އުމުރުން ފާއިތުވެގެންދާ ކޮންމެ ދުވަހަކީވެސް ވަރަށް މުހިންމު ދުވަހެކެވެ. އެދުވަސްތަކުގައި ކުރަން ރާވާފައި ހުންނަ ކަންތައްތައް ހާސިލުނުވެއްޖެނަމަ އެކަމާ ވިސްނެއެވެ. އަދި ތިމާގެ އަމިއްލަ ރޭވުންތެރިކަމާ އެއްގޮތަށް ކަންތައްތައް ހާސިލުވެއްޖެނަމަ އެލިބޭ ހިތްހަމަޖެހުން ބޮޑެވެ.

2023 ވަނަ އަހަރު މި ފެށުނީއެވެ. މިއަހަރުގައި ކުރަން ބޭނުންވާ ކަންތައްތަކާއިމެދު ވިސްނާލިން ހެއްޔެވެ؟ ނުވިސްނާނަމަ އަވަހަށް ވިސްނުން މުހިންމެވެ. ކާމިޔާބާއި ހަމައަށް ވާސިލުވެވޭނީ އެކާމިޔާބު ހޯދުމަށް މަސައްކަތް ކޮށްގެންނެވެ. އެމަސައްކަތް ކުރެވޭނީ ތިމާގެ ސިކުނޑީގައި އެމަސައްކަތް ކުރާނެ ގޮތެއް ރާވާލެވިގެންނެވެ.

އާއަހަރުގައި ވިޔަފާރިއެއް ކުރަން ވިސްނަންތަ؟

Advertisement

އަމިއްލަ ވިޔަފާރިއެއް ކުރަން ވިސްނާނަމަ އެ ވިޔަފާރިއަކާއި ގުޅޭ ޕްލޭނެއް ތައްޔާރުކޮށްލާށެވެ. އަމިއްލަ ހިޔާލުގެ މައްޗަށް އެކުލެވޭގޮތަށް މި ވިޔަފާރި ފަށާނެ ގޮތާއި ކުރިއަށްގެންދާނެ ގޮތް ރާވާލާށެވެ. އިތުރު މައުލޫމާތު ބޭނުންނަމަ އިންޓަރނެޓް މެދުވެރިކޮށް މައުލޫމާތު ހޯދިދާނެއެވެ. އަދި މިދާއިރާގެ މައުލޫމާތު ހުރި މީހެއްގެ އެހީތެރިކަންވެސް ހޯދިދާނެއެވެ.

މިއަހަރު ހާސިލުކުރަން ބޭނުންވާ ކަންތައްތަކުގެ ލިސްޓެއް ތައްޔާރުކުރުން

ތިމާ ބޭނުންވާ ކޮންމެ ކަމެއް ހާސިލު ނުކުރެވިދާނެއެވެ. އެހެންނަމަވެސް އެކަންތައްތައް ހާސިލު ކުރުމަށް މަސައްކަތް ކުރުމަކީ ކުރެވިދާނެކަމެކެވެ. މިގޮތުން މިއަހަރުތެރޭގައި ކުރަން ބޭނުންވާ ކަންތައްތަކުގެ ލިސްޓެއް ތައްޔާރުކޮށްލާށެވެ. އެ ލިސްޓުގައި ހިމެނޭ ކަންތައްތައް ކުރާނެ ގޮތެއް ރާވާލާށެވެ.

