ޔުނިލީވަރ ފުޑް ސޮލިއުޝަންސް އާއި އިންޓަނޭޝަނަލް ފުޑް ސޮލިއުޝަން (އައިއެފްއެސް) ގުޅިގެން ރާއްޖޭގެ ކަލިނަރީ މައިދާނުގައި މަސައްކަތް ކުރާ ޝެފުންނަށް އަމާޒުކޮށްގެން "ޝެފްސް ޓޭބަލް" ގެ ނަމުގައި ވަނީ އިވެންޓެއް ބާއްވާފައެވެ.
ޔުނިލީވަރ ފުޑް ސޮލިއުޝަންސްގެ އަރަބިއާ އެންޑް އިންޑިއަން އޯޝަން އައިލެންޑްސްގެ މާކެޓިން މެނޭޖަރު ހާދިއާ ޝަހުދާދު ވިދާޅުވީ 'ޝެފްސް ޓޭބަލް' އަކީ ރާއްޖޭގައި މަސައްކަތްކުރާ ޝެފުން އެއްބައިވަންތަ ކުރުމަށް އަމާޒުކޮށްގެން ބޭއްވި އިވެންޓެއް ކަމަށެވެ. މިގޮތުން، މި ހަރަކާތުގައި ރާއްޖޭގައި މަސައްކަތްކުރާ ފުންނާބުއުސް ޝެފުން ބައިވެރިވެފައިވާކަމަށް ވަނީ މައުލޫމާތު ލިބިފައެވެ.
" މިއީ ދަތުރުގެ ފެށުން. އަޅުގަނޑުމެންގެ ޑިޖިޓަލް ޕްލެޓްފޯމްތަކުގައި އޮފްލައިން އަދި އޮންލައިންކޮށް އިތުރު އިވެންޓްތަކެއް ބޭއްވޭނެ ކަމަށް އުއްމީދު ކުރަން. ޝެފްސް ޓޭބަލް އަކީ ރާއްޖޭގެ ޝެފް ކޮމިއުނިޓީ އެއްބައިވަންތަ ކުރުމަށް އަޅުގަނޑުމެން ފެށިކަމެއް" ހާދިއާ ވިދާޅުވިއެވެ.
މި ހަރަކާތުގެ އަމާޒަކީ ރާއްޖޭގައި ކުރިއަރަމުން އަންނަ ޝެފުންނަށް އެ ފަރާތްތަކުގެ އިލްމާއި، ލިބިފައިވާ ހުނަރާއި ތަޖުރިބާ ރާއްޖޭގައި މަސައްކަތްކުރާ ހުރިހާ ޝެފުންނަށް ފޯރުކޮށްދެވޭނެ ޕްލެޓްފޯމެއް ގާއިމްކޮށް ކަލިނަރީ މައިދާން އިތުރަށް ފުޅާކުރުމެވެ.
މި އިވެންޓުގައި 2023 ވަނަ އަހަރަށް 'ޝެފްސް ޓޭބަލް'ގެ ކޮމިޓީ މެންބަރުންގެ ގޮތުގައި ކަނޑައަޅާފައިވާ ހަތަރު ޝެފުންނާއެކު ޕެނަލް ޑިސްކަޝަނެއްވެސް ކުރިއަށް ގެންގޮސްފައި ވެއެވެ. މި ޕެނަލް ޑިސްކަޝަންގައި، އެ ފަރާތްތަކަށް މަސައްކަތުގެ މައިދާނުގައި ދިމާވާ ބައެއް ގޮންޖެހުންތަކާއި، މުވައްޒަފުން ތަމްރީނު ކުރުމަށް ބޭނުންކުރާނެ އުކުޅުތަކުގެ އިތުރުން ބަދަލުވަމުން އަންނަ 'ފުޑް ޓްރެންޑް'ތަކާ ގުޅޭގޮތުން މަޝްވަރާ ކޮށްފައިވެއެވެ.
މީގެއިތުރުން، މި އިވެންޓުގައި ޔުނިލީވަރ ފުޑް ސޮލިއުޝަންސް އިން ވަނީ އެކި ޑިޝްތައް ތައްޔާރު ކުރާއިރު ޝެފުން ބޭނުންކުރާ ޓްރެންޑްތަކުގެ މައްޗަށް އަލިއަޅުވާލައި 'ފިއުޗަރ މެނޫސް ޓްރެންޑްސް ރިޕޯޓް 2023' ހުށަހަޅާފައެވެ. މި ރިޕޯޓުގައި އެންމެ ޒަމާނީ ރެސިޕީތަކާއި، އާ އުކުޅުތަކާއި އުފެއްދުންތައް ހިމެނެއެވެ.
މި ޓްރެންޑްތަކުގެ ތެރެއިން މުހިންމު ތިން ޓްރެންޑެއް ކަމަށްވާ ކާބޯތަކެތި އިސްރާފު މަދުކުރުމާއި، ތަފާތު ރަހަތައް އުފެއްދުމާއި، އެތަކެތި އެހެން މީހުންނަށް ހިއްސާ ކުރުމާގުޅޭ ގޮތުން އިވެންޓުގެ ބައިވެރިންނަށް މައުލޫމާތު ދީފައިވާއިރު، ޓްރެންޑްތައް އަމަލީ ގޮތުން ތަޖުރިބާ ކުރުމުގެ ފުރުސަތުވެސް ވަނީ ލިބިފައެވެ.
ޔުނިލީވަރ ފުޑް ސޮލިއުޝަންސް ފޯރ އަރަބިއާ އެންޑް އިންޑިއަން އޯޝަން އައިލެންޑްސް އެގްޒެކެޓިވް ޝެފް ޝެފްޖޯއަން ލިމޮއަންކޯ ޖެންޑްރާނޯ ވަނީ ކުނި އަދި އިސްރާފު މަދުކުރުމުގެ ގޮންޖެހުމާ ބެހޭ ގޮތުން މަޝްވަރާކޮށްފައެވެ. އޭނާ ފާހަގަކުރި ގޮތުގައި އެކަންކަމަށް އިސްކަން ދީގެން މަސައްކަތްކުރާނެ ގޮތްތައް ހޯދުމަށް ޝެފުން ދިރާސާކޮށް، އެމީހުންގެ ޓީމުތަކަށް ތަމްރީން ދިނުން މުހިންމެވެ.
ޔުނިލީވަރ ފުޑް ސޮލިއުޝަންސް އިން "ޝެފްސް ޓޭބަލް" ކޮންމެ އަހަރަކު ވެސް ބޭއްވުމަށް ނިންމާފައިވާއިރު، ކަލިނަރީ އިނޮވޭޝަންގެ ހަރަކާތްތައް ކުރިއަށް ގެންދިއުމާއި، ރާއްޖޭގައި ކަލިނަރީ ވިސްނުމާއި ޓެކްނިކްސް އަދި ޓްރެންޑްތައް ޝެފުންނަށް ފޯރުކޮށްދިނުމަށް އެ ކުންފުނިން ދަނީ މަސައްކަތް ކުރަމުންނެވެ.
ޝެފްސް ޓޭބަލް އިވެންޓް ކުރިއަށް ގެންގޮސްފައި ވަނީ 26 އޮކްޓޯބަރު ވަނަ ދުވަހު ކުރުނބާ މޯލްޑިވްސް ރިސޯޓުގައެވެ.
މައުލޫމާތު: ޔުނިލީވަރ ފުޑް ސޮލިއުޝަންސް
