2025 ވަނަ އަހަރާއި 2026 ވަނަ އަހަރު ވެގެންދާނީ، ރިޔާސީ އިންތިޚާބުގައި ރަށްރަށަށް ވަޑައިގެން ވެވަޑައިގެންފައިވާ ވަޢުދުތައް ފުއްދެވުމުގެ ޢަމަލީ މަސައްކަތް ހިނގާނޭ ދެ އަހަރަށް ކަމަށް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ ވިދާޅުވެފައެވެ. ރައީސް މިހެން ވިދާޅުވީ، އަރިއަތޮޅު އުތުރުބުރިއާ މާލެ އަތޮޅުގެ ބައެއް ރަށްތަކަށް ކުރައްވަމުންގެންދަވާ ދަތުރުފުޅުގައި، އއ ތޮއްޑޫގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
" 2025 އަދި 2026 ވެގެންދާނީ އަޅުގަނޑު ރަށްރަށަށް ގޮސް ރިޔާސީ އިންތިޚާބުގައި ވެފަހުރި ވައުދުތައް ފުއްދުމަށްޓަކައި އަމަލީ ގޮތުން އެމަސައްކަތްތައް ހިނގާ 2 އަހަރަށް. މި 24 މަސްދުވަސްތެރޭގައި މުޅި ރާއްޖޭގެ ހުރިހާ ކަންކޮޅެއްގައި ބަހާލެވިގެން ތަރުތީބެއްގެތެރެއިން އަޅުގަނޑުވެފަހުރި ހުރިހާ ވައުދެއް އެއީ، ބަނދަރު މަގު، ބިންހިއްކުން ސްކޫލު ހޮސްޕިޓަލު ފަދަ ކަންތައްތައް ތަރުތީބެއްގެތެރެއިން އިރާދަކުރެއްވިޔާ އަމަލީ ގޮތުން މަސައްކަތްފަށާ އަދި އެކި މަޝްރޫޢުތައް ނިމެމުންވެސް ދާނެ" ރައީސް ވިދާޅުވިއެވެ.
2024 ވަނަ އަހަރު ރައްޔިތުން އުންމީދުކުރި މިންވަރަށް މަސައްކަތްތައް ކުރިއަށް ނުދިޔަ ސަބަބުތަކަކީ ފޮރުވިފައިވާ ކަމެއް ނޫންކަން ފާހަގަކުރެއްވިއެވެ. މިގޮތުން 2024 ވަނަ އަހަރު ސަރުކާރުން ތަންފީޒުކުރަން ޖެހިވަޑައިގަތީ، މިދިޔަ ސަރުކާރުގެ ފިނޭންސް މިނިސްޓަރު، މި ދިޔަ ސަރުކާރުގެ އަޣުލަބިއްޔަތު އޮތް މަޖިލީހަކަށް ހުށަހަޅުއްވައިގެން، އިންތިޤާލީ މަރުޙަލާގެ ހުށަހެޅުންތަކަށް ރިޢާޔަތްކުރުމެއް ނެތި، މަސައްކަތް ކުރިއަށް ނުގެންދެވޭގޮތަށް، ފާސްކުރި ބަޖެޓެއް ކަމަށް ވިދާޅުވިއެވެ.
"އެހެންވީމާ ސަރުކާރަށް މި އަހަރުތެރޭގައި މަސައްކަތްތައް ކުރުމުގައި ދިމާވި އެންމެ ބޮޑު ހުރަހަކަށްވީ، ސިޔާސީ ވިސްނުމެއްގައި، މި ސަރުކާރަށް އުނދަގޫ ކުރުމަށްޓަކައި، އޭރުގަ އޮތް މަޖިލީހުން ފާސްކޮށްފައި އޮތް ބަޖެޓު. އިރާދަކުތެއްވިއްޔާ އެކަން މިހާރު މި ނިމުނީ،" ރައީސް ވިދާޅުވިއެވެ.
ދެން ތަންފީޒުކުރަން ފައްޓަވާނީ، މި ސަރުކާރުން ރައްޔިތުންނަށްޓަކައި ވެވަޑައިގެންފައި ހުރި ވަޢުދުތައް ފުއްދެވުމަށްޓަކައި މި ސަރުކާރުގެ އަޣުލަބިއްޔަތު އޮތް މަޖިލީހުން ފާސްކުރެއްވި ބަޖެޓުކަމަށް އެމަނިކުފާނު ވިދާޅުވިއެވެ.
ތޮއްޑޫގައި ދެއްކެވި ވާހަކަފުޅުގައި ރައީސުލްޖުމްހޫރިއްޔާ ވަނީ، ބިނާރާއި ޢުމްރާނީ ތަރައްޤީގެ އިތުރުން މުޖުތަމަޢުގެ ހަމަޖެހުމަށްވެސް ސަރުކާރުން ދެއްވާ އަހަންމިއްޔަތު ފާހަގަކުރައްވާފައެވެ. އެގޮތުން، ސިޔާސީ ފައިދާ ހޯދުމަށްޓަކައި އެކި އިންތިޚާބުތަކާ ދިމާކޮށް ޖަލުތަކުގައި ތިބޭ ކުށްވެރިން ރިހެބިލިޓޭޓްނުކޮށް ދޫކޮށްލުމުގެ ޘަޤާފަތް، މި ސަރުކާރުން ނައްތާލާފައިވާކަމަށް ވިދާޅުވިއެވެ.
އެހެން އަހަރުތަކުގައި، އެކި އިންތިޚާބުތަކާ ދިމާކޮށް ބޮޑެތި ޢަދަދުތަކުން ޤައިދީން މިނިވަންކުރަމުންދިޔަ ނަމަވެސް، މި ނިމުނު އަހަރު ތެރޭ، މުޅި އަހަރަށް ބަހާލައިގެން، ޤާނޫނުގައި އޮންނަ ފުރުޞަތުތަކުގެ ތެރެއިން އަދަބު ލުއިކޮށް، ދޫކޮށްލާފައި ވާނީ ޖުމުލަ 86 މީހުންކަން އެމަނިކުފާނު ފާހަގަކުރެއްވިއެވެ. އެގޮތުން އެމަނިކުފާނު ވަނީ، މި ހިނގާ ޑިސެމްބަރު މަހު ވަޒީރުންގެ މަޖިލީހުން ފާސްކުރި، ޖަލުތަކުގައި ޙުކުމް ތަންފީޛުކުރަމުންދާ ޤައިދީންނަށް ހިންގޭ ރީހެބިލިޓޭޝަން ޕްރޮގްރާމްތަކަށް ބަދަލު ގެނެސް، އެ ޕްރޮގްރާމްތަކާއި ގުޅުވައިގެން ޙުކުމަށް ލުއި ދިނުމާއި، ޙުކުމް މަޢާފުކޮށްދިނުމުގެ ފުރުޞަތު ފަހިކޮށްދިނުމަށް ނިންމެވި ނިންމެވުމަށް އިޝާރާތްކުރައްވާފައެވެ. މި ސަރުކާރުން އިސްކަންދޭނީ ތަރައްޤީ އާއި ހަމަޖެހުމަށްކަމަށާއި، ސިޔާސީ ވިސްނުމެއްގައި ބަދަލުހިފުމުގެ ރޫޙެއްގައި މަސައްކަތްނުކުރައްވާނޭކަމަށް އެމަނިކުފާނު ވިދާޅުވިއެވެ.
