ލައިފްސްޓައިލް އަށް ޚާއްސަކޮށްގެން ސޮނީ ސްޕޯޓްސް އިން އައު ފިހާރައެއް ހުޅުވީ މި އޮގަސްޓް މަހުގެ 25 ވަނަ ދުވަހުގެ ރޭގައެވެ. މަޖީދީމަގުގައި ހުންނަ ގަލޮޅު ލެމިނާ ގައި ހުޅުވި މި ފިހާރަ ވެގެންދާނީ ނައިކީގެ އުފެއްދުންތަކުގެ އެންމެ ބޮޑު ކަލެކްޝަން އެއް ފުރާޅެއްގެ ދަށުން ލިބެން ހުންނަ ފުރަތަމަ ފިހާރައަށެވެ.
ސޮނީ ސްޕޯޓްސްގެ އެސިސްޓަންޓް މާކޮމްސް މެނޭޖަރު މަރްޔަމް އަބްދުﷲ (މަރީ) ވިދާޅުވީ މި ފިހާރަ ހުޅުވުމަށްފަހު ފުރަތަމަ 7 ދުވަހު 30 އިންސައްތައިގެ ޑިސްކައުންޓެއް ނައިކީގެ އުފެއްދުންތަކުން ދިނުމަށް ހަމަޖެހިފައިވާ ކަމަށެވެ.
ފުޓްބޯޅަ ކުޅުންތެރިންނަށް ޚާއްސަ އަދި ދުވުންތެރިންގެ އިތުރުން ތަމްރީނުތަކުގައި ބޭނުންކުރެވޭނެ ނައިކީގެ އުފެއްދުންތައް ލިބެން އެބަހުއްޓެވެ. މީގެތެރޭގައި ޖިމްވެއާ، ޖިމް ޝޫޒް އަދި އެކި ކުޅިވަރުތަކަށް ޚާއްސަ ބާވަތްތައް ހިމެނެއެވެ.
މި ފިހާރަ ހުޅުވައިފައި ހުންނާނީ ހެނދުނު 10 އިން 12 އަށް، މެންދުރުފަހު 2 އިން 6 ޖަހާއިރަށް އަދި ރޭގަނޑު 8 އިން 10 ޖަހަންދެނެވެ.
ނައިކީ ބްރޭންޑަކީ ވަރަށް ގިނަ ބައެއްގެ މެދުގައި މަގުބޫލު އިތުބާރު ލިބިފައިވާ ބްރޭންޑެކެވެ.
