އިންސާނީ ނަސްލު ދެމިއޮތުމަށްޓަކައި މާތް ﷲ މެދުވެރިކުރައްވާފައި ވަނީ މައިންބަފައިންނެވެ. އެހެންކަމުން މާތް ﷲ އަށް އަޅުކަންކުރުމަށް ގޮވާލެއްވި އަމުރުފުޅާ ވިދިގެން މައިންބަފައިންނަށް ހެޔޮކޮށް ހިތުމަށް ކީރިތި ޤުރުއާނުގެ އެތައް އާޔަތެއްގައި ވަނީ އަމުރުކުރައްވާފަ އެވެ.
ކީރިތިވަންތަ ﷲ އަށް ފަހު ތިބާގެ މައިންބަފައިންނަށް ވުރެ ތިބާއަށް ވަކިން ބޮޑު ހެޔޮކަމެއް ކޮށްދިން ދެވަނަ ފަރާތެއް ވާނެބާވައެވެ؟ ކުޑައިރުއްސުރެ ތިބާ ބަލައި ބޮޑުކުރީ އެ ދެ މީހުންނެވެ. އެމީހުންގެ އުފަލާއި އަރާމަށްވުރެ އިސްކަމެއް ދީފައިވަނީ ތިބާ ދުޅަހެޔޮ ސިއްހަތެއްގައި ބަލައި ބޮޑު ކުރުމަށެވެ. އެ ދެ މީހުންގެ ތެރެއިން ވެސް ވަކިން ޚާއްސަކޮށް މަންމަގެ ހައްގު ތިބާގެ މައްޗަށް ބޮޑުވެގެން ވެއެވެ. ނުވަމަހާއި ދިހަ ދުވަސް ވަންދެން ވޭނުގައި ބަނޑުއަޅައި ވިހެއުމަށްފަހު ތިބާ ބޮޑުކުރީ އެ މަންމަގެ ގާތުން ކިރުދީގެންނެވެ. ރޭގަނޑުގެ ނިންޖާއި އަރާމު ނަގާލައި ތިބާ ގެންގުޅެ ބޮޑުކޮށްފައި ވަނީ ފޮނި އުންމީދުތަކަކާ އެކުގައެވެ. އެހެންވެ އެ މަންމަގެ ހައްގު ނުހަނު މަތިވެރިއެވެ.
މައިންބަފައިންނަށް މާތްކޮށް ހިތުމަކީ ދަރިންގެ މައްޗަށް ވާޖިބު ކަމެކެވެ. އެމީހުންނަށް އިހާނާތްތެރިކޮށް ހިތުމުން އާޚިރަތް ދުވަހުން ލިބޭ އަޛާބުގެ ކުރިން ދުނިޔެމަތީގައި ވެސް އެކަމުގެ އުޤޫބާތް ލިބޭނޭކަން މާތް ރަސޫލާ ﷺ ވަނީ އަންގަވާފައެވެ. އެ ކަލޭގެފާނު ހަދީސްކުރައްވާފައިވެއެވެ. މާނައީ: " ފާފަތަކުގެ ތެރެއިން އަނިޔާވެރިކަމާއި، މައިންބަފައިންނަށް ނުކިޔަމަންތެރިވުމާއި، ގާތްތިމާގެކަމުގެ ގުޅުން ކަނޑާލުން ފިޔަވައި އެންމެހައި ފާފަތަކުގެ ޖަޒާ ޤިޔާމަތާ ހަމައަށް ﷲ ފަސްކުރައްވަތެވެ. ނަމަވެސް މިތިންކަމުގެ ޖަޒާ މަރުވުމުގެ ކުރިން ދުނިޔެމަތީގައި އެމީހަކަށް އެކަލާނގެ ދެއްވަތެވެ".
