ބޭރުފައިސާގެ ޤަވާއިދަށް ގެނައި ބައެއް ބަދަލުތަކަށް ބައެއް ރިސޯޓުތަކުން އަމަލު ނުކުރާނެކަމަށް ފާޅުގައި ބުނެފައިވާއިރު، ސަރުކާރަށް 1 އަހަރު ފުރުން ފާހަގަކުރުމަށް ބޭއްވި ޚާއްސަ ޖަލްސާގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވީ ޤަވާއިދުގައިވާ ގޮތަށް 500 ޑޮލަރު މާރުކުރައްވަން ޖެހިވަޑައިގަންނަވާނެ ކަމަށެވެ.
" އަޅުގަނޑުމެން ތިބޭނީ ރައްޔިތުންގެ ފަޅީގައި. މިކަމުގައި އަޅުގަނޑުމެން ނެތިން މި ޤަވާއިދު ބަދަލުކުރާކަށް. ނުކުރާނަން ބަދަލެއް. ވަރަށް ސާފުކޮށް މިދެންނެވީ ޤަވާއިދެއް ބަދަލެއް ނުކުރާނަމޭ. 500 ޑޮލަރު މާރުކުރައްވަން ޖެހިވަޑައިގަންނަވާނޭ. ޤަވާއިދަށް ތަބާވުމަކީ އެންމެންގެ މައްޗަށް ލާޒިމުކަމެއް. މިކަން ކުރައްވަން ޖެހިވަޑައިގަންނަވާނޭ. މިއީ ޤާނޫނުއަސާސީއާއި އެއްގޮތަށް ކުރާކަމެއް. އަދި މިކަން އިތުރަށް ތަންފީޒުކުރުމަށް އެހީތެރިކަން ދިނުމަށް އެކަމަށް ޚާއްސަ ޤާނޫނެއްވެސް ފާސްކުރާނަން". ރައީސް ވިދާޅުވިއެވެ.
ބޭރުފައިސާގެ ޤަވާއިދަށް ބަދަލު ގެނައުމަށް ސަރުކާރުން ނިންމީ ދައުލަތަށް ލިބޭ އާމްދަނީއިން ދެކޮޅުނުޖެއްސޭތީ ކަމަށެވެ. މިގޮތުން ތެލަށް ކުރާ ޚަރަދާއި ކާބޯތަކެއްޗަށް ކުރާ ޚަރަދު ބޮޑުކަން ފާހަގަކުރައްވާ ވިދާޅުވީ މިދިޔަ އަހަރު އާމްދަނީގެ ގޮތުގައި 950 މިލިއަން ޑޮލަރު ލިބިފައިވާކަމަށެވެ.
" ތެޔޮގަތުމަށް އެކަނި ބޭނުންވޭ 753 މިލިއަން ޑޮލަރު. ކާބޯތަކެތި އެތެރެކުރުމަށް ބޭނުންވޭ 675 މިލިއަން ޑޮލަރު. ބޭރަށް ފޮނުވާފަތިބި ކިޔަވާ ކުދިންނަށް އެބަބޭނުންވޭ 37 މިލިއަން ޑޮލަރު. އާންމުން ބޭނުންކުރާ ބޭންކު ކާޑުތަކަށް 200 މިލިއަން ޑޮލަރު. ސަރުކާރުން ދަރަނި ދެއްކުމަށް 507 މިލިއަން ޑޮލަރު". ރައީސް ފާހަގަކުރެއްވިއެވެ.
ބޭރުފައިސާގެ ޤަވާއިދަށް އަމަލުކުރަން ފެށުމުން ބަދަލުވާނެ ކަންތައްތައްވެސް ރައީސް ވަނީ ވިދާޅުވެފައެވެ. 2026 ގެ ފުރަތަމަ ކުއާޓަރުގެ ތެރޭގައި ރާއްޖެއިން ފުރާ ކޮންމެ ދިވެއްސަކަށް ބޭންކުން މާރުކޮށްދޭ 500 ޑޮލަރު 1000 ޑޮލަރަށް ބަދަލު ކުރުމާއި ކްރެޑިޓް ކާޑު ލިމިޓް 1400 ޑޮލަރާއި ހަމައަށް އިތުރުކުރުމުގެ އިތުރަށް ވިޔަފާރިވެރިންނަށް ޓީޓީ ކުރަން ޑޮލަރު ލިބޭ ނިސްބަތް އިތުރުކުރުން ހިމެނެއެވެ.
ބައެއް ރިސޯޓުތަކުން ދެކޮޅު ހެދިއަސް އައު ޤަވާއިދުގެ ދަށުން އޭ ކެޓަގަރީގެ ތެރޭގައި ހިމެނޭ ރިސޯޓުތަކާއި ބޮޑެތި ހޮޓާތަކާއި ޓުއަރިސްޓް އުޅަނދުތަކަށް އަންނަ ކޮންމެ ފަތުރުވެރިޔަކަށް 500 ޑޮލަރުގެ ރޭޓުން ބޭންކަށް ޑޮލަރު މާރުކުރަން ލާޒިމް ވަނީ ކޮށްފައެވެ.
