ސިނާއީ އެކި މަސައްކަތްތަކަށް ގިނަ ގޮންޖެހުންތަކެއް ކުރިމަތިވެފައިވާކަން ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ގަބޫލުކުރެއެވެ. މިގޮތުން އެކުންފުނިން މައުލޫމާތު ދީފައިވާގޮތުގައި މަސައްކަތްތަކަށާއި ވިޔަފާރިތަށް ހިންގުމުގަ ޖާގައިގެ ދަތިތައް ކުރިމަތިވެ، އާންމުން ދިރިއުޅޭ ތަންތަނުގައި ގަރާޖުތަކާއި ވެއަރހައުސްތައް ހުރުމުން ދިމާވާ ނުރައްކާތެރި ހާދިސާތައް ވަނީ އާއްމުވެފައެވެ.
" މާލެ ސަރަހައްދުގައި މިކަމަށް ހާއްސަ ކުރެވިފައިވާ ތިލަފުށީގައި ގިނަ މައްސަލަތަކެއް އެބަހުރި. މި މައްސަލައަށް ހައްލު ހޯދައިދިނުމުގެ ގޮތުން ޒަމާނީ ވަސީލަތްތަކާއި އެކު ސިނާއީ ބޮޑު ސަރަހައްދެއް ތަރައްޤީ ކުރުން މިވަނީ ނުހަނު މުހިއްމު ކަމަކަށްވެފަ. ސިނާއީ ބޭނުންތަކަށް ތިލަފުށީގެ 152 ހެކްޓަރުގެ ބިން ހިއްކާ ތަރައްޤީކުރުމަށް ނިންމާފައިވަނީ ހުޅުމާލެ އާއި އެއް ފެންވަރަކަށް" އެޗްޑީސީ އިން މައުލޫމާތު ދިނެވެ.
ތިލަފުށީގައި ތަރައްގީކުރާ ސަރަހައްދުގައި ޕަބްލިކް ޕްލާޒާ، ޕަބްލިކް ގްރީން ސްޕޭސް، އެކްޓިވް ވޯޓަރފްރަންޓްސް، ފްލެކްސިބަލް ޑިވެލޮޕްމަންޓްގެ އިތުރުން ސަސްޓެއިނަބަލް ސިޓީއެއްގެ ފުރިހަމަ ކުލަ ޖެއްސުމަށް ދަނީ މަސައްކަތް ކުރަމުންނެވެ. އަދި މިކަމަށް ހާއްސަކޮށް ބިން ހިއްކޭއިރު ޒަމާނީ ފުރިހަމަ ވަސީލަތްތަކުގެ އިތުރުން ތިލަފުށީގެ މަގުތައް އެންމެ ރަނގަޅު ފެންވަރުގައި ތަރައްޤީ ކުރެވިގެންދާނެ ކަމަށް ވެސް އެޗްޑީސީ އިން ވަނީ ހާމަކޮށްފައެވެ.
" މާލެ ސަރަހައްދުގައި ދިރިއުޅެމުންދާ ފަރާތްތަކަށް ރައްކާތެރި މާހައުލެއް ބިނާކުރުމަށް ސަރުކާރާއި ގުޅިގެން އެޗްޑީސީން ގިނަ މަސައްކަތްތަކެއް ކުރެވިގެންދާއިރު، ރާއްޖޭގައި ހުރި ގިނަ ސިނާއަތްތަކަށް ބޭނުންވާނެ އެންމެ ޒަމާނީ އަދި ފުރިހަމަ ވަސީލަތްތަކާއި މިކަމަށް ބޭނުންވާ އިންފްރާސްޓްރަކްޗަރ ގާއިމު ކުރުމަކީ ބޮޑު އިސްކަމެއް ދީގެން ކުރެވެމުން އަންނަ ކަންކަން".
ސިނާއީ ދާއިރާގައި ހުރި މައްސަލަތަކަށް ހައްލު ހޯދައިދިނުމަށް ސަރުކާރުން ކުރަމުން ގެންދާ މަސައްކަތްތަކުގެ ތެރެއިން ފަރުމާ ކުރެވިފައިވާ ތިލަފުށި މާސްޓަރޕްލޭން ވަނީ މި ޑިސެންބަރުމަހު ލޯންޗުކޮށްފައެވެ. އެޗްޑީސީ އިން މައުލޫމާތު ދޭގޮތުގައި މިމަސައްކަތް ކުރަން ހަމަޖެހިފައިވަނީ ބައިބަޔަށް ބަހާލައިގެންނެވެ. މިގޮތުން މިމަސައްކަތް 2 އަހަރުތެރޭގައި އެކީގަ ނިންމާލުމުގެ މަސައްކަތް ކުރަމުންދާ ކަމަށް އެޗްޑީސީ އިން ވަނީ މައުލޫމާތު ދީފައެވެ.
