުގެ ނަމުގައި އަގުބޮޑުކޮށް ވިއްކާ. އަދި ބައެއްފަހަރު މިފަދަ ބްރޭންޑުތަކުގެ ނަމުގައި ފެންވަރުދަށް މުދާ އެތެރެކޮށް ބޮޑުތަނުން އަގުހެޔޮކޮށް ވިއްކާ. މިގޮތަށް ވިޔަފާރި ކުރުމަކީ މަކަރާއި ހީލަތް ހެދުމުގެތެރޭގައި ހިމެނޭ ކަމެއް. މިއީ މުދާ އުފައްދާ ފަރާތްތަކަށާއި ގަންނަ ފަރާތްތަކަށް ގެއްލުން ލިބޭނެ ކަމެއް. މިކަމުގެ ސަބަބުން ވިޔަފާރިވެރިންނާމެދު މީސްތަކުންގެ ހިތްތަކުގައި އޮންނަ އިތުބާރު ކުޑަ ވާނެ".
ކޮންމެ މީހަކުވެސް މަސައްކަތް ކޮށްގެން ހޯދާ ފައިސާއިން ދިރިއުޅުމަށް ބޭނުންވާ ތަކެތި ގަންނަނީ އެތަކެއްޗަކީ ބޭނުންކުރަން އެކަށީގެންވާ ނުވަތަ ފެންވަރު ރަނގަޅު ތަކެތި ކަމަށް ދެކިގެންނެވެ. ބައެއް ފަހަރު ގަންނަ މުދަލުގެ ފެންވަރުދަށްވުމުން އޭގެ ބޭނުމެއް ނުކުރެވެއެވެ. އަދި ބައެއްފަހަރު އެފަދަ މުދަލުން ސިއްޙީ ގެއްލުންތަކާ ކުރިމަތިލާންޖެހެއެވެ.
" ވިޔަފާރި އާއި އެނޫން މުއާމަލާތްތަކުގައިވެސް މަކަރު ހަދައި އޮޅުވާލުމަކީ ތިމާގެ ދެދުނިޔެ އަބާއްޖަވެރިވެގެންދާނެ ކަމެއް. މަކަރާއި ހީލަތް ހަދައި އޮޅުވާލައިގެން މީސްތަކުންގެ އަތުން ނާޖާއިޒު ފައިދާ ނަގަމުންދާއިރު އެކަމާމެދު ކުޑަކޮށްވެސް ވިސްނާލިން ހެއްޔެވެ؟ މާތް ﷲ ހަރާމް ކުރައްވާފައިވާ ގޮތްގޮތުން ހޯދާ ފައިސާ ތިޔަ ހޭދަކުރަމުންދަނީ ތިމާގެ އަމިއްލަ ނަފްސަށާއި ތިމާގެ ލޯބިވާ އަނބިދަރިންނާއި މައިންބަފައިންނާއި ގާތްތިމާގެ މީހުންނަށް ނޫންހެއްޔެވެ؟ ތިމާގެ އަތުން ތިމާގެ ލޯބިވާ މީހުންނަށް ހަރާމް މުދަލާއި ފައިސާއިން ކާންދެމުން ގެންދާއިރު މިކަމުގެ ނުބައިކަމާމެދު ވިސްނާލިން ހެއްޔެވެ؟
ވިޔަފާރިވެރިންނޭވެ! އިޙްތިކާރު ކޮށްގެން ފައިދާ ހޯދުމަކީ އިސްލާމް ދީނުގައި ހުއްދަވެގެންވާ ކަމެއް ނޫނެވެ. އިޙްތިކާރު ކުރުމަކީ މީސްތަކުންނަށް ބޭނުންޖެހިފައިވާ މުދަލެއް ބާޒާރަށް ނުނެރެ ހިފެހެއްޓުމަށްފަހު އެމުދަލުގެ އަގުބޮޑުވުމުން ބާޒާރަށް ނެރެ ބޮޑު އަގުގައި ވިއްކުމެވެ. ވަކިން ޚާއްސަކޮށް ކޮއްތުގެ ގޮތުގައި މީސްތަކުން ބޭނުންކުރާ ބާވަތްތައް އިޙްތިކާރު ކުރުމުގެ ފާފަ ވަކިން ބޮޑުވެއެވެ. އަދި މިނެކިރުމުގައި އުނި އިތުރު ކުރުމަކީ ވެސް ގެއްލުމާއި ހަލާކު ކުރިމަތިވާނޭ ކަމެކެވެ.
ލިބޭ އާމްދަނީ މަދުވެގެން އާމްދަނީ އިތުރުކުރުމަށްޓަކައި ނަމަވެސް ދީނުގައި ހުއްދަނޫން މަގުތައް އިޚުތިޔާރު ކުރުމަކީ ވަރަށް ނުރައްކާތެރި ކަމެކެވެ.
މައުލޫމާތު: ހުކުރު ޚުތުބާ
