ދުނިޔޭގެ ޒީނަތްތެރިކަމަކީ، މީހާ އޭނާގެ ވެރި ރަސްކަލާނގެ މަތިން ހަނދުމަ ކުރުމުން އެއްކިބާކުރާ އެއްޗެކެވެ. ދުނިޔެއަކީ ނުހަނު ކެހިވެރި ތަނަކަށް ވީހިނދު، ދުނިޔޭގެ އެދުންތަކާމެދު ވިސްނުމެއް ނުބަހައްޓައި އުޅެން ފަށައިފިނަމަ އެންމެފަހުން ތިމާ އެ ކެހިވެރިކަމުގައި ޖެހޭނެއެވެ.
މާތް ﷲ އިންސާނާ އަށް ދުނިޔަވީ ހަޔާތް ދެއްވާފައިވަނީ އޭނާގެ އުޚްރަވީ ހަޔާތަށްޓަކައި ގޮވާންކުރާ ދަނޑުބިމެއްގެ ގޮތުގައެވެ. އެ ބިމުގައި އޭނާ ރަނގަޅު ގޮވާމެއް ނުކޮށްފިނަމަ އޭނާ އޭނާގެ ވެރި ރަސްކަލާނގެ ހަޟްރަތަށް ދާނީ ހުސްއަތާއެވެ. ބުއްދިވެރިޔަކީ އަބަދާއި އަބަދު އުޚްރަވީ ހަޔާތް ހިތްމައްޗަށް ގެނެސް ހަޔާތުގެ ބޭނުން ހެޔޮގޮތުގައިހިފާ މީހާއެވެ. ދުނިޔެއާއި އާޚިރަތަށްޓަކައި މަސައްކަތްކުރާ މީހާއެވެ.
" ދުނިޔޭގައި ކިތަންމެ މުދަލެއް ހޯދިއަސް އެއީ ވަގުތީ އެއްޗެއް. ފަނާވެގެންދާނެ އެއްޗެއް. ނުވަތަ ތިބާ އެތަކެތި ދޫކޮށްފައި ދާންޖެހޭނެ އެއްޗެއް. އެއަށްފަހު އޮތީ މާތް ﷲ ޙަޟްރަތުގައި ޖަވާބުދާރީ ވާންޖެހޭ ދުވަސް. އެދުވަހު އޮތީ ދެގޮތެއް. އެއްގޮތަކީ ތިމާއަކީ މާތްﷲ އެންގެވި ގޮތަށް އެމުދާ ހޯދައި އެގޮތުގައި އެމުދާ ހޭދަކޮށްފައިވާ މީހަކު ކަމުގައިވުން. އެފަދަ މީހަކަށް ތިބާ ވެއްޖެނަމަ އުފަލުގެ ކޮޅެއް ނެތް. އަނެއްގޮތަކީ މުދާ ހޯދުމުގައްޔާއި ޚަރަދުކުރުމުގައި މާތް ﷲ ގެ އަމުރުފުޅާ ޚިލާފުވެ އޭގެ ސަބަބުން މާތް ﷲ ހަނދުމަކުރުމުން ތިބާ އެއްކިބާ ވެފައިވުން. އެފަދަ މީހަކަށް ހުރި ހިތާމައިގެ ކޮޅެއްނެތް. އެފަދަ މީހަކަށް ހުރި ހަލާކުގެ ބޮޑުކަމާއެވެ!"
ދުނިޔެވީ މަސައްކަތް ކުރަންޖެހެއެވެ. ނަމަވެސް އެއީ މާތް ﷲ ރުއްސަވާ ގޮތަށް ކުރާ މަސައްކަތްތަކަށް ވާންޖެހޭނެއެވެ. މާތް ﷲ އަށް ތަޤްވާވެރިވާ މީހުންނަށް އެކަލާނގެ ތަނަވަސްކަން ދެއްވާނެއެވެ. ތަޤްވާވެރިވުމަކީ އެކަލާނގެއަށް އަދާކުރަންޖެހޭ އަޅުކަންތަކަށް ފަރުވާތެރިވެ، ނަހީކުރެއްވި ހުރިހާ ކަންތަކާ ދުރުވުމެވެ. ﷲ ގެ މަގަށް ފުރަގަސްދީ މޫނު އަނބުރާލައިފި މީހެއްގެ ދިރިއުޅުން އެކަލާނގެ ދަތި ކުރައްވާނެކަން ދަންނާށެވެ.
އަހަރުމެންގެ މުދަލާއި ދަރިންނަކީ މާތް ﷲ ގެ މަގުން އަހުރެމެން އެއްކިބާކުރާ އެއްޗެއްކަމުގައި ނުހަދާށެވެ. އެއިރުން މާތް ﷲ އަހުރެމެންގެ މައްޗަށް އެކަލާނގެ ބަރަކާތުގެ ދޮރުތައް ހުޅުއްވައިދެއްވާނެއެވެ. ދުނިޔޭގެ ކެހިވެރިކަމުގައި ޖެހި އުޚްރަވީ ހަޔާތް ބަރުބާދު ނުކުރުމަށް ތިޔަ އެންމެ އަޚުންނަށް ނަސޭހަތްތެރިވެ ވަސިއްޔަތް ކުރަމެވެ.
މައުލޫމާތު: ހުކުރު ޚުތުބާ
