ރާއްޖެއިން ބޭރުގައި ކުރި ކައިވެންޏެކެވެ. ކައިވެނިކޮށްގެން ރާއްޖެއައިސް އެ ކައިވެނި ރަޖިސްޓްރީ ނުކުރެއެވެ. އެ ކައިވެންޏަށް ދަރިއަކު ލިބުނެވެ. އެހެންނަމަވެސް ކޯޓުގައި ރަޖިސްޓްރީ ނުކުރާތީ، އަދި ކައިވެނިކުރިކަމުގެ އެއްވެސް ހެއްކެއް އަންހެންމީހާގެ އަތުގައި ނެތުމުން އެމީހުންނަށް ލިބުނު ދަރިފުޅު އެއީ ކައިވެނީގެ މާތް ގުޅުމުން ލިބުނު ދަރިއެއް ކަމަކަށް ސާބިތުކުރެވޭނެ އެއްވެސް ގޮތެއް އެ އަންހެން މީހާ އަށް ނެތެވެ. އެ ދެމަފިރިން ދެމެދުގައި ޖެހުނު މައްސަލައެއްގެ ސަބަބުން ފިރިމީހާގެ އެއްބާރުލުން ނުލިބުނީ އެވެ. މި ލިބުނީ ކިހާބޮޑު ލަނޑެއް ހެއްޔެވެ.
ކޯޓުން ބޭރުގައި ބޭނުން ގޮތަކަށް ކައިވެނިކޮށް ވަރިކުރާ ބަޔަކު ވެސް އެބައުޅެއެވެ. މިފަދަ ކައިވެނިތައް ކުރުމުގެ ކުރިން ވިސްނަން އެބަޖެހެއެވެ. ކޮންމެ ތަނެއްގައި ކައިވެނި ކުރިއަސް އެ ކައިވެނި ކޯޓުގައި ރަޖިސްޓްރީ ކުރަން ޖެހެނީ ސަބަބުތަކެއް އޮވެގެންނެވެ.
ޝެއިޚް މުހައްމަދު ޝާފިޢު ލިޔުއްވައިފައިވެއެވެ. ބްލޮގްގައި ލިޔުއްވާފައިވާ ގޮތުގައި ކޮންމެ ތަނެއްގައި ކައިވެނި ކުރިއަސް ކައިވެނި ސައްހަވާނެއެވެ. އަދި މިގޮތަށް ކައިވެނިކޮށްފައި އެއްދާން ކޮށްފިނަމަ އެއީ ޒިނޭ އަކަށްވެސް ރޭޕަކަށް ވެސް ނުވާނެ އެވެ. އެހެންނަމަވެސް ކައިވެންޏާއި ވަރި އަކީ އިސްލާމް ދީނުގައި އެކަންކަމުގެ މައްޗަށް ވަރަށް ގިނަ ކަންކަން ތަރުތީބުވާ ކަމެކެވެ.
ކައިވެނި ކޯޓުގައި ރަޖިސްޓްރީ ކުރަންޖެހޭ ސަބަބަކީ، ކައިވެންޏަކީ އެކަމުގެ މައްޗަށް ވަރަށް ގިނަ އިޖްތިމާޢީ ހައްޤުތައް ބިނާވާ ކަމަކަށްވާތީ އެ ހައްޤުތައް ގެއްލޭ ހާލަތުގައި އޭގެ ހައްޤުވެރިންނަށް އެ ހައްޤުތައް ހޯދައިދިނުމަށް ބާރު އެޅުމާއެކު، ނަސަބު އޮޅުންފަދަ ކަންކަމުން މުޖުތަމަޢު ސަލާމަތްކުރެވޭނީ ކައިވެންޏާއި ވަރީގެ ރެކޯޑްތައް ބަލަހައްޓައި އެކަންކަން ޒިންމާދާރު އިދާރާއެއްގެ ދަށުން ކޮށްގެން ކަމަށްވާތީއެވެ.
އެގޮތުން މިކަމުން ވަރަށް ގިނަ އެހެން ހުކުމްތަކަށްވެސް އަސަރު ކުރެއެވެ.
1 ކިރުދިނުމުގެ ހުކުމްތައް
2 ދަރިފުޅު ބެލެހެއްޓުން
3 ޚަރަދު ދިނުން (އަނބިދަރިންގެ ޚަރަދު، ޢިއްދައިގެ ޚަރަދު)
4 ޢިއްދައިގެ ހުކުމްތައް
5 ވަލީވެރިކަން
6 ވާރުތަމުދާ
7 ޤިޞާޞް ހިފުން
8 ވައްކަމުގެ ހައްދު ޤާއިމް ކުރުން
9 ޤަޛްފު ކުރުމުގެ ހައްދު ޤާއިމުކުރުން
10 ހެކިދިނުން
ކައިވެންޏާއި ވަރި ރަޖިސްޓްރީ ނުކުރާނަމަ މި ހުރިހާ ހުކުމްތަކަށް ބުރޫއަރާނެކަމަށް ޝެއިޚް މުހައްމަދު ޝާފިޢު ލިޔުއްވައިފައިވެއެވެ. އަދި ކައިވެނީގެ ރުކުންތައް ހަމަވުމާއެކު ކޯޓުން ބޭރުގައި ކައިވެނިކުރިއަސް ކައިވެނި ސައްހަވުމުގެ މުރާދަކީ އެގޮތަށް ކައިވެނި ކުރުން އެއީ ރަނގަޅު ކަމެއް ކަމުގައި ބަލައިގަނެ އެގޮތަށް އަމަލު ކުރަމުން ގެންދިޔުމެއް ނޫން ކަމަށް ވެސް ފާހަގަކޮށްފައިވެއެވެ.
