ކުރިމަތިވަމުން މިއަންނަނީ ހެޔޮކަމާއި ދަރުމައިން ފުރިގެންވާ މެހުމާނެކެވެ. ބަރަކާތުން ފުރިގެންވާ މެހުމާނެކެވެ. މި މަތިވެރި މެހުމާނަށް އެކަށީގެންވާ އިސްތިޤުބާލަކުން އިސްތިޤުބާލު ކުރަންޖެހެއެވެ. އަދި މެހުމާންދާރީ އަދާކުރަންޖެހޭ އެންމެ ފުރިހަމަ ގޮތުގައި މެހުމާންދާރީ އަދާކުރަންޖެހެއެވެ.
" މި ބަރަކާތްތެރި މައްސަރާ އަހުރެމެން ކުރިމަތިލާއިރު އެންމެ ފުރަތަމަ ކުރަންޖެހޭ ކަމަކީ، ފުރިހަމަ ތައުބާއަކުން ތައުބާވުން. އަހުރެމެންގެ ހަޔާތުގައި ކުރެވެމުންދާ ކުށްފާފަތަކާ ދުރުހެލިވެ، ހަޔާތް އާހަޔާތަކަށް ބަދަލުކޮށް އިސްލާހުކުރުމާއެކު މި މަތިވެރި މެހުމާނާއާ ބައްދަލުކުރުން".
މި ބަރަކާތްތެރި މައްސަރުގެ ދުވަސްތަކާއި ކުރިމަތިލާން ވާނީ ފުރިހަމަ އީމާންކަމާއެކު އެ މައްސަރުގެ ފުރިހަމަ ދަރުމައާއި ސަވާބަށް އެދޭ ހާލުގައެވެ. ރަމަޟާންމަހާ ކުރިމަތިލާންވާނީ އެ މައްސަރުގެ ތަރުބަވީ މަދަރުސާއިން އަހުރެމެންގެ ނަފުސު އިސްލާހުކޮށް އެ ނަފުސަށް ދިރުން ގެނެސްދީ، ހަޔާތުގެ އާސަފްހާތަކެއް ހުޅުވާލުމުގެ މަތިވެރި އަޒުމާއެކުއެވެ.
" ނަފުސު ހެޔޮކަންކަމަށް ތަރުބިއްޔަތުކޮށް ހޭނުވުމަށް މިއަށްވުރެ ވަކި މަތިވެރި ރަނގަޅު ދުވަސްތަކެއް ލިބޭނެހެއްޔެވެ؟ ރަމަޟާން މަހަކީ ތަޤްވާވެރިކަމަށް ވާސިލުކޮށްދޭ ހުރިހާ ސަބަބުތަކެއް ޖަމާވާ މަތިވެރި މައްސަރެކެވެ. ނަފުސުގައި ޖެހިފައިވާ ލައްތައް ފިލުވައި އެ ނަފުސު ތާހިރުކުރުމަށް މިމައްސަރާ ކުރިމަތިލާ ބަޔަކަށް އަހުރެމެން ވާން ޖެހެއެވެ. އަހަރުގެ އެހެން މަސްތަކާ ޚިލާފަށް އަޅުކަމުގައި ހީވާގިވެ ވަރުގަދަ އަޒުމެއްގައި މި މައްސަރާ ކުރިމަތިލާން ޖެހެއެވެ.
ކައުއިތުރު ރަސޫލާ ﷺ އަސްހާބު ބޭކަލުންނަށް އެމަހުގެ މުހިއްމުކަމާއި ބަރަކާތްތެރިކަން ބަޔާންކޮށްދެއްވައެވެ. ރަސޫލާ ﷺ ހަދީޘްކުރައްވާފައިވެއެވެ. މާނައީ: "ތިޔަބައިމީހުންގެ ގާތަށް ރަމަޟާންމަސް އަތުވެއްޖެއެވެ. އެއީ ބަރަކާތްތެރި މަހެކެވެ. ﷲ ސުބުހާނަހޫ ވަތަޢާލާ ތިޔަބައިމީހުންގެ މައްޗަށް އެމަހުގެ ރޯދަ ފަރުޟު ކުރެއްވިއެވެ. އެމަހުގައި އުޑުގެ ދޮރުކޮޅުތައް ހުޅުވެއެވެ. އަދި ނަރަކައިގެ ދޮރުތައް ބަންދު ކުރެވެއެވެ. އަދި ޝައިތާނުންގެ ތެރެއިން ބޮޑެތި މާރިދުން ކަސްތަޅު އެޅުވެއެވެ. އެމަހުގައި އެއްހާސް މައްސަރަށްވުރެ ހެޔޮކަންބޮޑުވެގެންވާ ރެއެއް ވެއެވެ. އެރޭގެ ހެޔޮކަމުން މަޙްރޫމުވެއްޖެ މީހާ (ހުރިހާ ހެޔޮކަމަކުން) މަޙްރޫމުވެއްޖެއެވެ".
ރޯދަމަހަށް ތައްޔާރުވުމުގެ ގޮތުން ކުރަންޖެހޭ އެންމެ މުހިންމު އެއްކަމަކީ، ރޯދައިގެ ޝަރުޢީ ހުކުމްތައް ދެނެގަތުމެވެ. ރޯދައިގެ މަތިވެރިކަމާއި ފުރިހަމަ ޘަވާބާއި ދަރުމަލިބޭގޮތަށް ރޯދަހިފާނެގޮތް ދަސްކުރުމެވެ. އެއީ ރޯދަ ގެއްލޭ ކަންތައްތަކާއި، ރޯދައަށްހުރެ ކުރުން މަކުރޫހަ ކަންތައްތައް ދެނެގަނެ އެކަންކަމުން ދުރުހެލިވުމަށްޓަކައެވެ. ރޯދައިގެ ހިސާބެއްނެތް މަތިވެރިވެގެންވާ އަޖުރު ލިބިގަތުމަށްޓަކައެވެ.
ރޯދަމަހަށް ތައްޔާރުވާންވީ ހަމައެކަނި ގޭތެރެ ރިތިކުރުމާއި ފަރުނީޗަރުތައް ބަދަލުކުރުމާއި ކާބޯތަކެތި ގަނެ ޖަމާކުރުމަކުންނޫނެވެ. ގޭތެރެ ރީތިކޮށް އާބާތުރަފިލުވުމާއި، ފަރުނީޗަރު ބަދަލުކުރުމާއި އަދި ކާބޯތަކެތި ހޯދުމަކީ އޭގެ ޒާތުގައި މައްސަލައެއްނޫނެވެ. މިމަތިވެރި މައްސަރާ ބައްދަލުކުރާއިރު މިއަށްވުރެ ބޮޑު އިސްކަމެއް ދޭންޖެހޭނީީ އެމަހުގެ ފުރިހަމަ ދަރުމައާއި ސަވާބު ހާސިލްކުރެވޭނެ ގޮތަކަށް ކަންކަން ރާވައިގެން އެމައްސަރާ ބައްދަލުކުރުމަށެވެ.
މައުލޫމާތު: ހުކުރު ޚުތުބާ
