ވަރލްޑް ގަވަރމަންޓްސް ސަމިޓް 2024 ގައި ދިވެހިރާއްޖޭގެ ދެމެހެއްޓެނިވި ތަރައްޤީގެ މުހިންމު ތަސައްވުރު ރައީސުލްޖުމްހޫރިއްޔާ ޑޮކްޓަރ މުހައްމަދު މުޢިއްޒު ވަނީ އިޢުލާން ކުރައްވާފައެވެ. މި ތަސައްވުރު އިއުލާން ކުރެއްވީ ދުބާއީގައި ކުރިއަށްދާ ވަރލްޑް ގަވަރމަންޓްސް ސަމިޓް 2024 ގައި ދެއްވި ތަޤުރީރުގައެވެ.
ހިންގުމުގެ ދާއިރާ ހަރުދަނާކޮށް ގުޅިގެން މަސައްކަތް ކުރުމުގައި އެކުވެރި ޢަރަބި އިމާރާތުގެ ސަރުކާރާއި ވެރިން ދައްކަވާ ނަމޫނާ ފާހަގަކުރައްވައި އެކަމަށް ވަނީ ތަޢުރީފު ކުރައްވާފައެވެ. އަދި ވިޒިޓަރ އިކޮނޮމީ ކޮންސެޕްޓްގެ ދަށުން އިޤްތިޞާދީ ދާއިރާއިން ދެމެހެއްޓެނިވި ތަރައްޤީ ހޯއްދަވައިދެއްވުމަށް އެމަނިކުފާނު ގެންގުޅުއްވާ ތަޞައްވުރުގެ މައްޗަށް އަލިއަޅުއްވާލެއްވިއެވެ. އެގޮތުން ފްރީ ޒޯނަކާއެކު ސެންޓްރަލް މެރިޓައިމް ބަނދަރެއް ތަރައްޤީކުރުމާއި، ވެލާނާ އިންޓަރނޭޝަނަލް އެއާޕޯޓު އިތުރަށް ފުޅާކުރުމާއި، ދިވެހިރާއްޖޭގެ އެންމެ އުތުރުގައި ބައިނަލްއަގުވާމީ ޝިޕިންގ ރޫޓެއް ޤާއިމުކޮށް، ކަނޑު ދަތުރުފަތުރާއި ވަސީލަތްތައް ތަރައްޤީކުރުމުގެ މަޝްރޫއުތައް ހިންގުމަށް ނިންމަވާފައިވާކަމަށް ވިދާޅުވިއެވެ.
ދިވެހިރާއްޖޭގައި އުފެއްދުންތެރިކަމާއި ވިޔަފާރީގެ ދާއިރާ އިތުރަށް ފުޅާ ކުރުމުގެ ގޮތުން ޓެކްނޮލޮޖީ އާއި އާޓިފިޝަލް އިންޓެލިޖެންސްގެ ވަސީލަތްތައް ބޭނުންކުރުމަށް މި ސަރުކާރުން ދޭ އަހަންމިއްޔަތު ފާހަގަ ކުރެއްވިއެވެ. އަދި ސަރުކާރު ހިންގުމާއި އާންމު ޚިދުމަތްތައް ދިނުމުގައި ކަރުދާސް ބޭނުންކުރުން ހުއްޓާލައި، އާޓިފިޝަލް އިންޓެލިޖެންސްގެ ބޭނުންކުރުމަށް ސަރުކާރުން އިސްކަންދޭކަމުގައި ވިދާޅުވިއެވެ.
