މާލެ އަދި ހުޅުމާލޭގެ މަގުތަކުގައި އެކްސިޑެންޓްތައް ހިނގާ އެންމެ ބޮޑު އެއް ސަބަބަކީ ބާރުސްޕީޑުގައި އުޅަނދުތައް ދުއްވުން ކަމަށް ދިވެހި ފުލުހުންގެ ޚިދުމަތުގެ ހެޑްއޮފް ގަލޮޅު ޕޮލިސް ރެސްޕޮންސް އެންޑް ޕެޓްރޯލް އިނިސްޕެކްޓަރ އޮފް ޕޮލިސް އިބްރާހީމް ޚަލީލު ވަނީ ވިދާޅުވެފައެވެ.
'ޒީޓައިމްސް' އަށް ދެއްވި އިންޓަވިއުގައި ޚަލީލު ވިދާޅުވީ އެކްސިޑެންޓްތައް މަދުކުރުމަށް ފުލުހުން ވަރަށް ގިނަ މަސައްކަތްކުރާ ކަމަށެވެ.
" އެކްސިޑެންޓްތައް ގިނަވާން އެންމެ ބޮޑަށް ފާހަގަކުރެވޭ އެއްކަމަކީ ބާރުސްޕީޑުގައި ދުއްވުން. ޚާއްސަކޮށް ބުރިޖުގައި އަދި ހައިވޭ އޭރިއާގައި ބާރުސްޕީޑުގައި ދުއްވުން. ބާރަށް ދުއްވާ ފަރާތްތަކަށް ޓާގެޓްކޮށްގެންވެސް އޮޕަރޭޝަންތައް ހިންގާ ބާރަށް ދުއްވާ މީހުން ހުއްޓުވުމަށް. ސްޕީޑް ކެމެރާ ބޭނުންކޮށްގެން ވެސް އެފަދަ ފަރާތްތަކަށް ފިޔަވަޅު އެޅުމުގެ މަސައްކަތް ކުރިއަށްގެންދޭ" ޚަލީލު ވިދާޅުވިއެވެ.
ބާރު ސްޕީޑުގައި ދުއްވާ ފަރާތްތައް އެއީ ނުރައްކާތެރި ދުއްވުމެއްކަން ބެލެވޭ ހާލަތެއްނަމަ އެ ދުއްވާ އުޅަނދު ޓޯކޮށް އަދި ދަނީ ޖޫރިމަނާ ކުރަމުންނެވެ.
އެކްސިޑެންޓްތައް ހިނގުމަށް ދިމާވާ ދެވަނަ ކަމަކީ ދުއްވަންޖެހޭ ލޭން ފިޔަވައި އެހެން ލޭންތަކުގައި ދުއްވުމެވެ.
" ވެހިކަލް ދުއްވަންޖެހޭނީ އެ ވެހިކަލެއް ދުއްވަން އޮންނަ ސަރަހައްދުގައި. މިސާލަކަށް ބުރިޖުގައި ހަތަރު ފުރޮޅުލީ ވެހިކަލު ދުއްވާ ލޭނުގައި އެހެން ވެހިކަލްތައް ދުއްވުމަކީ މަނާކަމެއް. އެއީ އޯވަޓޭކް ކުރަން ކަމުގައިވިއަސް. އެންމެ ގިނަ އެކްސިޑެންޓްތައް ހިނގާފައިވަނީ ބާރު ސްޕީޑުގައި ދުއްވައިގެން ދެން ލޭނު ބަދަލުކުރަން އުޅުމުގެ ތެރޭގައި. ބައެއް ފަހަރު ހަތަރު ފުރޮޅުލީ އުޅަނދުތައްވެސް އެބައަރާ ދެފުރުޅުލީ އެއްޗެހި ދުއްވާ ލޭނަށް" ޚަލީލު ފާހަގަކުރެއްވިއެވެ.
