ބޭރަށްހިންގާ ހޮޑުލެވި އުޅޭއިރު ޑޮކްޓަރަށް ދެއްކުމުގެ އިތުރަށް ހަށިގަނޑަށް ފައިދާހުރި ކާނާ ބޭނުންކުރުން މުހިންމެވެ. މިގޮތުން ތިރީގައި މިވަނީ ބަލިވުމުން ހަށިގަނޑުން ފެން މަދުވެއްޖެ ހާލަތެއްގައި ބޭނުންކުރަން ރަނގަޅު ބާވަތްތަކެވެ.
- ކުރުނބާފެން
- ލުނބޯޖޫސް
މިއީ ވަރަށް ފަސޭހައިން ލިބެންހުންނަ ދެބާވަތެވެ.
ބަނާނާ ސޯޔާ ޝޭކް އަކީ ވެސް ފަސޭހައިން ތައްޔާރުކުރެވިދާނެ ރަނގަޅު ބުއިމެކެވެ.
ބޭނުންވާތަކެތި:
1 ދޮންކެޔޮވައް
150 އެމްއެލް ސޯޔާމިލްކް
ތައްޔާރުކުރާނެ ގޮތް:
ދޮންކެޔޮ ކޮށާފަ އޭގެތެރެއަށް ސޯޔާމިލްކް އެޅުމަށްފަހު މިކްސަރުން ރަނގަޅަށް ހިމުންކޮށްލާށެވެ.
ބަލިވެއުޅޭއިރު ކެއުމުގައި ބޭނުންކުރުން ރަނގަޅީ ފަސޭހައިން ހަޖަމްވާކަހަލަ ލުއި ބާވަތްތަކެވެ. ތިރީގައި މިވަނީ މިގޮތުން ބޭނުންކުރެވިދާނެ ބާވަތްތަކެވެ.
- ޕާން (ވައިޓްބްރެޑް)
- ބަތް (ވައިޓްރައިސް)
- މަޑުކޮށްފަހުރި ކެރެޓް
- ދޮންކެޔޮ
- ޔޯގަޓް
ބޭރަށްހިންގާ ހޮޑުލެވޭނަމަ މޭވާ ޖޫހާއި އާދައިގެ ކިރުގެ ބާވަތްތައް ބޭނުންކުރުން ރަނގަޅެއް ނޫނެވެ. އަދި ތެޔޮހިމެނޭ ބާވަތްތަކުގެ އިތުރުން ކުޅިކޮށް ކެއުން ވެސް ބުއްދިވެރިއެއް ނޫނެވެ. ސަބަބަކީ ގޭހުގެ އުދަގޫ ބޮޑުވެދާނެތީއެވެ. އަދި ކެފެއިން ހިމެނޭ ބާވަތްތައް ވެސް ބޭނުންކުރުން ރަނގަޅެއް ނޫނެވެ.
