ކޮންމެ އަހަރެއްގައިވެސް ސުކޫލު ކުދިންނާއި ބެލެނިވެރިންނަށް އަންނަ އެންމެ އުފާވެރި އެއް ޗުއްޓީއަކީ ސުކޫލު ބޮޑު ޗުއްޓީއެވެ. އެއްގުރޭޑުން އަނެއް ގްރޭޑަށް ދަރިން ބަދަލުވާއިރު ކުރަން ހުންނަ ކަންކަން ފަސް ކޮށްލުމަށްފަހު ގިނަ ފަހަރަށް ރާވާލެވެނީ ޗުއްޓީ ދަތުރެކެވެ. ރާއްޖެ އާއި ރާއްޖެއިން ބޭރަށެވެ. އެމީހެއްގެ ތަނަވަސްކަން ހުރި މިންވަރަކުން ދަރިންނަށް އުފާވެރިކަން ހޯދައިދިނުމަށް ކޮންމެވެސް އެހެން މަންޒިލަކަށް ދަރިންނާއިއެކު ދަނީއެވެ.
ޗުއްޓީ ނިންމާލުމަށްފަހު ކުދިން ސުކޫލް ދުވަސްވަރުގެ ޝެޑިއުލަށް އަނބުރާ ގެންނަންވީ ވަގުތު މިއޮތީ ޖެހިފައެވެ. އެންމެފަހު ރެއާ ހަމައަށް ކަންކަން ނުބަހައްޓާ އަވަހަށް ސުކޫލު ކަންކަން ނިންމާލެވޭތޯ ބަލާށެވެ. މާލޭގެ ހަލަބޮލި ކާރޫ ބާރޫ ބޮޑު މަގުތަކަށް ނިކުމެ ބަލާލުމުން މެންދުރުން ފެށިގެން ރޭގަނޑު 11 ޖެހުމާއި ހަމައަށްވެސް ފެންނަނީ ހަލަބޮލިކަމެވެ. މަޖީދީ މަގުގައި ހުރި ފިހާރަތަކަށް ވަދެ މީހުން އުޅޭނޫޅޭ ގޮތް ބަލާލީމެވެ.
ބޫޓު ގަންނަ މީހުންނާއި ދަބަސް ގަންނަ މީހުންނާއި އިންޓަވަލް ތަށި އާއި ފެންބޯ ފުޅި އަދި ޔުނިފޯމް ގަންނަ މީހުން ތޮއްޖެހިފައެވެ. ރަށްރަށުން ޗުއްޓީއަށް އައިސް ތިބި މީހުންނާއި ބޭސްފަރުވާއަށް އައިސް ތިބި މީހުންނާވެސް ދިމާވިއެވެ. ކޮންމެއަކަސް ދިވެހިންގެ އާދަކާދައިގެ މަތިން އެންމެ ފަހު ވަގުތަށް ކަންކަން ބެހެއްޓޭ މީހުން ގިނަކަން ފާހަގަ ކުރެވުނެވެ. ބައެއް މީހުން ބުނީ ސުކޫލު ޗުއްޓީގައި އެއްކޮށް އުޅުނީ ރަށުން ބޭރުގައި ކަމަށެވެ. ނަމަވެސް ޔުނިފޯމް ފަހަން ދީފައި ސުކޫލު ފޮތް ލިސްޓު ވައުޗަރަށް ނަގާފައި ޗުއްޓީއަށް ދިޔަ މީހުންނާއިވެސް ދިމާވިއެވެ.
މަގުތަކުގައި ގުޑާނުލެވޭ ވަރަށް ތޮއްޖެހުން ބޮޑުވެފައިވާއިރު ދިވެހިން ވިސްނަންވީ އެއް ކަމަކީ ކޮންމެ އަހަރެއްގައިވެސް ޗުއްޓީއަށް ދިއުމުގެ ކުރިން ކުރެވެން ހުރި ކަމެއް ދުރާލާ ނިންމާލާފައި ދިއުމަށެވެ. މީހުން ގިނަވެގެން، ބައެއް ތަކެތި ނުލިބިގެން، ނުވަތަ ފިހާރަތަކާއި މަގުތަކުގައި ކިއު ބޮޑުވެގެން ޝަކުވާ ކުރާކަށް އޭރަކުން ނުޖެހޭނެއެވެ.
