ށ.މާއުނގޫދޫ އަށް އުފަން އުމުރުން 53އަހަރުގެ ހުސައިން މޫސާއަށް މިއަދު ކާއެތިކޮޅެއް ދިރުވާލަންވެސް އުދަގުލެވެ. އަނގައިގެ ކެންސަރަށް ފަރުވާ ހޯދަމުންދާ ހުސައިންއަށް ދިވެހިރާއްޖެއިން ދެވޭނެ އިތުރު ފަރުވާއެއް ނެތެވެ. ވީހާވެސް އަވަހަކަށް އެހެން ޤައުމަކަށް ގޮސްގެން ފަރުވާހޯދުމަށް ޑޮކްޓަރު ލަފާދެއްވާފަވާއިރު ބޭސްފަރުވާއަށް ހިނގާ ޚަރަދު އާސަންދައިންވަނީ ހަމަޖެހިފައެވެ. އެހެންނަމަވެސް އިތުރަށް ހިގާނެ ޚަރަދުތައް ހަމަޖައްސާނެ މާލީ ތަނަވަސްކަމެއް އާއިލާއަކު ނެތެވެ.
ޒީޓައިމްސް އާއި، ވާހަކަދައްކަމުން އަސަރާއިއެކު ހުސައިން ބުނީ "އަޅުގަނޑަކަށް ނުވެސްކެވޭ. ހަމައެކަނި ދިޔާއެއްޗެހި ބޭނުންކުރަނީ" މިގޮތަށެވެ. މާލޭގައި ކުއްޔަށް އުޅެމުންދާ އެއާއިލާގެ 5 ކުދިންގެތެރެއިން 3 ކުދިން ކުރިން ވަޒީފާ އަދާކުރިކަމުގައިވިއަސް ކޮވިޑްގެ ހާލަތާއިގުޅިގެން ވަޒީފާގެއްލި އާމްދަނީ ލިބޭނެގޮތެއް ނެތްކަމަށް ހުސައިން ވަނީ ބުނެފައެވެ. އެދެނީ ވީހާވެސް އަވަހަކަށް ބޭސްފަރުވާއަށް އިންޑިއާއަށް ދިއުމަށް ދީލަތި އެހީއަކަށެވެ.
އާއިލާގެ ފަރާތުން ވާހަކަދައްކަމުން ހުސައިންގެ ދަރިފުޅު އަހުމަދު ނަޖީބު ބުނީ އެންމެފުރަތަމަ ހުސައިންއަށް އަނގައިގެ ކެންސަރު ޖެހިފައިވާކަން އެނގުނީ 2019ވަނަ އަހަރުގަ ކަމަށެވެ. " 2015ވަނަ އަހަރުން ފެށިގެން ބައްޕަ ބަލިވާންފެށީ. އެއިރު އިންޑިއާއަށް ގޮއްސަ ޓެސްޓްތައްވެސް ހެދި. 2019ވަނަ އަހަރު ފުރަތަމަ ކެންސަރުކަން ޔަގީންވެގެން އޮޕަރޭޝަންކުރީ. އޮޕަރޭޝަނަށްފަހު 3 މަސްފަހުން 2020ވަނަ އަހަރު ކުރީކޮޅު އިންޑިއާއަށް ގޮއްސަ ބައްޕަ ޑޮކްޓަރަށް ދެއްކި. 3 މަސްދުވަސް ފަހުން އަނެއްކާ އިންޑިއާއަށް ދާން ބުންޏަސް ކޮވިޑްގެ ހާލަތާއި ގުޅިގެން ދެވޭގޮތެއްނުވި" އަހުމަދު ނަޖީބު ބުންޏެވެ.
އަހުމަދު ނަޖީބު އިތުރަށްބުނީ ހުސައިންގެ ޙާލު ދެރަވުމާއިގުޅިގެން 2020ވަނަ އަހަރު ޖުލައިމަހު މާލެއިން އިތުރު އޮޕަރޭޝަނެއް ކޮށްފައިވާކަމަށެވެ. އެހެންނަމަވެސް ޙާލުއިތުރަށް ގޯސްވަމުންދާތީ ވީހާވެސް އަވަހަކަށް ރާއްޖެއިން ބޭރަށް އިތުރުފަރުވާއަށް ދިއުމަށް އައިޖީއެމްއެޗްއިން ލަފާދިނީކަމަށެވެ.
ނޯޓް: މި ޢާއިލާ އަށް އެހީ ލިބިފައިވާތީ، މިރިޕޯޓުގައި ކުރިން ހިމަނަައިފައިވާ ފޯން ނަންބަރާއި އެކައުންޓް ނަންބަރު ވާނީ އުނިކޮށްފައެވެ.
