ދިރާގުޓީވީގެ ކަސްޓަމަރުން އެސްއެސް ނެޓްވޯކްގެ ކޭބަލް ޓީވީ ޚިދުމަތް އެސްއެސްނެޓަށް ބަދަލުވާން ހުޅުވާލީ މި ޖެނުއަރީމަހު 21 ވަނަ ދުވަހުގަ އެވެ. ރާއްޖޭގެ އެކި ރަށްރަށުގައި ތިބި ދިރާގުޓީވީގެ ގިނަ އަދަދެއްގެ ކަސްޓަމަރުން އެސްއެސްނެޓަށް ބަދަލުވަމުންދާއިރު، އެސްއެސްނެޓްގެ ޚިދުމަތް ދޭން ފެށުމަށް ހަމަޖެހިފައި ވަނީ މިމަހުގެ 29 ވަނަ ދުވަހުގެ ރޭ ދަންވަރު 12 އިން ފެށިގެންނެވެ.
އެސްއެސްނެޓްގެ ޗީފް އޮޕަރޭޓިން އޮފިސަރ މުޙައްމަދު އާސިފް (މޮންދު) ވިދާޅުވީ އެކުންފުނިން މަސައްކަތް ކުރަނީ އެންމެ އަގުހެޔޮ އަދި ފެންވަރު ރަނގަޅުކޮށް 100 އަށް ވުރެ ގިނަ ޗެނަލްގެ ޚިދުމަތް އެސްއެސްނެޓުގެ ކަސްޓަމަރުންނަށް ފޯރުކޮށްދިނުމަށް ކަމަށެވެ.
" ޖޯއިބޮކްސް 29 ޖެނުއަރީ ދަންވަރު 12 އިން ފެށިގެން ނިއްވާނުލައި ބެހެއްޓެވުން އެދެން. އަޕްޑޭޓް ވުމަށް ވަގުތު ހޭދަވެދާނެ. ޖޯއިބޮކްސް އަޕްޑޭޓްވާން ހޭދަވާ ވަގުތުގައި ޚިދުމަތް މެދުކެނޑިދާނެ. އެސްއެސްނެޓްގެ ޗެނަލްތައް އާވެގެން ދާނީ އެވަގުތުގައި". މޮންދު ވިދާޅުވިއެވެ.
އެސްއެސްނެޓާ އަލަށް ގުޅެން ބޭނުންވާ ފަރާތްތަކަށް އެފުރުސަތު ދިނުމަށް ހަމަޖެހިފައި ވަނީ ޕެކޭޖްތަކަށް ހުއްދަ ލިބި އަގު ކަނޑައަޅައި ނިމުމުންނެވެ.
"ފެބްރުއަރީ މަހު އެސްއެސްނެޓްގެ ޚިދުމަތް ހިލޭ ފޯރުކޮށްދޭނީ. ހުރިހާ ޗެނަލެއް ވެސް އެ މުއްދަތުގައި ހިލޭ ފެންނާނެ. އެސްއެސްނެޓްގެ ޕެކޭޖްތަކުގެ އަގުތައް ހުންނާނީ ދިރާގު ޓީވީގެ އަގުތަކާ ދާދީ އެއްހަމައެއްގައި. އަގު ބޮޑެއް ނުވާނެ،" މޮންދު ވިދާޅުވިއެވެ.
ދިރާގަށް ބިލް ދައްކަން ޖެހުނީ ފޯނުބިލާއެކު ޕޯސްޓްޕެއިޑް އުސޫލުން ކަމަށްވިޔަސް، އެސްއެސްނެޓަށް ބިލް ދައްކަންޖެހޭނީ ޕްރީޕެއިޑްކޮށެވެ.
"އެސްއެސްނެޓުގެ ވިޔުގަޔާ ގުޅޭ ހުރިހާ ފަންނީ ޚިދުމަތެއް ދޭނީ ދިރާގުން. ދިރާގުޓީވީގެ ޚިދުމަތް ފޯރުކޮށްދިން އިރު ކަސްޓަމަރުންނަށް ދެމުންދިޔަ ފަންނީ ހުރިހާ ޚިދުމަތެއް ހަމަ އެފެންވަރުގައި އަދިވެސް ދެމުންދާނެ. އެކަމުގެ ޔަޤީންކަންދެން." މޮންދު ވިދާޅުވިއެވެ.
ރީބްރޯޑްކާސްޓް ކުރުމުގެ ގަވާއިދަށް ބްރޯޑްކާސްޓިން ކޮމިޝަނުން ގެނައި ބަދަލާއި ގުޅިގެން ދިރާގު ޓީވީގެ ލައިސަންސް އާނުކުރެވޭތީ ދިމާވި ގޮންޖެހުންތަކުގެ ސަބަބުން ދިރާގުން ވަނީ އެކުންފުނިން ދެމުން އައި ރީބްރޯޑްކާސްޓް ކުރުމުގެ ޚިދުމަތް މި ޖެނުއަރީ މަހުގެ 29 ވަނަ ދުވަހުން ފެށިގެން އެސްއެސްނެޓުން ދިނުމަށް ނިންމައިފައެވެ.
ދިރާގު ޓީވީގެ ޚިދުމަތް ހުއްޓާލާއިރު އެ ޚިދުމަތް ހޯދަމުން އައި ކަސްޓަމަރުންނަށް ފަސޭހަކަމާއެކު އެސްއެސްނެޓްގެ ޚިދުމަތަށް ބަދަލުވެވޭނެ އިންތިޒާމް ވަނީ ހަމަޖެހިފައެވެ. ވޭތުވެދިޔަ 7 އަހަރުގެ ތެރޭގައި 100 އަށް ވުރެ ގިނަ ޕްރީމިއަމް ޗެނަލްތަކާއިއެކު، ރާއްޖޭގެ 95 ރަށް ހިމެނޭ ގޮތަށް ދިރާގުޓީވީގެ ޚިދުމަތް ފޯރުކޮށްދީފައިވާކަމަށް ދިރާގުން ވަނީ ހާމަކޮށްފައެވެ.
އެސްއެސްނެޓުން ދޭ ޚިދުމަތާއި ގުޅޭގޮތުން އިތުރު މައުލޫމާތު ހޯދަން ބޭނުންވާ ފަރާތްތަކުން ގުޅަންވީ 1633 މި ނަންބަރަށެވެ.
