ދިވެހިރާއްޖޭގެ މަސްވެރިންގެ ދުވަސް މިއަދު ފާހަގަކުރަމުން އަންނައިރު ޒަމާނުއްސުރެ ބުރަމަސައްކަތެއްކޮށް ރަނގަޅު އާމްދަނީއެއް މަސްވެރިކަމުން ހޯދާ ގިނަ ދިވެހީން އުޅެއެވެ. އުފަލަކީ މި މަސައްކަތުގައި ފޯރިއާއެކު ތަފާތު އުމުރުގެ މީހުން ޝާމިލުވާތީއެވެ.
ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ރަސްމީ އެކްސް އެކައުންޓުގައި ހިއްސާކުރެއްވި ޕޯސްޓުގައި ވިދާޅުވީ އަތްވާއި ވާރޭގައި، ދުވާލާއި ރޭގަނޑު، ބިޔަ ކަނޑުތަކުގައި ދިވެހި މަސްވެރީން ކުރާ ހިންމަތުގެ އަގު އިޙްތިރާމާއެކު ވަޒަންކުރުމަކީ ޤައުމީ ވާޖިބެއްކަމަށެވެ.
މަސްވެރިންގެ ދުވަހެއް ފާހަގަކުރަމުން އަންނައިރު ވޭތުވެދިޔަ އަހަރުތަކުގައި މަސްވެރިންގެ އެންމެ ބޮޑު ކަންބޮޑުވުމަކީ މަސްކިރުވުމަށްފަހު ލިބެންޖެހޭ ފައިސާ އަވަހަށް ނުލިބުމެވެ. ހަމައެކަނި މިމަސައްކަތުން ލިބޭ އާމްދަނީއިން ދިރިއުޅޭ ގިނަ އާއިލާތަކެއް ތިބިއިރު މިގޮތަށް ފައިސާ ނުލިބި ލަސްވުމަކީ ދިރިއުޅުމަށް އަސަރު ކުރާ ކަމެކެވެ. ޒަރޫރީ ބޭނުންތައް ނުފުއްދި ހާލުގައި އުޅެންޖެހޭ ފަހަރުވެސް އާދެއެވެ.
އައު ސަރުކާރު ވެރިކަމަށް އައިއިރު މަސްވެރިންނަށް ދޭންޖެހޭ 250 މިލިއަނަށްވުރެ ގިނަ ރުފިޔާ ނުދެވި ހުރިއިރު މި ސަރުކާރުން ވަނީ އެފައިސާތައް ދީ ނިންމާފައެވެ.
މަސްވެރިންގެ ކަންބޮޑުވުންތަކަށް ހައްލު ހޯދައިދިނުމުގެ ގޮތުން ރައީސް ޑރ މުޢިއްޒުގެ ރިޔާސީ ވަޢުދުފުޅާއި އެއްގޮތަށް ބޭންކް އޮފް މޯލްޑިވްސް (ބީ.އެމް.އެލް)ގައި އެކައުންޓް ހުޅުވާފައިވާ މަސްދޯނިތަކަށް، މިއަދުން ފެށިގެން، މަސް ކިރުވާތާ 48 ގަޑިއިރުގެ ތެރޭގައި ފައިސާ ޖަމާވާނެ އިންތިޒާމު ސަރުކާރުން ވަނީ ހަމަޖައްސައިފައެވެ. އަދި މަސްވެރިންގެ އެންމެ ބޮޑު ކަންބޮޑުވުމެއް ކަމަށްވާ ތެޔޮ ލިބުމުގައި ހުރި ދަތިކަމަށް ޙައްލު ހޯދައި ދިނުމުގެ ގޮތުން މިއަދުން ފެށިގެން 4 ރަށެއްގައި ހުންނަ އެސް.ޓީ.އޯގެ ނުވަތަ އެފް.އެސް.އެމްގެ ސައިޓުތަކުން "އެސްޓީއޯ ރޭޓް"ގައި އަގު ހެޔޮކޮށް މަސްވެރިންނަށް ތެޔޮ ލިބޭނެކަމުގެ ޔަޤީންކަން، ވަނީ ދެއްވައިފައެވެ. އެއީ، ކ. ހިންމަފުށި، ގއ. ކޫއްޑޫ، ޅ.ފެލިވަރު އަދި ސ. ހުޅުމީދޫއެވެ. އަދި ގއ. ކޫއްޑޫ އާއި ޅ.ފެލިވަރު ސަރަޙައްދުގައި ހަރަކާތްތެރިވާ މިފްކޯގެ ބޯޓުފަހަރުންވެސް "އެސްޓީއޯ ރޭޓް"ގައި މަސްވެރިންނަށް ތެޔޮ ލިބޭނެ އިންތިޒާމުތައް ހަމަޖެއްސެވުމަށް އެސް.ޓީ.އޯއިން މަސައްކަތް ކުރައްވަމުން ގެންދަވާކަންވެސް ރައީސް އިއްޔެ ވަނީ އިޢުލާން ކުރައްވާފައެވެ.
މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަހްމަދު ޝިޔާމް އެކްސްގައި ކުރެއްވި ޕޯސްޓުގައި ވިދާޅުވީ ޑިސެމްބަރު 8 ވަނަ ދުވަހު މަސްވެރިން މިފްކޯއަށް ކިރި މަހަށްވާ 2،045،823.37 ރުފިޔާ މިއަދު މިފްކޯއިން މަސްވެރިންނަށް ޖަމާކޮށްފައިވާކަމަށެވެ. މިއީ އިއްޔެ މަސްވެރިންގެ ޕޭމަންޓުގެ ބާކީހުރި ފައިސާ ދިންއިރު ޑިސެންބަރު 7 ވަނަ ދުވަހު ބޭނި މަހުގެ ޕޭމަންޓް ހިމެނޭގޮތަށް ދެއްކި ޕޭމަންޓުގެ ފަހުން ފުރަތަމަ ފަހަރަށް 48 ގަޑިއިރުތެރޭ މަސްވެރިންގެ ފައިސާ ރައީސްގެ ވައުދުފުޅާއި އެއްގޮތަށް ޖަމާކުރެވުނު ތާރީޚީ ދުވަސްކަމުގައި މިނިސްޓަރ ޝިޔާމް ވަނީ ވިދާޅުވެފައެވެ.
ސަރުކާރުން ވަނީ މިސްރުކާރުން އެކުލަވާލި މަސްވެރިންގެ ދަފުތަރަށް ޤާނޫނީ ހައިސިއްޔަތު ދިނުމަށް ވެސް ނިންމާފައެވެ. މަސްވެރިންގެ ހުރި ކަންބޮޑުވުންތައް ހައްލު ކުރުމުގެ ގޮތުން ރައީސް ވަނީ ނިމިދިޔަ ހަފްތާގައިވެސް ކެޔޮޅުންނާ ބައްދަލުކުރައްވާފައެވެ. އަދި މަސްވެރިންގެ ބައެއް ޖަމްއިއްޔާތަކާއިވެސް ބައްދަލުކުރައްވާ ބޭނުންފުޅުވާ ކަންކަން ވަނީ ބައްލަވާފައެވެ.
މަސްވެރިކަމުން ހޯދޭ އާމުދަނީ އިތުރުކުރުމަށްޓަކައި ރާއްޖޭގައި ބާނާ މަސް ވިއްކާނޭ ބޭރުގެ ބޮޑެތި މާރުކޭޓުތައް އިތުރަށް ހޯއްދެވުމަށާއި، ރާއްޖޭގައި މަހުގެ އުފެއްދުންތަކުގެ ކާރުޚާނާތައް އިތުރު ކުރައްވައި، މަސް ރައްކާކުރެވޭ ވަރު އިތުރުކުރެއްވުމަށް މި ސަރުކާރުގެ ފުރަތަމަ އަހަރު ވަނީ މަސައްކަތް ފަށްޓަވައިފައެވެ.
ދިވެހި މަސްވެރިންނާއި މަސްވެރި އާއިލާތަކަށް އެދެނީ އަބަދުވެސް ކުރިއެރުން މިންވަރު ކުރެއްވުމެވެ. އާމީން!
