ބޭނުންވާ ތަކެތި:
2 ޖޯޑް ކަނަމަދު
1 ޖޯޑް ހަކުރު
1 ސައި ސަމުސާ އެސެންސް
ތައްޔާރުކުރާނެގޮތް:
ކަނަމަދު ހިމުން ކޮށްލާށެވެ. މާ ބޮޑަށް ހިމުންވީމަ މީރެއް ނުވާނެއެވެ. ކޮންމެވެސް ވަރަކަށް ކަނަމަދު އަނގައިގަ ޖެހޭ ވަރަށް ހުރުމުން ރަނގަޅުވާނެ އެވެ. ނުވަތަ ތައްޔާރުކުރައްވާ ފަރާތަކަށް ކަމުދާވަރަކަށް ބެހެއްޓިދާނެއެވެ. އުނދުން މައްޗަށް ތަވާ އުދުމަށްފަހު ކުޑަކޮށް ހޫނުވަންދެން މަޑުކޮށްލާށެވެ. ތަވާ ހޫނުވުމުން ހަކުރު ކޮޅު ތަވައަށް އަޅާލާށެވެ. މަޑުގިނީގައި 3 މިނިޓެއްހާއިރު ބެހެއްޓުމުން ހަކުރުތައް ވިރެން ފަށާނެއެވެ. ހަކުރު ވިރުމުން އޭގެ ތެރެއަށް ހިމުންކުރި ކަނަމަދު އަޅާ ރަނގަޅަށް އެއްކޮށްލާށެވެ. ދެން އެސެންސް ކޮޅު އަޅާލުމަށްފަހު މަޑުމަޑުން އެއްކުރަމުން ގެންދާށެވެ. އުނދުނުގެ ހުޅުކޮޅު މަޑުގިނީގައި ބަހައްޓަން ހަނދާން ކުރަންވާނެއެވެ. ރަނގަޅަށް ކަނަމަދު އަދި ހަކުރު އެއްވުމުން އުނދުން ނިވާލާށެވެ. އެކީގަ ހިހޫ ނުވަނީސް ގުޅަ ވަށަންވާނެއެވެ.
ނޯޓް: ކަނަމަދު ގުޅައަކީ ތައްޔާރު ކުރުމަށްފަހު އައިސްއަލަމާރީގައި ގިނަ ދުވަސްތަކެއް ވަންދެން ބަހައްޓައިގެން ކާލެވޭނެ ވަރަށް މީރު އެއްޗެކެވެ.