އަދި ދުއްވާ އުޅަނދުގައި މައްސަލައެއް ދިމާވެގެން ބުރިޖު ނުވަތަ ހައިވޭގައި ޕާކުކޮށްފަ އޮންނައިރުވެސް އެކްސިޑެންޓްތައް މަދުންނަމަވެސް ހިނގައެވެ.
" ވެހިކަލަކަށް މައްސަލައެއް ދިމާވެއްޖެނަމަ ބުރިޖުގައި ނުވަތަ ހައިވޭގައި ޕާކުކޮށްފަ ބަހައްޓާކަން ފާހަގަކުރެވޭ. މިހެން މަޑުކޮށްފަ ނުވަތަ ޕާކުކޮށްފަ ހުންނަ ގަޑީގައި ދުއްވާ އެއްޗިއްސަށް ކޮންޓްރޯލް ނުކުރެވިގެން އައިސް ޕާކުކޮށްފަ އޮންނަ ވެހިކަލުގައި ޖެހިގެން އެބަހުރި އެކްސިޑެންޓް ހިނގާފަ. މިގޮތަށް ވެހިކަލެއް ހުއްޓިއްޖެނަމަ ފުލުހުންނަށް ގުޅައިގެން އެހީތެރިކަން ހޯދައިގެން ނަމަވެސް އެވެހިކަލެއް އެތަނުން ނަގަންވާނެ. ބުރިޖު ނުވަތަ ހައިވޭގައި ހުންނާނެ ޕާކުކުރުން މަނާ ބޯޑު ހަރުކޮށްފަ" ޚަލީލު
އަދި 2 ނުވަތަ 3 ސައިކަލުގައި ދާ މީހުން އެއްވަރަކަށް ދުއްވާފަ ދަމުން ވާހަކަދައްކަމުން ދުއްވާކަން ފާހަގަކުރެވޭ ކަމަށާއި މިގޮތަށް ދުއްވާއިރު ފަހަތުން އަންނަ އުޅަނދު ކުރިއަށްދާން އުޅެގެންވެސް އެކްސިޑެންޓްތައް ހިނގާފަ އެބަހުއްޓެވެ. އަދި މަގުމަތި ބަލަހައްޓާ ފުލުހުން ކުރިއަށްވުރެ އިތުރުވެފައިވާކަން ފާހަގަކުރެއްވިއެވެ.
" ކުރިއަށްވުރެ އިތުރުވާނެ މިމަސައްކަތްކުރާ ފުލުހުން. ހުޅުމާލޭގައި ވެސް ފޭސް 1 އަދި ފޭސް 2 ގައި ޕޮލިސް ސްޓޭޝަން ހުންނާނެ. ރަސްމީ ދުވަސްތަކުގައި 50،000 އާއި ގާތްކުރާ ވަރަކަށް ބުރިޖުގެ ޚިދުމަތް ހޯދާ. އެހާވެސް ބާރުބޮޑު. ހިޔާ ފުލެޓުތަކަށް މީހުން ދިޔައިމަ ވެހިކަލްތައް ވަރަށް ގިނަ. ކުރިއާއި ބަލާފަ މިހާރު އެކްސިޑެންޓްތައް މަދު" ޚަލީލު ވިދާޅުވިއެވެ.
އިންޓަވިއު ނިންމާލަމުން ޚަލީލު ވިދާޅުވީ ބާރު ސްޕީޑުގައި ދުއްވުން މިއީ ވަރަށްބޮޑު ކަންބޮޑުވުމެއް ކަމަށެވެ. ރައްޔިތުން ހޭލުންތެރި ކުރުމަށް ދިވެހި ފުލުހުންގެ ޚިދުމަތުން ތަފާތު ޕްރޮގްރާމްތައްވެސް ހިންގާ ކަމަށެވެ. އަދި ލައިސަންސް ނުނަގާ ދުއްވާކަން ފާހަގަކުރެވޭއިރު ޤާނޫނުތަކަށް ހުރުމަށްތެރިކޮށް ހިތުމަށް ވަނީ އިލްތިމާސް ކުރައްވާފައެވެ.