ކައިވެނީގެ ނަމުގައި ލަނޑު ދޭ ބައެއް
މެދު އުމުރުގެ ފިރިހެނުންނެވެ. ކައިވެނި ކުރަން ބޭނުންވަނީ ކޯޓުން ބޭރުގަ އެވެ. ކުރީގެ ކައިވެންޏަށް ލިބުނު ދަރިންނަށް ޚަރަދުގެ ގޮތުގައި ކޯޓަށް ދައްކަން ޖެހޭ ލައްކައެއްހާ ރުފިޔާ ނުދައްކަނީސް ކޯޓު މެދުވެރިކޮށް ކައިވެނި ކުރެވެން ނެތީއެވެ.
" ކޯޓުން ބޭރުގައި ކައިވެނިކޮށްފަ ދިރިއުޅޭނީ ކަމަށް މިބުނަނީ. އަދި ރުފިޔާ ލިބުމުން ކޯޓަށް ދައްކަންޖެހޭ ރުފިޔާ ދެއްކުމަށްފަހު އަނެއްކާ ކޯޓުގައި އެއޮންނަ އުސޫލުން ކައިވެނި ރަޖިސްޓްރީ ކުރާނީ ކަމަށް މިބުނަނީ. އެގޮތަށް ދަންނަ މީހަކާ ކައިވެނި ކުރި މީހެއް މާގިނަ ދުވަހެއް ނުވެ ވަރިވެސް ކޮށްފި. އެކައިވެންޏަކީ ކުރެވުނު ކައިވެންޏެއް ކަމެއް ފެންނަން ނެތް". މިވެސް މުޖުތަމައުގައި ވަރަށް ފަހުން ދިމާވި ކަމެކެވެ.
ނިންމުން
ކައިވެނި ކުރާއިރު ވިސްނާށެވެ. އެންމެ ރަނގަޅު ގޮތަކީ ކޯޓުގައި ރަޖިސްޓްރީ ކޮށްގެން ކައިވެނި ކުރުމެވެ. ދޮގުހެދުން މިހާ އާންމުވެފައިވާ ޒަމާނެއްގައި ކައިވެނި ކުރެވޭ މީހާ އެކުރަނީ ކިތައް ވަނަ ކައިވެނިކަމެއް އެނގޭނީ ކިހިނެއް ހެއްޔެވެ؟ އަދި އެމީހާ ލަނޑު ދޭނީ ކޮންއިރަކު ކަމެއް އެނގޭ ހެއްޔެވެ؟ ލިބޭ ދަރިފުޅަކީ ބައްޕަ ނެތް ކުއްޖަކަށް ވާން ބޭނުން ހެއްޔެވެ؟ ކައިވެނި ރަޖިސްޓްރީ ނުކުރާނަމަ އެގެއްލޭ ހައްގުތަކަށް ވިސްނާށެވެ.
ކިޔުންތެރިންގެ ހިޔާލު
Mi alhugandah dhimaavefa và haalatheve. Dharifulhu ge bahpa dharifulhah ehme 1.5 yes ga dharifulhu dhookohlaifi eve. Miadhu mi dharifulhah 8 aharu vy iru adhives mikamakah hahleh nulibe eve. Alhuganduge umuru mudhani kaivenyeh nukurevi hitheh nei firihenaku alhugandah dhin landehga jalehga in gaidhy aku fadhain neve. Kuhja ah 1rf ves haradhu nukure eve. Mivyha thanah alhugandu eki vazyfa thakah gos libe madhu ehchakun midhani dharifulhu balamun neve. Kaiveni registry kuran dhiyumun enguni ambassy ge stamp nei kameve. Ambassy ge stamp jahan eki eki gothun ulhegen vesfaisa nethumuge sababun mikan nuve eve. Umuru nimigen midhani firiyaku nethi ekani veri mayehge gothuga eve. Gedhiruveri kamah viyas ehen kamakah ves form eh nuleve eve. Dharifulhu ge huriha hahgu thakun dharifulhu vany mahroom vefa eve . Ehyvaane atheh nethi mihen ulheytha mihaaru 8 aharu vy eve. Alhugadaki haahsa ehy ah beynun va myhaky meve. Shukuru kurun noon gotheh miadhaku netheve.
ކޮމެންޓްސް ބަންދުކުރެވިފައި