އިންޑިއާގެ ހޮސްޕިޓަލެއްގައި ރޯވެ ތުއްތު 10 ކުދިން މަރުވެ 16 ކުދިންގެ ހާލު ވަނީ ސީރިއަސްވެފައެވެ. ހިތާމަވެރި މިހާދިސާ ހިގީ އުއްތަރު ޕްރަޑޭޝްގައި ހުންނަ މާހާރާނީ ލަކްޝްމީބާއީ މެޑިކަލް ކޮލެޖުގެ އެންއައިސީޔޫގައި ރޭގެ 10:45 ހާއިރުގައެވެ.
ޑެޕިއުޓީ ޗީފް މިނިސްޓަރ ބްރަޖެޝް ޕަތަކް ނޫސްތަކަށް މައުލޫމާތު ދީފައިވާ ގޮތުގައި އަލިފާން ރޯވިކަމަށް ބެލެވެނީ އޮކްސިޖަން މެޝިނެއްގައެވެ. މިހާދިސާ ހިގިއިރު އުފަންވިތާ މާގިނަ ދުވަސްނުވާ 54 ކުދިން އެންއައިސީޔޫގައި އެޑްމިޓްކޮށްފައި ތިބިއިރު ސަލާމަތް ކުރެވުނީ 44 ކުދިންނެވެ. މަރުވި 10 ކުދިންގެ ތެރެއިން 7 ކުއްޖެއްގެ ހަށިގަނޑު ވަނީ ދެނެގަނެވިފައެވެ. ބާކީތިބި 3 ކުދިންގެ ހަށިގަނޑު ކަށަވަރު ކުރުމަށް ޑީއެންއޭ ހަދަން ޖެހިއްޖެނަމަ އެކަން ކުރާނެ ކަމަށް ވަނީ ބުނެފައެވެ. ހާލު ސީރިއަސްވި 16 ކުދިންނަށް ދަނީ އެހެން ހޮސްޕިޓަލެއްގައި ފަރުވާ ދެމުންނެވެ.
މަރުވި ކުއްޖެއްގެ މަންމަ ބުނެފައިވަނީ ހޯދާހޯދާ ދަރިފުޅު ނުފެނުނު ކަމަށެވެ. އަދި ފަހުން އޭނާގެ ދަރިފުޅު މަރުވެފައިވާކަން ހިއްސާކޮށްފައިވާކަމަށް ވަނީ ބުނެފައެވެ.
އަލިފާނުގެ ހާދިސާ ހިގި މެޑިކަލް ކޮލެޖުގެ ފަޔަރ ސޭފްޓީ އޮޑިޓެއް މިދިޔަ ފެބުރުއަރީމަހު ހަދާފައިވެއެވެ. އަދި އަދި ޖޫންމަހު ފަޔަރ ޑްރިލްއެއްވެސް ބާއްވާފައިވެއެވެ.
މިހާދިސާ ހިނގަން މެދުވެރިވި ސަބަބު ތަހުގީގުކޮށް 12 ގަޑިއިރުތެރޭގައި ރިޕޯޓް ހިއްސާކުރުމަށް ވަނީ އަންގާފައެވެ. އަދި އިހުމާލުވެފައިވާނަމަ ފިޔަވަޅު އަޅާނެކަމަށް ވަނީ ބުނެފައެވެ.
ޗިފް މިނިސްޓަރ ޔޯގީ އަދިތްޔަނަތު ވަނީ މަރުވި ކުދިންގެ އާއިލާތަކަށް 5 ލައްކަ ރުޕީސްގެ ބަދަލެއް އަދި ބޮޑަށް ޒަޚަމްވި ކުދިންގެ އާއިލާތަކަށް ބައިލައްކަ ރުޕީސްގެ ބަދަލެއް ދިނުމަށް ނިންމާފައެވެ.