މަޖީދީ މަގު އެކަންޏެއް ނޫނެވެ. ވަރަކަށް ޕްރިންޓް ކުރާ 4 ވަރަކަށް ފިހާރަވެސް ބަލާލީމެވެ. ހަމަ ކިއުތަކުން ފުރިފައެވެ. ނަން ކާޑު ހައްދާ މީހުންނާއި އަމިއްލައަށް ނަން ކާޑު ހަދައިގެން އައިސް ޕްރިންޓް ކުރުވާ މީހުންނެވެ. ދަރިންގެ ސުކޫލު މާލެއަށް ބަދަލު ކުރަން ނުވަތަ ގްރޭޑަށް ލާން ނުވަތަ އެހެން ސުކޫލަކަށް ބަދަލުކުރަން ބޭނުންވާ ލިޔެކިއުންތައް ސްކޭންކޮށް ކޮޕީ ހައްދަން އައިސް ތިބި މީހުންނާއިވެސް ދިމާވިއެވެ. މިހާ ލަސްކޮށްފައި އެކަންކަން ކުރަން އުޅެނީ ކީއްވެތޯ ބަލާލީމެވެ. ބައެއް ކުދިންގެ ބެލެނިވެރިން ޗުއްޓީއަށް ރަށުން ބޭރަށް ދިއުމުންނެވެ. އަދި ބައެއް ކުދިންވެސް ބެލެނިވެރިންނަށް ވަގުތު ނުވެގެންނެވެ. އަދި އެންމެ ފަހު ވަގުތު މާލެއަށް ބަދަލުވުމުގެ ހިޔާލު އައުމާއި، ތަނެއް ކުއްޔަށް ނުލިބި ލަސްވުމުގެ ސަބަބުންނެވެ. މިކަހަލަ އެތައް ސަބަބެއް މިވެރިން ދައްކައިފިއެވެ.
ހަނދާނުގައި ބަހައްޓަންވީ ކަމަކީ އަޅުގަނޑުމެން ބެލެނިވެރިން ދަރިވަރުންނަށް ނަމޫނާ ދެއްކުމެވެ. ތެޅި ފޮޅިގަނެގެން ކަންކަން ކުރުމުގެ ބަދަލުގައި ދުރާލާ ކަންކަން ކުރުމުގެ ރީތި އާދަ ހަރުލައްވާ އެ ކުދިންނަށް އެ ނަމޫނާވެސް ދައްކާށެވެ. އޭރުން މިހާރަށްވުރެ މަގުތަކުގެ ތޮއްޖެހުން ކުޑަވެފައި ފިހާރަތަކާއި ސުކޫލުތަކުން ފޮތްބައި ނަގާ ކިއުތަކާއި ބުކްޝޮޕްތަކާއި ޕްރިންޓް ކުރާ ފިހާރަތަކުގެ ކިއުތައްވެސް މަދުވާނެއެވެ.
ހާއްސަ ހާލަތެއް މެދުވެރިވެގެން ކަމެއް ލަސްވެދާނެ އެވެ. ނަމަވެސް ގަސްތުގައި ފަހަށް ކަންކަން ބެހެއްޓުމުގެ އާދަ ދޫކޮށްލަމާތޯއެވެ. އަންނަން އޮތް ޖީލުތަކަށް ރިވެތި ނަމޫނާ ދައްކަމާ ހިނގާށެވެ. ދުރާލާ ކަންކަން ކުރުމުގެ ރީތި އާދަ ކުދިންގެ ހަރުލެއްވުމަށް މިއީ ރަނގަޅު ނަމޫނާއަކަށް ވާނެއެވެ.
ކުރިޔަށް އޮތް ދިރާސީ އަހަރަށް ހުރިހާ ކުދިންވެސް އަވަހަށް ތައްޔާރުވެލާށެވެ. ބެލެނިވެރިން ހޯދައިދޭން ޖެހޭ ސާމާނު ހޯދައިދިން ނަމަވެސް ކުދިންގެ ނިދި ހަމައަކަށް އެޅުވުމާއި، ކޮންމެވެސް ވަގުތެއް ކިޔެވުމަށް، މުތޯލިއާ ކުރުމަށް ހޭދަކޮށްލަން އާދަ ކުރާށެވެ. އަލުން ސުކޫލު ދުވަސްވަރުގެ ޝެޑިއުލާއި އެއްގޮތަށް ދުވަހުގެ ތާވަލު ރާވާލާ ސުކޫލު ފެށެންވާއިރަށް ސިނކުޑިތައް އެގޮތަށް ހާނާލާށެވެ. ހުރިހާ ދަރިވަރުންނާއި ބެލެނިވެރިންނަށްވެސް ކާމިޔާބު އައު އަހަރަކަށް އެދެމެވެ.
ކިޔުންތެރިންގެ ހިޔާލު
ގަދަވެގެން ގިނަމީހުން ރަށަށް ނުދެވިފަ، ރަށަށް ދިޔަ މީހުންނަށް މާލެ ނުދެވިފަ. ސްކޫލް ތަކުގެ ކިޔެވުން ލަސްކޮށްލަ ދެއްވާނެ ނަމަ😔
ކޮމެންޓްސް ބަންދުކުރެވިފައި