ވޭތުވެދިޔަ އަހަރުތަކުގައި ފަހަށް ރައްކާކުރެވުނުތަ؟

ތިމާގެ އުމުރުން ހޭދަވި މުއްދަތާއި އާމްދަނީ ހޯދުމަށް ކުރި މަސައްކަތާއި އަޅާބަލާއިރު ފަހަށް ރައްކާކުރެވިއްޖެހެއްޔެވެ؟ ފަހަށް ރައްކާކުރުމަކީ ހަމައެކަނި އެކައުންޓުގައި ފައިސާ ބެހެއްޓުމެއް ނޫނެވެ. މައިންބަފައިންނާއި އާއިލާގެ އިތުރުން ބޭނުންޖެހިފައިވާ މީހުންނަށް އެހީތެރިވެދިނުމަކީ ވެސް ފަހަށް ރައްކާކުރުމެވެ. އަދި ދިގުމުއްދަތަކަށް ދެމިގެންދާގޮތަށް މިސްކިތަކަށް ނުވަތަ ފަގީރުންނަށް އެހީތެރިކަން ފޯރުކޮށްދެވިދާނެއެވެ. ފަހަށް ރައްކާ ކުރުމަށް މިފެށުނު އާއަހަރުގައި އާގޮތްތަކެއް ރާވާށެވެ. ތިމާގެ ބޭނުންތައް ފުއްދުމަށްފަހު ހަރަދު ކުރެވޭނެ ގޮތްތަކަކީ ކޮބައިތޯ ބަލައި ބޭކާރު ހަރަދުތައް މަދުކޮށް ފައިދާހުރި ގޮތަކަށް ހަރަދުތައް ބެހެއްޓުމަށް މަސައްކަތްކުރެވިދާނެއެވެ.

ގޯސްކޮށް ކަމެއް ވެފައިވާނަމަ އެކަމާމެދު ވިސްނާ ވަގުތު ބޭކާރު ނުކުރުން

ދުނިޔޭގައި އުޅޭއިރު ތިމާ ހިތް ނޭދުނަސް ގޯސްކޮށްވެސް ކަމެއް ކުރެވިފަ އޮވެދާނެއެވެ. އެކަންތައްތަކާމެދު ވިސްނާ ވަގުތު ބޭކާރު ކުރުމަކީ ބުއްދިވެރި ގޮތެއް ނޫނެވެ. އޭގެ ބަދަލުގައި ފާއިތުވެދިޔަ ތަނުން އިބްރަތް ހާސިލުކޮށް މުސްތަގުބަލުގައި ރަނގަޅަށް ކަންތައްތައް ކުރުމަށް އަޒުމް ކަނޑައަޅާށެވެ. އަދި ތިމާއާއި މެދު މީހުން ދެކޭގޮތް ބަދަލުކުރުމަށް މަސައްކަތް ކުރުމަށްވުރެ ތިމާގެ ހިތް އެދޭގޮތަށް އެންމެ ރަނގަޅަށް ކަންތައްތައް ކުރުމަށް އިސްކަން ދެވިދާނެއެވެ.

ރަނގަޅު ސިއްހަތަކަށް ކަސްރަތުކުރުމަށް އިސްކަން ދިނުން

މިފެށުނު އާއަހަރަކީ ހުރިހާ ގޮތަކުން ވެސް ފައިދާހުރި އަހަރަކަށް ހެދުމަށް ރަނގަޅު ސިއްހަތެއްގައި ހުރުމަށް އިސްކަންދޭށެވެ. މިގޮތުން ކަސްރަތުކުރުމަށް އިސްކަންދެވިދާނެއެވެ.

އިސްލާމް ދީނަށް އިސްކަންދިނުން

މިއީ އެންމެ މުހިންމު ކަންތަކެވެ. އިސްލާމް ދީނަށް ލޯބިކޮށް އެދީނުގައި އަންގަވާފައިވާ ގޮތަށް އުޅޭނަމަ ލިބޭ ހިތްހަމަޖެހުން ބޮޑުވާނެއެވެ. ދެދުނިޔެއިން ވެސް ބާއްޖަވެރިކަން ލިބުން އޮތީ ފުރިހަމަ މުސްލިމެއްގެ ގޮތުގައި ދެމިހުރެގެންނެވެ. އެއިރުން ބޭކާރު ކަންތައްތަކާ ވިސްނާނެ ވަގުތު މަދުވެ، ހިތަށް އުފާވެރިކަން ގެނެސްދީ، މީހާ އަށް ތާޒާކަން ލިބި އަމިއްލަ ނަފްސަށް ކުރެވޭ އިތުބާރުވެސް ބޮޑުވާނެއެވެ.

މި ފެށުނު އަހަރަކީ 'ޒީޓައިމްސް' ކިޔުންތެރިންނަށް ބާއްޖަވެރި އަހަރެއްކަމުގައި މިންވަރު ކުރައްވާށިއެވެ. އާމީން