މާތް ﷲ ގެ ހަޟްރަތުގައި އިންސާނާގެ ނަފްސުގެ މާތްކަމާއި، މަތިވެރިކަމުގެ ބޮޑުކަން ނިކަން ތަޞައްވުރަށް ގެނެސް ބަލާށެވެ. މާތް ﷲ މި ނަފްސު ރައްކާތެރިކުރުން ވާޖިބު ކުރެއްވިއެވެ. މި ނަފްސަށް އަނިޔާކުރުމާއި، ގޯނާކުރުން ނަހީކުރެއްވިއެވެ. މި ނަފްސުގެ ޙައްޤުތައް އަދާކުރުމަށް އަމުރުކުރެއްވިއެވެ.
ނަފްސަކީ ހާދަ އަގުބޮޑު އެއްޗެކެވެ. އެއީ އިންސާނުންނަށް އުފެއްދޭނެ އެއްޗެއް ނޫނެވެ. ހަލާކުވުމުން މަރާމާތުކޮށް ރަނގަޅުކޮށްލެވޭނެ އެއްޗެއްވެސް ނޫނެވެ. މާތް ﷲ ވަނީ ނަފްސާ މުއާމަލާތުކުރާއިރު ހުއްދަވެގެންވާ ކަންތައްތަކާއި ހުއްދަވެގެންނުވާ ކަންތައްތައް ބަޔާންކޮށްދެއްވާފައެވެ.
އިޙްސާންތެރިއަކަށް ވެވޭތޯ މަސައްކަތްކުރާށެވެ. އިޙްސާންތެރިކަމުގެ ތެރޭގައި ތިމާގެ ނަފްސާއި އެހެން މީހުންގެ ނަފްސު ރައްކާތެރިކުރުމާއި، ނުރައްކަލަށް ހުށަނޭޅުން ވެއެވެ. މަގުމަތީގައި ދުއްވަން ކަނޑައަޅާފައިވާ ބާރުމިނާ ޚިލާފަށް އެއްގަމު އުޅަނދުތަކާއި ކަނޑުމަތީގައި ދުއްވާ އުޅަނދުފަހަރު ދުއްވުމަކީ، ނަފްސު ހަލާކަށް އެއްލައިލުމެކެވެ. މަގުމަތީގައި ނުވަތަ ކަނޑުމަތީގައި އެކަކު އަނެކަކާ ވާދަކޮށް ރޭސް ޖެހުމަކީ ނަފްސު ހަލާކަށް ހުށަހެޅުމެވެ. ވަރުބަލިވެ ނިދިއައިސް ތާއްޔާ ޖެހެމުންދާ ހިނދު، ނުވަތަ ތިމާގެ ނަފްސު ކޮންޓްރޯލް ނުކުރެވޭ ހާލަތުގައި މަގުމައްޗަށް ނުކުމެ އުޅުމަކީ ވެސް ނަފްސު ހަލާކަށް އެއްލައިލުމެކެވެ. ފޯނާ ކުޅެމުން އުޅަނދުފަހަރު ދުއްވަނިކޮށް އެކްސިޑެންޓު ވަނީ ކިހާވަރަކަށް ހެއްޔެވެ؟ މަގުމަތި އޮތީ ހުސްކޮށް ކަމަށް ހީކޮށް ހިސާބަށްވުރެ ބާރަށް ދުއްވަމުންދަނިކޮށް ނުރައްކާތެރި ހާދިސާތައް ހިނގާފައި ހުރީ ކިތައް ފަހަރު ހެއްޔެވެ؟
މިފަދަ އަމަލުތަކުގެ ނަތީޖާއަކީ ކޮބައިހެއްޔެވެ؟ މައިންބަފައިން ހިތާމައިގެ ކަނޑަކަށް ޣަރަޤު ވުމެވެ. ލޯބިވާ ފިރިމީހާ ދުށުމުގެ އިންތިޒާރުގައި ގޭގައިއިން އަނބިމީހާއަށް ކުއްލިއަކަށް ހިތާމަވެރި ފޯނު ކޯލެއް ލިބުމެވެ. އޭނާގެ ޅަ ދަރީން ޔަތީމުވެ އެކުދީންގެ ކުރިމަގު ބަނަވުމެވެ. ޤައުމަށް ފައިދާހުރި ހަކަތަތަކެއް ގެއްލިގެން ދިޔުމެވެ. ބައެއް މީހުން ދުނިޔެއާއި ވަކިވަނީއެވެ. އަނެއް ބަޔަކު ނުކުޅެދުންތެރިވެ، ބަޔަކު އުފުއްލަން ޖެހޭ ބުރައަކަށް ވަނީއެވެ. އާއިލާއަށް ބަރުދާސްތުކުރާންޖެހޭ ދާއިމީ ހިތާމައަކަށް ވަނީއެވެ.
މަގުމަތީގެ ހާދިސާތަކުގައި އަނިޔާ ލިބޭ ގިނަ މީހުންނަކީ ޒުވާނުންނެވެ. އެއީ އެމީހުންގެ އުފެއްދުންތެރިކަމަށާއި ހަކަތައަށް ޤައުމު އެދިއެދިތިބި ބައެކެވެ. މިފަދަ ހާދިސާތަކުގެ ސަބަބުން އެމީހުން ނުކުޅެދުންތެރީންނަށް ބަދަލުވެއެވެ. މިއީ ގިނަ ފަހަރަށް އަމިއްލަ އިޚްތިޔާރުގައި ކުރާ ނޭދެވޭ އަމަލުތަކުގެ ނަތީޖާ އެވެ.
ވިސްނާނުލައި ޤަވާއިދާ ޚިލާފަށް ސައިކަލް ނުވަތަ ކާރު ދުއްވުމުގެ ސަބަބުން، ގެއްލުމާއި ހަލާކު ކުރިމަތިވަނީ ހަމައެކަނި ތިމާއަކަށް ނޫނެވެ. މިފަދަ ހާދިސާތަކުގެ ސަބަބުން ބައެއް ފަހަރަށް މުޅި އާއިލާ ފަނާވެ ނެތިވެގެން ދެއެވެ.
އަމާންކަމާއި ހަމަހިމޭންކަންމަތީ މަގުތައް ބޭނުންކުރުމަކީ ރަހްމާންވަންތަ ރަސްކަލާނގެ އަޅުންގެ ސިފައެކެވެ. މުއުމިނުން މަގުމަތީގައި އެއްޗެހި ދުއްވާން ވާނީ، މީހަކަށް ގޯނާއެއް ތުރާލެއް ނުލިބޭގޮތަށެވެ.
މައުލޫމާތު: ހުކުރު ޚުތުބާ
