އިސްލާމް ދީނުގައި ޒަކާތުގެ ދެބާވަތެއް ވެއެވެ. އެއީ ފިޠުރުޒަކާތާއި މުދަލު ޒަކާތެވެ. ފިޠުރުޒަކާތަކީ ރަމަޟާންމަހުގެ ރޯދަ ހިފުމާއި ވިދިގެން ޢީދު ނަމާދަށް ދިއުމުގެ ކުރިން ދައްކަންޖެހޭ ޒަކާތެވެ. މުދަލުޒަކާތަކީ، ތިމާގެ މުދަލުގެ ނިޞާބު ހަމަވެ، ހިޖުރީ ސަނަތުން އަހަރު ހަމަވާއިރު ތިމާގެ ފުރިހަމަ މިލްކުގައި އެ މުދާ ހުރެއްޖެނަމަ އޭގެ 40 ބައިކުޅަ އެއްބައި ނެރެންޖެހޭ ޒަކާތެވެ.
މުދަލުޒަކާތުގެ ނިޞާބަކީ ޚާލިޞް ރަނުގެ 85 ގުރާމެވެ. ނުވަތަ ޚާލިޞް ރިހީގެ 595 ގުރާމެވެ. މިއިން ކޮންމެ ނިޞާބަކުން ވެސް ޒަކާތް ނެރެވޭނެއެވެ. ދިވެހި ރާއްޖޭގައި ނިޞާބު ކަނޑައަޅަނީ ރިހީގެ ނިޞާބުގެ މައްޗަށް ބަލައިގެންނެވެ. އެއީ ފަޤީރުންނަށް ފައިދާ ބޮޑު ގޮތް ކަމުގައި ވާތީއެވެ. މި ޒަމާނުގައި މުދަލު ޒަކާތް ވެސް ދައްކަނީ ރަނާއި ރިހީގެ ބަދަލުގައި އެ ޤައުމެއްގައި ބޭނުންކުރާ ފައިސާއަކުންނެވެ.
ދިވެހިރާއްޖޭގައި މުދަލުޒަކާތުގެ ނިޞާބު ކަނޑައެޅުމަށް ބަލަނީ ދުނިޔޭގެ ފައިސާގެ ބާޒާރުގައި ރިހީގެ އަގަށް އަންނަ ބަދަލަށެވެ. އެ ގޮތުން މިވަގުތު މުދަލު ޒަކާތުގެ ދިވެހި ފައިސާގެ ނިޞާބަކީ 5777.45 އެވެ.
" މީހެއްގެ އަތުގައި ނަޤުދު ފައިސާ ނުވަތަ ނަޤުދު ފައިސާ އާއި ވިޔަފާރި މުދާ ގަތް އަގަށް އަގުކޮށް މި ދެބައި އެއްކޮށްލީމާ، މި ދެންނެވި ނިޞާބާ އެއްވަރުވީ ދުވަހުން ފެށިގެން އޭނާގެ މުދަލުގެ ނިޞާބު އެ ހުރީ ހަމަވެފަ. ހިޖުރީ ގޮތުން އެއް އަހަރު ފުރުނުއިރު ނިޞާބަށް ވުރެ މަދު ނުވެ އޭނާގެ މުދާ ހުރެއްޖެނަމަ އެ ހުރި މުޅި މުދަލުގެ 40 ބައިކުޅަ އެއްބައި، މުދަލުޒަކާތުގެ ގޮތުގައި ކަމާބެހޭ ފަރާތަށް ދެއްކުން ވާޖިބުވާނެ".
މުދަލުގެ ޒަކާތަކީ އިސްލާމީ އިޤްތިސާދު ހަރުދަނާކުރުމަށް އެޅިފައިވާ ފިޔަވަޅުތަކުގެ ތެރެއިން މުހިއްމުކަން ބޮޑު ފިޔަވަޅެކެވެ. ކަމުގެ މުހިންމުކަން ބޮޑުކަމުން އެއީ ދީނުގެ ރުކުނެއް ކަމުގައި ކީރިތި ﷲ ވަނީ ކަނޑައަޅުއްވާފައެވެ. މުދަލުގެ ޒަކާތް ދިނުން އިސްލާމް ދީނުގެ ރުކުނެއް ކަމުގައި ކަނޑައެޅިފައި ވީހިނދު ޒަކާތް ވާޖިބުވާވަރުގެ ތަނަވަސްކަން ހުރި ހަމަ ކޮންމެ މީހަކުމެ ތިމާގެ މުދަލުން ޒަކާތް ދައްކަން ޖެހޭނެއެވެ. ނޫންނަމަ އެމީހެއްގެ ދީން ފުރިހަމައެއް ނުވާނެއެވެ.
މާތް ﷲ ތަނަވަސްކަން ދެއްވާފައިވާ މީހާ ތިމާގެ މުދަލުން ނެރެންޖެހޭ ޒަކާތް އަދާނުކޮށްފިނަމަ ގަދަފަދަ ވެގެންވާ އަޛާބު ޤިޔާމަތް ދުވަހުން ލިބޭނެކަން ބަޔާންކުރައްވައި މާތްﷲ ވަޙީކުރައްވާފައިވެއެވެ... މާނައީ: " އަދި ރަނާއި ރިހި ޚާޒާނާކޮށް، ﷲ ގެ މަގުގައި އެތަކެތި ހޭދަނުކޮށް ތިބޭ މީހުން (ދަންނާށެވެ!) ފަހެ، ވޭންދެނިވި އަޛާބު ހުރިކަމުގެ ޚަބަރު، އެއުރެންނަށް ކަލޭގެފާނު ދެއްވާށެވެ! (އެގޮތުގެ މަތީން އެމީހުން އެއްކުޅަ ރަންރިހީގެ ޚަޒާނާ) އެދުވަހުން ނަރަކައިގެ އަލިފާނުން ދޮންކުރައްވައި، އެތަކެތިން، އެއުރެންގެ ނިތްކުރިތަކުގައްޔާއި، އަރިކަށިތަކުގައްޔާއި، ބުރަކަށިތަކުގައި، ފާހަގަލައްވަމުން ގެންދަވާނެތެވެ. (އަދި އަންގަވާނެތެވެ.) މިހިރީ ތިޔަބައިމީހުންގެ އަމިއްލަ ނަފްސުތަކަށްޓަކައި ތިޔަބައިމީހުން އެއްކޮށް ޚަޒާނާކުޅަ ތަކެއްޗެވެ. ފަހެ ތިޔަބައިމީހުން ޚަޒާނާކޮށް އުޅުނު ތަކެތީގެ ރަހަ ދެކޭށެވެ!".
މުދަލަކީ ﷲ ސުބުހާނަހޫ ވަތަޢާލާ އަހަރެމެންނާ ހަވާލުކޮށްފައިވާ އަމާނާތެއްކަން އެއްވެސް މުސްލިމަކު އެންމެ ހިނދުކޮޅަކަށްވެސް ހަނދާން ނައްތާލައިގެން ނުވާނެއެވެ. މުދަލުގެ ހަގީގީ ވެރިޔަކީ ﷲ ސުބުހާނަހޫ ވަތަޢާލާ އެވެ. އެހެންކަމުން އެކަލާނގެ އަހުރެމެންނާ ހަވާލުކުރައްވާފައިވާ މި އަމާނާތުން އެކަލާނގެ އަންގަވާފައިވާ ކަންކަމުގައި ހޭދަކުރަންޖެހެއެވެ.
މައުލޫމާތު: ހުކުރު ޚުތުބާ
