މި ވޭތުކުރަމުން ދަނީ ޝައުބާންމަހުގެ ދުވަސްތަކެވެ. މި މަހަކީ އެތައް ގޮތަކުން ޚާއްސަ މަހެކެވެ. ރަމަޟާން މަހަށް މަރްހަބާ ކިޔުމަށް ތައްޔާރުވަމުން އަންނަ މައްސަރަކަށް ވުމުންނެވެ. ޝައުބާން މަހުގެ ހަނދު ފެނުމާއެކު، ރޯދައިގެ މާތްކަމާއި، ރޭ އަޅުކަމާއި، ހެޔޮ އަމަލުތައް ކޮންމެ މުސްލިމެއްގެ ހިތަށް ވަންނާތީއެވެ. ޝައުބާންމަހު، އަޅުކަމުގައި ހީވާގިވުމަކީ، ރަމަޟާންމަހު އަޅުކަމުގައި މަަަސްޣޫލުވުމަށް ލިބޭ ތަމްރީނެއް ކަމުގައި ވާތީއެވެ.
މާތް ނަބިއްޔާ ﷺ ގެ އަމަލުފުޅުތަކުގެ މަތިން އަހުރެމެން ހަނދާން އާކުރަމާ ހިނގާށެވެ. " މާތް ނަބިއްޔާ ﷺ ޝަޢުބާން މަހަށް ވުރެ ގިނައިން (ސުންނަތް) ރޯދަ ހިއްޕަވާ މައްސަރެއް ނުވެއެވެ. އެ މަހުގައި (ރޯދަފުޅު ހިއްޕަވާލެއް ގިނަކަމުން) މުޅި މައްސަރުގައި ރޯދަފުޅު ހިއްޕަވާފަދައެވެ".
ސިއްޙީ ގޮތުންނާއި އުމުރުގެ ގޮތުން، އެކި މީހުންގެ ހާލަތު ތަފާތެވެ. އެހެންކަމުން އެމީހަކަށް ކުޅަދާނަވީ މިންވަރަކުން ހެޔޮ އަމަލު ކުރާށެވެ. އުމުރުގެ ދުވަސްތަކަށް ނިމުމެއް އަންނާނެކަމީ ކަށަވަރުވެގެންވާ ކަމެކެވެ. އެވަގުތު އަންނާނީ ކިހިނެއް، ކޮންއިރަކު، ކޮންތާކު ހުއްޓައި ކަމެއް، އެއްވެސް މީހަކަށް އެނގިގެނެއް ނުވެއެވެ.
ކީރިތި ރަސޫލާ ﷺ ހަދީޘް ކުރައްވާފައިވެއެވެ. މާނައީ: " ޝައުބާންމަސް ދެބައި ވެއްޖެނަމަ ފަހެ ތިޔަބައިމީހުން ރޯދަ ނުހިފާހުށިކަމެވެ.". މި ހަދީޘުން ދޭހަވަނީ އާންމުކޮށް ހިފަމުންދާ ސުއްނަތް ރޯދަ ފިޔަވައި މި ދުވަސްތަކުގައި ސުންނަތް ރޯދަ ނުހިފުމަށް އަމުރު ކުރެއްވިކަމެވެ. އެކަމަކު ފާއިތުވި ރަމަޟާންމަހުގެ ރޮދައެއް ޤަޟާ ކުރަން ޖެހިފައިވާ މީހަކު ނަމަ، ނުވަތަ ނަދުރު ރޯދައެއް ހިފަން ޖެހިފައިވާ މީހަކު ނަމަ، ނުވަތަ އާދަކޮށް ކޮންމެ ހަފުތާއެއްގެ ހޯމަ ދުވަހާއި ބުރާސްފަތި ދުވަހު ރޯދަހިފުމަށް އާދަވެފައިވާ މީހަކު ނަމަ، ނުވަތަ އާދަކޮށް ދެދުވަހުން އެއް ދުވަހު ރޯދަހިފާ މީހަކު ނަމަ، ޝައުބާން މަސް ދެބައިވުމުން ވެސް އެފަދަ ރޯދައެއް ހިފުން މަނާވެގެނެއް ނުވެއެވެ. ނަމަވެސް ޝައުބާން މަހުގެ 30 ވަނަ ދުވަހަކީ ޝައްކުގެ ދުވަސް ކަމުގައި ވާތީ އެ ދުވަހު އެއްވެސް ރޯދައެއް ހިފުން ހުއްދަވެގެނެއް ނުވެއެވެ.
ވޭތުވެދިޔަ އަހަރުގެ ފަރްޟު ރޯދައެއް ޤަޟާކުރަން ޖެހިފައިވާ ނަމަ އެ ރޯދަ އަވަހަށް ޤަޟާ ކުރާށެވެ. ހީވާގިކަމާއެކު ރަމަޟާންމަހަށް އިސްތިޤުބާލުކުރަން ތައްޔާރުވާށެވެ. ރަމަޟާންމަހަށް ތައްޔާރުވުމަކީ އިސްރާފު ކުރުން އޮތްކަމެއް ނޫންކަން ދަންނާށެވެ. ފިތުރު ޒަކާތް ދެއްކުމަށް ނިޔަތް ގަނެ ރަމަޟާންމަސް ނިމުމުގެ ކުރިން އެ ޒަކާތް ދައްކާށެވެ. ދީލަތިކަން އިތުރުކުރާށެވެ.
މައުލޫމާތު: ހުކުރު ޚުތުބާ
