ތަބީޢީ ގޮތުން އިންސާނާ މުދާދެކެ ލޯބިވެއެވެ. ދުނިޔަވީ އަރާމުގެ ސާމާނު އެއްކޮށް ގިނަކުރަން އޭނާ އެދެއެވެ.
މާތް ﷲ ވަހީކުރައްވާފައިވާ އާޔަތެއްގެ މާނައިގައިވެއެވެ. "އަންހެނުންނާއި ދަރިންނާއި ރަނާއި ރިހީގެ ތެރެއިން އެއްކުރެވިފައިވާ ގިނަ ބައިވަރުތަކާއި، މޮޅު އަސްތަކާއި، ގެރިބަކަރި ޖަމަލާއި، ދަނޑުބިމާއި، މިތަކެއްޗަށް އެދުމުގެ ލޯބި މީސްތަކުންނަށް ޒީނަތްތެރި ކުރެއްވިއެވެ. އެއީ ދުނިޔޭގެ ދިރިއުޅުމުގައި އުފާލިބިދޭ ތަކެއްޗެވެ. ނަމަވެސް އެނބުރިދަނިވި ރިވެތިވެގެންވާ ރަން ވަނީ، ﷲ ގެ ޙަޟްރަތުގައެވެ".
އިންސާނާގެ ތަބީޢަތުގައިވާ މި ޣަރީޒާގެ ސަބަބުން އޭނާ ހައްޤު މަގުން ކައްސާލައިގެން ދާތަން ފެނެއެވެ. ﷲ ހަރާމް ކުރެއްވި މަގުތަކުންނާއި، ވަސީލަތްތަކުން އޭނާގެ މުއްސަނދިކަން އިތުރުކުރުމަށް މަސައްކަތް ކުރެއެވެ. މިކަމުގެ ސަބަބުން އޭނާ ހެއްދެވި މަޤްސަދު އޮޅި އޭނާގެ ހުރިހާވެސް ބޭނުމަކީ ދުނިޔެ ހޯދުން ކަމުގައި ވެދެއެވެ. އަދި ދިރިއުޅުމުގެ މަޤްސަދަކީ މިއީ ކަމަށާއި، އޭނާ ވާދަކޮށް ކުރިއަރައިދާން ޖެހިފައި ވަނީ މިކަމުގައި ކަމަށް ދެކެއެވެ.
އިސްލާމީ ޝަރީޢަތް އައިސްފައިވަނީ ދެދުނިޔޭގެ ހަޔާތް ބާއްޖަވެރިކުރާނެ ގޮތް އިންސާނާއަށް ބަޔާންކޮށްދެއްވުމަށެވެ. އެހެންވެ އިންސާނާ އެންމެ ކަންބޮޑުވާ ކަމަކީ ދުނިޔެ ހޯދުން އެކަނި ކަމުގައި ހަދައި، އާޚިރަތް ނަގައިނުލުމަށް އިސްލާމް ދީން ގޮވައިލައެވެ.
ނަފްސުގެ މުއްސަނދިކަމާއި ނަފްސުގެ ފުދުންތެރިކަން ހާސިލުވާނީ ދުނިޔެއަށް ދަހިވެތިވުން މެދުމިންގަނޑެއްގައި ހިފަހައްޓައިގެންނެވެ. މުދަލާއި ފައިސާ ހޯދުމަށް މަސައްކަތްކުރާ މީހުންގެ މައިގަނޑު ބޭނުމަކީ، އެހެން މީހުންނާ ނުލައި ފަރުޖައްސައިލުމެވެ. އަޅުވެތިކަމަކީ ނިކަމެތިކަމަކަށް ވާތީ އެ ކަމުން ސަލާމަތް ވުމެވެ. ހަގީގަތަށް ބަލައިފިނަމަ މިކަން ހާސިލުވާ އެކަކުވެސް ނުފެނެއެވެ. މަތީ މަޤާމުތަކާއި ގިނަ އާމްދަނީ އާއި ބޮޑެތި މުސާރަތައް ލިބޭ މީހުންވެސް އެހެން މީހުންނަށް ބޭނުންޖެހިފައިވާ ތަން ފެނެއެވެ.
" ހަގީގީ މުއްސަނދިކަމަކީ މުދަލާއި ފައިސާ ގިނަވުމެއް ނޫން. ވަޒީފާ މަތިވުމެއް ނޫން. ފާސްތައް ގިނަވުމެއް ނޫން. އަނބިދަރީންނާއި ގާތްތިމާގެ މީހުން ގިނަވުމެއް ނޫން. އަދި އެއީ ދުނިޔެވީ އަރާމާއި ލައްޒަތުގެ ވަސީލަތްތައް ފުރިހަމަވުމެއް ނޫން. މިކަންކަމަށް އެދޭ މީހަކީ ފުދި އިތުރުވާ މިންވަރަށް ހުރިހާ އެއްޗެއް ހުއްޓަސް ދުނިޔެވީ އެދުންތައް ނިމުމެއް އަންނާނެ މީހެއް ނޫން. އަބަދުވެސް ބޭނުންވާނީ އިތުރުވާން. އެހެންކަމުން އެއީ ފަޤީރެއް".
މިއާ ޚިލާފަށް ނަފްސުގެ ފުދުންތެރިކަން ލިބިފައިވާ މީހަކީ ﷲ ގެ ޤަޟާއަށް ރުހިފައިވާ މީހެކެވެ. އޭނާ އަބަދުވެސް އެދޭނީ ﷲ ގެ ހަޟްރަތުގައިވާ އެއްޗަކަށެވެ. އެތަކެތި ފަނާވެގެންނެއް ނުދާނެއެވެ. އެނޫން ތަކެތި ފަނާވެގެންދާނެއެވެ.
ދުނިޔެވީ މުއްސަނދިކަމުގެ ފައިދާ ނުލިބޭ އެތައްބަޔަކު އުޅެއެވެ. ތަނަވަސްކަމުގެ އެތައް އަހުލުވެރީންނެއް ބަލިތަންމަތީގައި ތިބިތަން ނުފެނޭ ހެއްޔެވެ؟ އެމީހުންގެ ތަނަވަސްކަމުގެ ބޮޑު މަންފާއެއް ލިބެނީ ބޭސްއުފައްދާ ކާރުޚާނާތަކަށާއި ހަސްފަތާލުތަކުގެ މުވައްޒަފުންނަށެވެ.
ނަފްސު ފުދުންތެރިވެއްޖެ މީހާ އެދުންތައް މަދުވާނެއެވެ. އޭނާގެ އިއްޒަތާއި ޖާހު އުފުލޭނެތެވެ. އެހެންކަމުން މުސްލިމުން ތަބާވާން ޖެހޭނީ މިއުސޫލަށެވެ. މި މަންހަޖަށެވެ. އެއީ ޝަރުޢީ މިންގަނޑެވެ. މި މަންހަޖަށް ތަބާވާމީހާ ރިޒްޤު ހޯދުމުގައި ހީވާގިވުމާއެކު ޝަރުޢީ ވާޖިބުތައް އަދާކުރާނެއެވެ. އޭނާ އީމާންވާނީ ރިޒްޤު ދެއްވާ ފަރާތަކީ ﷲ ތަޢާލާ ކަމަށެވެ. ﷲ ތަޢާލާގެ ޚަޒާނާ އަކީ މަދުވެ ހުސްވެދާނެ އެއްޗެއްކަމަށް އޭނާ ޤަބޫލެއް ނުކުރާނެއެވެ.
މައުލޫމާތު: ހުކުރު ޚުތުބާ
