އދ.ގެ އާންމު މަޖިލީހުގެ 79 ވަނަ ބައްދަލުވުމަށް އެމެރިކާއަށް ކުރައްވާ ދަތުރުފުޅުގެ ތެރެއިން ނަންގަވާފައިވާ ފޮޓޯތަކުގެ ތެރެއިން އެންމެ އަޅައިގަތް އެއް ފޮޓޯއަކީ "ހޭންޑް އިން ހޭންޑް" ނުވަތަ އަތާއި އަތް ގުޅުވާލައިގެން ތިއްބެވި ދެ ރައީސުންގެ މި ފޮޓޯގަނޑެވެ. މިފޮޓޯއިން ވަރަށް ގިނަ ކަންކަން ބުނެދެއެވެ. ރާއްޖެ އާއި މެދު ފަލަސްތީނު ރައްޔިތުންގެ ހިތުގައި އޮތް ގަދަރާއި އިހުތިރާމް އަދި ލޯބި ހާމަވެގެންދެއެވެ.
އދ.ގެ އާންމު މަޖިލީހުގެ 79 ވަނަ ސެޝަންގެ ހަވާސާގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ފަލަސްޠީނުގެ ރައީސް، ޑޮކްޓަރ މަޙްމޫދު ޢައްބާޞްއާ ބައްދަލުކުރައްވާ ރައީސުލްޖުމްހޫރިއްޔާ ވަނީ ހަނގުރާމަ ހުއްޓާލުމަށް ގޮވާލަނީ އަޅުގަނޑުމެންނަކީ ވެސް އިންސާނުންނަށް ވީތީކަމަށް ވިދާޅުވެ، ބައިނަލްއަޤްވާމީ މުޖުތަމަޢަށް ވަރުގަދަ މެސެޖެއް ދެއްވާފައެވެ.
ފަލަސްޠީނުގެ ރައްޔިތުންނަށް ކުރިމަތިލާންޖެހިފައިވާ ނުރައްކާތެރި ޙާލަތު ބަދަލުކުރުމަށް ބައިނަލްއަޤްވާމީ މުޖުތަމަޢުން ގުޅިގެން މަސައްކަތްކުރުމަށާއި އެފަރާތްތަކުން އެއްބާރުލުން ދެއްވުމަށް ރައީސް ވަނީ ގޮވާލައްވާފައެވެ.
ފަލަސްޠީނުގެ ރައީސް، މަޙްމޫދު ޢައްބާޞް ދެއްކެވި ވާހަކަފުޅުގައި އެމަނިކުފާނު ވަނީ ފަލަސްޠީނުގެ ރައްޔިތުންނަށް ރާއްޖެއިން އަބަދުވެސް އެއްބާރުލުންދީ ކުރައްވާ ތާއީދު ދެނެވަޑައިގަންނަވާކަމުގައި ވިދާޅުވެ އެކަމަށްޓަކައި ޝުކުރު އަދާކުރައްވާފައެވެ.
ރާއްޖެއަކީ ފަލަސްޠީނުގެ ދިފާއުގައި އަބަދުވެސް ދެމި އޮންނަ، އަދި ފަލަސްޠީނުގެ ރައްޔިތުންނަށް އެކި ގޮތްގޮތުން އެހީތެރިކަން ފޯރުކޮށްދޭ ގައުމެކެވެ.
ފަލަސްތީނާއި ދެކޮޅަށް އިސްރާއީލުން ފަށާފައިވާ ހަނގުރާމައިގައި އެތައް މިލިއަން ޕަލަސްޠީނުގެ ރައްޔިތުންގެ އަމިއްލަ ގެދޮރުން ގަދަކަމުން ބޭރުކޮށް ރެފިއުޖީންނަށް ހަދާފައިވެއެވެ. އަދި އަންނަ އޮކްޓޫބަރަށް ޣައްޒާ އާއި ހަމާސް އާއި ދެމެދު ކުރިޔަށްދާ ހަނގުރާމައަށް އަހަރެއް ފުރިގެންދާއިރު އިސްރާއީލުން ހިންގާ ގަތުލު އާންމުގައި 40,005 އަށް ވުރެ ގިނަ މީހުން ވަނީ ޝަހީދުކޮށްލާފައެވެ. އަދި ޣައްޒާ އެއްކޮށް ސުންނާފަތި ކޮށްފައިވާއިރު ވެއްޓިފައިވާ އިމާރާތްތަކުގެ ދަށުގައި ތާށިވެފައިވާ އެތައް ހަށިތަކެއްވެސް ހުންނާނެ ކަމަށް ލަފާ ކުރެވެއެވެ.
