ކުޑަފުތުގެ އަނބިކަމަނާ ގެންގުޅޭ އުނދުޅީގެ ދަނޑި ބިދިނގެން އަލުން އުނދުޅިއެއް އިންދާދިނުމަށް ކުޑަފުތުގާތު ބުނުމުން ޖަވާބުގައި ކުޑަފުތު ބުންޏެވެ. ސުބުހާނަﷲ އެވެ. މަށަކަށް ލާހިކެއް ނޫނެވެ. ރަށުއޮފީހުގެ ހުއްދަ ހޯދައިގެން ނޫނީ ތިޔަކަމެއް ނުވާނެއެވެ. އެއީ، ދާދި މިދާކަށްދުވަހު އޮފީހުން އަންގައިފައި ވަނީ އޮފީހުގެ ހުއްދަ ނުހޯދައި މިރަށުގައި އެއްވެސްތާކު އެއްވެސް މީހަކު އެއްވެސް އެއްޗެއް އިންދައިގެން ނުވާނެކަމަށެވެ. އެހެންވީމާ ކަމަނަ އޮފީހަށްގޮސް ހުއްދަ ހޯދާށެވެ. އެހެންނޫނީ ތިޔަ އުނދުޅިއެއް އިންދާކަށް މަށަކަށް ހަމަލާހިކެއް ނޫނެވެ. އޮފީހުން ހުއްދަ ލިބުނީމަ ތިޔަކަން ކުރެވިދާނެއެވެ.
ދެން ކަމަނަ ވަރަށް ދެރަވެލާފައި އޮފީހަށް ގޮސް ކަތީބަށް ނަންގަތެވެ. ތިމަންނައަށް އުނދުޅިއެއް އިންދަން ހުއްދަ ދެއްވާށެވެ. ކަތީބު ބުނުއްވިއެވެ. ބަލަ ކަމަނާއެވެ. ކަމަނަގެ ފިރި ކުޑަފުތަކީ ވަޑިއެއް ނޫންތޯ؟ އޭނާ ލައްވާ އުނދުޅިއެއް އިންދަން އޮފީހުން ހުއްދަދޭންޖެހޭ ހެއްޔެވެ؟
މި ޖަވާބު ލިބުމުން ކަތީބަށް ނަންގަތެވެ. ތިމަންނަގެ ފިރި ކުޑަފުތު ބުނީ މިރަށުގެ އެއްވެސް ތަނެއްގައި އެއްވެސް މީހަކު އެއްވެސް އެއްޗެއް އިންދަންވާނީ ރަށު އޮފީހުން ހުއްދަ ހޯދައިގެންނޯއެވެ. އެހެންވީމާ ހުއްދަ ހޯދަން އައީއެވެ.
ކަތީބު ބުނުއްވިއެވެ. ބަލަ އެއީ ރުއްގަސް އިންދާ ވާހަކައެވެ. އޮފީހުން އެންގީ އެއްވެސް މީހަކު މިރަށު އެއްވެސް ތަނެއްގައި އެއްވެސް ބާވަތެއްގެ ގަހެއް އިންދަންވާނީ އޮފީހުން ހުއްދަ ހޯދައިގެންނެވެ. ހުއްދަ ނުހޯދާ އިންދައިގެން ނުވާނެއެވެ. އެކަމަކާ އުނދުޅި އިންދުމަކާއި އޮތީ ކޮންގުޅުމެއް ހެއްޔެވެ؟ ފިލީގައި އަކުރުގައި ހިފައިގެން އެފުތު އެއުޅެނީ މީހުން އަނގަގޮއްވާށެވެ. ކޮންމެވެސް ބަހަނާއެއް ދައްކައިގެން އެކަން ނުކޮށްދޭންވެގެންނެވެ. އެކަހަލަ ބަހަނާ ދައްކާނީ އެހެންވެގެންނެވެ. އެއީ އޭނާގެ ފާޑެވެ. އަބަދުވެސް އެއުޅެނީ ބަސްބަހުގެ އިދިކޮޅު މާނަ ނަގައިގެން މީހަކަށް އުނދަގުލެއް ދުއްތުރާލެއް ޖައްސާށެވެ.
ކަމަނާގޮސް އެފުޅުގާތު މިހެން ބުނާށެވެ. އުނދުޅި އިންދުން ދާނި އިންދުން އުޅާއިންދުން އޮޑިދޯނިފަހަރު ބަންނައިރު މަޑޫއިންދުން ދެފިލާގަނޑު ނުވަތަ ދެލަކުޑިގަނޑު އެއްކޮށް އިންދުން މިހެން އިންދާއިރު އެއްޗެއް އިންދަން އޮފީހުން ހުއްދަ ހޯދާކަށް ނުޖެހޭނެއެވެ. އެކަހަލަ ކޮންމެ ކަމަކާވެސް އެފުތު އެކަހަލަ ޖެއްސުމުގެ ވާހަކަ ދައްކާނެއެވެ.
ދެން ކަމަނަ ގެއަށްގޮސް ކުޑަފުތަށް މިވާހަކަތައް ކިޔައިދިނުމުން އެފުތު ބުންޏެވެ. ނޭންގޭނެ ނޫންހޭ؟ ވަކިއެއްޗެއް އިންދަން ހުއްދަ ހޯދަން ނުޖެހޭނެ ވާހަކައެއް އެދުވަހަކު ނާންގަންޏާއެވެ. އެހާތަނުން ކަމަނައަށް ކުޑަފުތު އުނދުޅި އިންދާނިނެވެ. ވީއުފަލުން ކަމަނަ ބުންޏެވެ. މިއީ އެހާފަސޭހަ ކަމެކެވެ. ކުޑަފުތު ތިޔަ ޝަކުވާ ބޮޑިއެއް ދުވަހަކުވެސް ނުހުއްޓޭނެއެވެ. މިވަރުންވެސް މިކަންވިކަމަށްޓަކައި ޝުކުރު ކުރަމެވެ.