އިޤްތިޞާދީ ތަރައްޤީގެ އިތުރުން ދެމެހެއްޓެނިވި ގޮތެއްގައި ތިމާވެށި ރައްކާތެރިކުރުމުގައި ދިވެހިރާއްޖެއިން އަބަދުވެސް ދެމިތިބޭނެކަމުގެ ޔަޤީންކަން ދެއްވިއެވެ. އަދި އެ މަސައްކަތުގެ ފެށުމެއްގެ ގޮތުގައި ރަސް-މާލެ އިކޯ-ސިޓީ މަޝްރޫޢު ފަށާފައިވާކަމުގައި އެމަނިކުފާނު ފާހަގަކުރެއްވިއެވެ. މި މަޝްރޫޢު ފެށުމުގެ އަމާޒަކީ ދިވެހިންގެ ދިރިއުޅުމުގެ ފެންވަރު ރަނގަޅުކޮށް 65،000 ހައުސިންގ ޔުނިޓް ފޯރުކޮށްދީ، ދިރިއުޅުމުގެ ހާލަތު ރަނގަޅު ކުރުމަށް އާ ދެމެހެއްޓެނިވި ސިޔާސަތުތަކެއް ކަނޑައަޅައި ކުރިއެރުވުން ކަމުގައިވެސް އެމަނިކުފާނު ވިދާޅުވިއެވެ. އަދި މިގޮތަށް ރާއްޖޭގެ އެކި ސަރަހައްދުތަކުގައި އަރބަން ސެންޓަރުތައް ތަރައްޤީ ކުރާނެ ކަމުގައިވެސް ވިދާޅުވިއެވެ.
މީގެ އިތުރުންވެސް ދިވެހިރާއްޖޭގެ ނާޒުކު ތިމާވެށީގެ މާހައުލާއި، މޫސުމަށް ކުރިމަތިވެފައިވާ ހީނަރުކަމުން އަރައިގަތުމަށް އަވަސް ފިޔަވަޅުތަކެއް އެޅުމުގެ މުހިންމުކަމުގެ މައްޗަށްވެސް ރައީސުލްޖުމްހޫރިއްޔާ ވާހަކަފުޅު ދެއްކެވިއެވެ. އެގޮތުން އެމަނިކުފާނުގެ ވާހަކަފުޅުގައި އިޢާދަކުރަނިވި ހަކަތަ 33 އިންސައްތައަށް އިތުރުކުރުމާއި، ދިވެހިރާއްޖޭގައި ބަޔޮސްފިއަރ ރިޒަރވްތަކާއި ނޭޗަރ ޕާކްތައް އިތުރުކުރުމާއި، ރާއްޖޭގެ އެކި ކަންކޮޅުތަކުގައި ފަސް މިލިއަން ގަސް އިންދުމާއި، ކާބޯތަކެތި ދަތިނުވެ ލިބޭނެކަން ކަށަވަރު ކުރުމުގެ ގޮތުން ފުޑް ސެކިއުރިޓީ ޤާއިމްކުރުމަށްޓަކައި ވަރޓިކަލް ދަނޑުވެރިކަން ކުރެވޭނެ ގޮތްތައް ހޯދުމާއި، މޫސުމަށް އަންނަ ބަދަލުތަކަށް ވިސްނުންތެރި ފިޔަވަޅު އެޅުމަށް އިސްކަންދީ، 20 އަހަރަށް އެކުލަވާލާ ތަރައްޤީގެ ޕްލޭނެއް ތަންފީޒުކުރުން ހިމެނޭކަން ފާހަގަކުރެއްވިއެވެ.
ރައީސުލްޖުމްހޫރިއްޔާގެ ވާހަކަފުޅު ނިންމަވާލައްވަމުން، ދެމެހެއްޓެނިވި ތަރައްޤީއަށްޓަކައި، އެކި ޤައުމުތަކާއެކު ޢިލްމު ހިއްސާ ކުރުމާއި، ބައިނަލްއަޤްވާމީ ފަރާތްތަކުގެ އެއްބާރުލުމާއެކު ގުޅިގެން މަސައްކަތްކުރުމުގެ މުހިންމުކަމުގެ މައްޗަށް އަލިއަޅުވާލެއްވިއެވެ.