ދަރިންގެ މައްޗަށްވާ ބައްޕައިންގެ ހައްގުވެސް ވަކި ކުޑައެއް ނޫނެވެ. އާއިލާ ބެލެހެއްޓުމަށް ބުރަ މަސައްކަތް ކުރުމާއި، ދަރިންނަކީ ހެޔޮލަފާ ރަނގަޅު ބަޔަކަށް ހެދުމަށްޓަކައި ހޭދަކުރާ ވަގުތާއި ފައިސާއަކީ، ވަރަށް އިޚްލާސްތެރި މަޤްސަދެއްގައި ކުރާ ހޭދައެކެވެ. މައިންބަފައިން ދަރިން ކިބައިން އެދެނީ އެ މީހުންނަކީ ލަފާދާރު، ކިޔަމަންތެރި ޞާލިޙު ބަޔަކަށް ވުމެވެ. މައިންބަފައިންގެ ހައްގުތައް ދަންނަ އެހައްގުތައް އަދާކުރާ އެބައިމީހުންނަށް އޯގާތެރި ބަޔަކަށް ވުމެވެ.
އަހަރެމެންގެ ތެރެއިން ފެންނަމުންދާ ބައެއް މަންޒަރުތަކަކީ ހިތާމަހުރި މަންޒަރުތަކެކެވެ. ބައެއް ދަރިން އެކުދިންގެ މައިންބަފައިން އުމުރުން ދުވަސްވުމުން ދޫކޮށްލާ މަންޒަރެވެ. އެމީހުން ބަލަހައްޓަން ބޭނުންނުވާ މަންޒަރެވެ. އެހެން މީހުން ގާތަށް ގޮސް ސަލާމް ޖަހައިގެން ކައިބޮއެ އުޅޭއިރު ދަރިން އުފަލާއި އަރާމުގައި އާއިލާއާއެކު އުފާކުރާ މަންޒަރެވެ. މިއީ ހިތާމަހުރި ކަމެކެވެ. ކަނޑައެޅިގެން ހަރާމް ކަމެކެވެ. ކޮންމެ އިންސާނަކުވެސް ދުނިޔޭގައި ލަހައްޓަވައިފި ނަމަ އުމުރުން ދުވަސްވެ މުސްކުޅި އުމުރާ ކުރިމަތިލާން ޖެހޭނޭކަން ހަނދާންކުރަން ޖެހޭނެއެވެ. ތިމާގެ ހަޔާތުގައި މަންމަ ނުވަތަ ބައްޕަ އުމުރުން ދުވަސްވެ ލޯބޯ ކޮށިވެފައިވާ ހާލުގައި އެމީހުންނަށް އެހީތެރިވެ އަޅައިލުމަކީ ކޮންމެ ދަރިއެއްގެ ވާޖިބެކެވެ. އެ ހާލުގައި އެމީހުންގެ ފުށުން ކުރިމަތިވާ އުނދަގޫތަކަށް ކެތްތެރިވާންވާނެ އެވެ. އެބައިމީހުންނާ މުއާމަލާތު ކުރަން ވާނީ އޯގާތެރިކަމާއެކުގައެވެ.
އިސްލާމް ދީނުގައި އަންގަވާފައި ވަނީ މައިންބަފައިން ކުރިމަތީގައި ހަރުއަޑުން ބަސް ނުބުނުމަށެވެ. އެންމެ ކުޑަމިނުން ދެކޮޅު ހެދުމުގެ ގޮތުން 'އުފް' ވެސް ނުބުނުމަށެވެ. މައިންބަފައިންނަށް އަދަބު އިހްތިރާމު އަދާކުރުމުގެ ގޮތުން އެބައިމީހުންގެ ކުރިމަތީގައި ނިކަމެތިވުމަށެވެ. އަދި މައިންބަފައިންނަށްޓަކައި ހެޔޮ ދުޢާކުރުމަށެވެ. އެހެންކަމުން ދަރިން ތަރުބިއްޔަތުކުރުމުގައި މިކަންކަމުގެ މައްޗަށް ބާރުއަޅަން ޖެހެއެވެ.
މައިންބަފައިންނަށް ކިޔަމަންވުމަކީ ވާޖިބުކަމަކަށް ވީހިނދު މައިންބަފައިން ކުރާ އަމުރަށް ކިޔަމަންވާންޖެހެނީ ޚާލިޤުވަންތަ ﷲ އަށް އުރެދުމަށް އެ މީހުން އަމުރު ނުކުރާހާ ހިނދެއްގައެވެ. ﷲ އަށް އުރެދުމެއްވާ އެއްވެސް ކަމެއްގައި އެއްވެސް މަޚްލޫޤަކަށް ކިޔަމަންވުމެއް ނެތެވެ.
މައުލޫމާތު: ހުކުރު ޚުތުބާ
